কাছারদা লৈবা চুরাচান্দ মহারাজগী মপাইবুংঙোগী নীংশিং খুভম য়েংশিনবিদনা লৈহৌরি
ইম্ফাল, জানুয়ারি ১১: আসামগী কাছার দিষ্ট্রিক্টকী মনুং চন্না লৈবা ললাং পার্ট ৪ মোইরাংবাদ হায়রিবা মফম অসিদা মণিপুরগী নিংথৌ চুরাচান্দ নিংথেমচাগী মপা ইবুংঙো চাওবী অমদি নিংথেমচানা মতম খরগী ওইনা কাছারদা লাকপদা লৈরম্বা অমদি মফম অসিদা মশা ঙম্লক্তদুনা অরোইবা য়াহিপ তানখিবদগী মশা পোৎলোইখিবা মফম অসিদা লৈরিবা মহাক্কী মোংফমগী ফূরা য়েংশিনবিদনা লৈহৌরি।
কাছার দিষ্ট্রিক্টকী লালাং পার্ট ৪গী মোইরাংবাদতা লৈরিবা নিংশিং খুভমগী ফূরা অসিগী মনাক্তা লৈরিবা এম দি সামসুর উদ্দিন কৌবা মীতৈ পাঙল অমনা য়াম্না পেন্দবগা লোয়ননা পাউচে অসিদা ফোঙদোকখিবদা, ফূরা অসি মণিপুরগী মমিং লৈরবা চুরাচান্দ মহারাজগী মপা ইবুংঙো চাওবীয়াইমাগী পোৎলোইখিবা মফমনি। মফম অসি নীংথিনা শেমজিনবিরবদি য়াম্না নুংঙাইজগনি।
অদুবু ইম্ফাল অমদি কাছারদগী মী ময়াম অমা লাক্লম্লগা থাজবখক্তং পীরম্লগা থবক্তি ঙসি ফাওবা তৌবিরক্তবা অসি পেন্দে। মরু ওইনা কমিউনিটি হোল শাগনি, মীয়ামগী য়েংফম ওইহনগনি, ফূরা ফজনা থমগনি হায়বনচিংবা ৱাফম কয়া ফোঙদোক্লমখি। অদুবু ঙসি ফাওবা থবক্তা ওন্থোরকত্রিবা অসি থবক্তা ওন্থোকপিরকউ হায়খি।
খূল অদুমক্তদগী সামসুর উদ্দিন কৌবা মীওই অমনা ফূরা অসি মতম লৈরিঙৈদা শেমগৎহৌদ্রবদি তপ্না তপ্না মাঙখিবা য়াবগী ফিভমদা লৈরগনি, মরম অদুনা মরী লৈনবশিংনা মীৎয়েং চঙবিনবা ফোঙদোরকখিবগা লোয়ননা মণিপুরগী পুৱারিগা য়াম্না নক্নবা মরী লৈনবা অমদি য়াম্না হিষ্টোরিকেল ওইরবা ফূরা অসিবু অসুম্না থম্বিবা অসি য়াম্না নুংঙাইজদে হায়নসু পেন্দবা ফোঙদোরকখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু