• 13
• ২৭শে জুন ২০২৪ ইং
• Share on:

আন্দামানদা লৈবা মাউন্ট মণিপুর তীর্থভূমিদা নোংমা

এল কুমার, আগরতলা

আন্দামান নিকোবর হায়রিবা আইল্যান্ড অসি পঙ্গোপসাগর অমসুং আন্দামনা সাগর অনীগী ময়াইদা লৈবা ঈথৎ কয়াগী পরেংদনি। অচৌবা মচা কয়া য়াওনা ৫২৭ খক্ ঈথৎ লৈ। অদুগা ঈথৎ পুম্নমক্তা মী তাদে, ঊ-ৱাসু থোইদোক্না হৌদে। ঊ-ৱা হৌবা, মী লৈবা ঈথৎতি ৩৮ খক্তনি। আইল্যান্ড অসিগী এরিয়া ওইরিবসি ৮২৪৯ স্কোৱার কিমিঃ অদুগা মী মশীংনা ৪.৩৮ লাখ খক্তনি। ভারতকী মেইন ল্যান্ডদা তারিবা বাঙ্গালী, পাঞ্জাবী, তামিল, তেলেগু, কেরেলিয়ান মফমসিদসু লৈরি। অদুগা বাঙ্গালীগী মশীংনা খরা য়াম্মী। পোর্ট ব্লেয়ার ক্যাপিটেল সিটি’নি। আন্দামান নিকোবর অসি কেন্দ্র সরকারনা ডাইরেক্ট শাসন তৌরবা রাজ্য অমনি।

ঈথৎশিংগী মনুংদা ‘মাউন্ট হ্যারিয়েট’ কৌবা ঈথৎ অমা লৈ। পোর্ট ব্লেয়ারদগী কিলোমিটার ৭ রোম লাপ্পী। ঈশিং লম্বীদা চৎপা তায়। চাত্থাম কৌবা পোর্ট ব্লেয়ারগা থংননা লৈবা ঈথৎ অমদগী ‘মাউন্ট হ্যারিয়েট’ চৎপগী লোঞ্চ সার্ভিস লৈরি। মাউন্ট হ্যারিয়েট অসি আন্দামনা নিকোবরগী অহুম শুরবা ৱাংলবা চীং অমনি। চীং অসিদা ঊপাল ৱাপালনা মশীং য়াম্না হৌই। শা-ঙা কয়াসু লৈরি। মাইকৈ মরি অসি মূশুক মুরবা আন্দামান সাগর গী ঈশিং, ফিবালদা শাথিরবা কুমিরসু লৈ। মী থোইদোক্না লৈতে। অদুবু আন্দামান এডমিনিষ্ট্রেশনগী ডিভিশনেল ফোরেষ্ট অফিস লৈরি। ভারত সরকারনা ইং ২০২১ দা মাউন্ট হ্যারিয়েট অসিবু ‘মাউন্ট মণিপুর নেশনেল পার্ক’ হায়না মীংথোনবিখি। অসিগী ইতিহাস অমা চাওনা লৈরি।

ইংশোক ১৮৯১ দা অহানবা ওইনা ঈঙ্গলো-মণিপুর লালহৌ অসি থৌবালগী খোংজোমদা ওইখি। লাল’দুদা ইংরেজনা মায় পাক্তুনা মণিপুর লৌশিনখি। ঐখোয় লোইপুম্বনা ইতিহাস অসি খংঙি অদুম ওইরবসু নীংশিংজবনি। খোংজোম লালহৌ গী মতুংদা যুবরাজ টিকেন্দ্রজিৎ অমসুং খাঙ্গাল জেনারেলবু ইম্ফাল পোলো গ্রাউন্ডদা ফাঁসিগী শগায় শারগা মথৱাই লৌখি। অমরোমদনা স্পোশাল কোর্ট অমদা মণিপুর নিংথৌরেল কুলচন্দ্র ধ্বজ, চোংথা মিয়া নচিংবা খোংজোম লালহৌ অদুদা ইংরেজনা ফাজিনখিবা অতৈসু লান্মী ২৩ বু কালাপানি ৱাংমদা থাখিনবা দন্ডি পীখি। পাউনা ব্রজবাসী, চীংলেস্নানা নচিংবা লান্মী ৫০ খোংজোম লানপুংদা মথৱাই থাখি।

কালাপানি ৱাংমদা থাখিনবা দন্ডি ফংলবা মহারাজা কুলচন্দ্র ধ্বজ, চোংথা মিয়া অতৈসু লান্মী ২৩ আন্দামানদা পুরক্লগা হায়রিবা মাউন্ট হ্যারিয়েট চীং অসিদা থমখি। কিঃমিঃ ৫রোম পাক্লবা চীং অসি ঊ-ৱানা মতম অদুদা কুপশিন্না লৈরম্মী। চীং অদুদা লেপার্ড, লমহুই, শয়োম, লী খারৌ গুম্বা মহু চেল্লবা জীব-জন্তু, নাপী য়াম্না লৈরম্মী, ঈশিংদনা কুমীর। ঈশিংদা কুম্লবদি কুমীরনা লোইশিনখিবা খংহৌদে। অসিগুম্বা মফম অসিদা মহারাজ কুলচন্দ্র, চোংথা মিয়া অমদি খোংজোম লালহৌগী লান্মীশিংবু দন্ডি পীবা ওইনা লৈহনখি। মতম শাংনা লৈরবা মতুংদা মহারাজা কুলচন্দ্র ধ্বজ ইবুঙোবু মফম অসিদগী থাদোকরপীরবসু মণিপুর চংবদা অথিংবা থমখি। মফম অদুদা রৈবা লান্মী কয়া অনাবা কয়া পায়রদুনা শিবা কয়াসু য়াওখি হায়রি। য়াম্না ৱানা মখোয়গী পুন্সি লেনখি। থক্নবা ঈশিং, অচাপোৎ, তুম্ফম চাফম লৈরমদে, লায়েংবগী তাঞ্জাসু ফঙমদে। অদুম ওইরবসু ইমা লৈপাক ঙাকপগী লান্মীশিংনা ঈথৎ অদুগী মাইগৈ মরি মুশুক মুরবা আন্দামনা সগারগী ময়াইদা শা-ঙানা থন্না লৈরবা চীং অদুদা নোক্না নোক্না মখোয়গী পুন্সি অদু লেনখি। মাউন্ট হ্যারিয়েট চীং অসি পূন্য চেল্লবা তীর্থ ভূমি অমনি। মমা লৈপাক নুংশিজবা মণিপুরগী লান্মীশিংগী স্মৃতিদা ভারত সরকারনা ইং ২০২১ দা মাউন্ড হ্যারিয়েট চীং অসিবু ‘মাউন্ট মণিপুর নেশনেল পার্ক’ অমা ওইনা লাওথোক পীখি।

ইং ১৮৫৭ গী সিপাহী লালহৌ (সিপোয় মিউটিনি) গী মতুংদা মশিং য়াম্না ব্রিটিশ ভারতকী সিপাহীশিংবু ফাজিনখি। মখোয়বু দন্ডি পীখি। অদুবু মখোয়বু কদায়দা থমগনি হায়বসিগী ৱাখলনা আন্দামানদা থম্বগী থৌরাং তৌখি। অসুম্না অহানবা হ্যাভলোক হায়রিবা ঈথৎসিদা কৈশুমশঙ শারগা থমখি। ভারতকী নীংতম্বা মুফমেন্ট য়াম্না কন্না হৌরকপদা নীংতম্বা লান্মীশিংবু ফারগা দন্ডি পীবগী দমক ইং ১৯০৬ দা সেলুলার জেইল শেমখি। মারেমগী তমথিরবা কৈশুমশঙ অমনি। মরম অসিনা মতম অমদা ‘কালাপানি’ ৱাংমদা কনাগুম্ববু থাখ্রবদা মথৱাই লৌনা অমুক হল্লকখিনি হায়বসি থাজনরমদে। অসুম্না কালাপানি হায়রবদা ময়াম্না অকিবা মশক চেল্লবা য়াম্না কিনরম্মী। ভারতনা নীংতম্বা অসি ঐখোয়গীদি তীর্থ ভূমি অমা ওইখি। হায়রিবা সেলুলার জেইল অসিদা নীংতম্বা লান্মী কয়াবু ফাঁসিগী শগায়দা ইংরেজশিংনা মথৱাই লৌখি। কয়া অমবু ওৎনৈখিবা ঙসিসু সেলুলার জেইল য়েংলুবদা মখোয়বু ওৎনৈবা তৌখিবগী খুভম কয়াসু লৈরি।

অসিগুম্বা কালাপানি ৱাংমদা লৈবা আন্দামানদা চৎপগী তানফম অমা ঐগী পুন্সিদসু লাকখি। মতম অদু ইং ১৯৯৯ দা আন্দমানগী ক্যাপিটেলদা ‘আন্দামান ফেষ্টিভেল’ অমা ওইখি। ত্রিপুরাদগী মগ ট্রাইবেলশিংগী কালচারেল টিম অমগা খিদিরপুরদগী এস ডি হর্ষবর্দ্ধন কৌবা জাহাজ অমদা আন্দামান গীদমক খোংশানবা হৌখি। জাহাজ অসিনা গঙ্গা তুরেলগী কিমিঃ ১২০০ ঈশিং লম্বীদা নুমিৎ মঙানি মতুংদা পোর্ট ব্লেয়ারদা থুংখি। পুন্সিগী অহানবনি জাহাজ তোংবা অমসুং মুশুক মুরবা কালাপানিগী ইয়াইদা তাওরিবা। বঙ্গোপসাগর অসিনা লুরিবসি ফিট ৮৫০০ অদুগা মফম খরদনা লুরিবসি ফিট ১৫৩০০। বঙ্গোপসাগরগী এরিয়ানা ১৬০০ স্কোয়ার কিমিঃ। আন্দামানদা জাহাজনা চৎকে খল্লবদি কোলকাতা দগী ১২০০ কিমিঃ, চেন্নাইদগী ১৩০০ কিমিঃ অমসুং বিশাখাপত্তনমদগী ১৯০০ কিমিঃ। ‘মথক্তা পাইবা কোলকাতা, চেন্নাই, দিল্লী, বোম্বাইদগী ফ্লাইট সার্ভিস লৈরি।

ঐনা আন্দামানদা লৈরকপসি থা অমনি। আন্দামানগী ঈথৎ কয়াদা চৎলুই রস, হ্যাভলোক, নীল, দিগলিপুর, জনিবোয়, মায়া কন্দাক নিকোবর লিটল আন্দামান সী বিচসু ২০ মুক লৈরি। মী পল্লবদা রাধানগর, ইলিফেন্টা, কালাপাথর, ওয়ানডোর, সীতপুর, ভরতপুর নচিংবা অতৈসু কয়া লৈরি। আন্দামান কোইবা চৎলবদি সেলুলার জেইল চৎত্রবদি মফমসি য়েংবা মপুং ফারে হায়বা য়াদে। ঐসু নোংমা চৎলুই, মফম অসিদা চংলুবদা হকচাংসে স্বাই-স্বাই করিনোমা ওইখি। মফম কয়াদা ওৎনৈবা তৌখিবগী খুদম কয়া লৈ। মাইগৈ অমদা ফাঁসি পীবগী শঙ। সেলুলার জেইল অসিদা পীকখ্রবা মী অমখক্তা লৈবা য়াবা কা মচা মচা ৬৬৮ খক লৈরম্মী। সমুদ্রদা লৈবা ষ্টার-ফিসকী মওংনি। মশা তরেৎ লৈরি তলা অহুম ৱাংলবা বিল্ডিংনি। জেইল অসিদা নীংতম্বা লান্মী লৈরম্বশিংগী মীংসু লৈরি বটকেশ্বর নন্দী, সাভারকার, বারীন ঘোষ, উল্লাস কর দত্ত, হরে কৃষ্ণ গোঙার, ত্রৈলোক নাথ চক্রবর্ত্তী নচিংবা অতৈ কয়া।

অদুবু ঐনা য়াম্না কুপ্না থিজিনজখি অদুদি খোংজোম লালহৌদা মহারাজা কুলচন্দ্র ধ্বজ ইবুঙো অমসুং অতৈসু লান্মী ২৩ কালাপানি ৱাংমদা থাখি হায়বা লান্মীশিং কদায়দা লৈহনখি হায়বদু। থিজিনবগী মতুংদা খংবা ঙমখি মখোয়বুদি পোর্ট ব্লেয়ারদগী কিমিঃ ৭ রোম লাপ্না লৈবা মাউন্ট হ্যঅরিয়েট কৌবা ঈথৎতা থমখি। ঈথৎ অসি চীং অমনি। মফম অসিদা চৎপা য়াবগী ঈ-পাউ লৌবগী মতুংদা নোংমা ঐগী মরূপ বিহারগী অফিসার অমগা চাথাম হায়বা ঈথৎ অমদা লোঞ্চতা চৎলে। পুং অমরোম চৎপগী মতুংদা বেম্বো ম্যাট কৌবা মফম অমাদা লোঞ্চতগী কুম্লগা অটো রিক্সো তৌনা মাউন্ট হ্যারিয়েটতা য়ৌরে। মী লৈবা যুম লৈতে অদুগা ডিভিশনেল ফোরেষ্ট অফিস লৈ। মতম অদুদা লম্বীসু থোইদোক্না নালমদে। মাইগৈ পুম্বা মশিং য়াম্না ঊ-ৱা হৌই। হৌজিকসু মফম অসিদা মশিং য়াম্বা চীংগী ওকশা, কুমীর, ৱাইখু, মখল মখল কয়াগী উচেক কুয়াক লৈরি। অসিগুম্বা মফম অসিদনি মহারাজা কুলচন্দ্র ধ্বজ ইবুঙো অমসুং লান্মী ২৩ না মখোয়গী পুন্সি মতম শাংনা লেনখিবসি। হিপ্পা য়াবা, য়ুম, থক্নবা ঈশিং, অচাপোৎ কদায়দগী ফংলুগনি? চীং মথক্তা কাখৎলে শা, মখা কুমথরে ঈশিংদা কুমীর। হকচাং ঙমলকত্রবদা মনা মশীং। কয়া ৱানা খংদুনা মখোয়গী পুন্সি লেনখিবা। খংহৌদনা ইকোক নোঞ্জখি খুরুমজখি তীর্থভূমি অসিবু। ইমা লৈপাকপু নুংশিরবা পাঙ্গল্লবশিংগী স্মৃতিদা ভারত সরকারন লাওথোকপীখ্রে মাউন্ট মণিপুর নেশনেল পার্ক। আশা তৌজরি মণিপুর সরকারনা মফম অসিদা নীংশিং খুভম অমা শেমগৎপীগনি। ঙসিদি ‘মাউন্ট মণিপুর নেশনেল পার্ক’ অসি য়েংবা চৎপা মী মশীং য়াম্না হেনগৎলে। মফজৈ ৩৬৫ মিটার ৱাংলবা চীং মাউন্ট মণিপুরসি ঐখোয়গীদি তীর্থভূমি অমা ওইরবনি।

সোর্স: মরূপ পাউচে।

২১ জুন ২০২৪ খ্রি.