• 9
• ১৯শে ডিসেম্বর ২০২৩ ইং
• Share on:

অন্দ্রোদ মৈ হৌরকখিবা অমদি ঙসি ফাওবা মুহৎন্দনবা থম্লকখিবগী ৱারী

-টিএইচ থৌয়াঙবা মৈতৈ

থায়না মমাংঙৈদা ঐখোয়গী লৈপাক অসিদা মঙাংগী লম, লুৱাংগী লম, খুমনগী লম, মোইরাংগী লম হায়দুনা শরুক কয়া থোক্না খায়দোক্তুনা লম লম খুদিংগী নিংথৌ অমমম পান্নদুনা লৈনরম্মী। মতম অসিদা ঐখোয়গী লৈপাকসিগী ৱাংমদা খা থংবা মাইকৈদা খুম্নং সৱা হায়বা লৈপাক অমা লৈরম্মী, লৈপাক অসিদা খুম্নুং থোংঙারেন কৌবা নিংথৌ অমা পাল্লম্মী।

নিংথৌসি তাইবঙ মীওইবশিংনা অশিবগী লাই ওইনা লৌবা অদুগা মহাক্কী লৈপাক অসিবুনা অশিবা মীগী থৱায়না চৎকদবা অশিবগী লৈপাক্নি হায়না খন্নৈ। অসুম্না লৈনরিঙৈ মতম অসিদা ঐখোয়গী লৈপাক অসিদা নিংথৌ পান্নরিবা লৈপাকশিং অসি লৈপাক অমগা লৈপাক অমগা য়াম্না তোয়না লান তৌনরম্মী, নোংমত্তা লৈপাক অসিদা মতম অদুগী মীশিংদু ঈংনা-চিক্না লৈবা ঙম্নরমদে। অসিগুম্নবা লান য়াম্না তোয়না তৌনরিবা মতম অসিদা অঙোম হায়রিবা লৈপাক অসিগা ঙানবা হায়রিবা লৈপাক অসিগা লৈপাক অনীসি ঙানবা কাংবুনা তুরেল অচৌবা হৌজিক্না ইম্ফাল হায়না কৌনরিবা অসিগী নোংচুপ থংবা মাইকৈদা খমজিংকোল হায়না কৌবা অমনা নিংথৌ ওইদুনা পাল্লম্মী। অদুগা তুরেলসিগী নোংপোক থংবা মাইকৈদনা অঙোম অঙৌপানবা হায়বা নিংথৌ অমনা নিংথৌ ওইদুনা অঙোমগী লৈপাক ওইনা লৈরম্মী। নোংমদি ঙানবা কাঙলূপনা তুলেল অসি ফৈনা থিংলগা ঙানৈদুনা ঙা ফারম্মী। ঙা ফাবা অদুদা তুরেলগী ঈশিংদু লৈনাং তাবমখৈ নৈরম্মী। ঈশিং নৈবা অসিগী ৱাহৌদগী অঙৌপানবগী অঙোম লৈপাক অসিগা ঙানবা খমজিং কোরনা পানবা ঙানবা লৈপাক অসিগা লৈপাক অনীসি অকনবা লান শোক্নখি। লান অসিদা খাবা লৈপাক্কী খাবা লৈরোনখৈনা ঙানবা লৈপাক্তা লান পাংখি। লান অসিদা খমজিংকোল য়াইবী মথ্বাই থাখিবদগী অঙোম্না লান ঙমদুনা ঙানবা লৈপাক অদু লৌশিনখি। মসিগী মতুংদা অঙোম লৈপাক্না খাবা লৈপাক্তা অমুক লান তারকখি। লান অসিদসু অঙোম লৈপাক্না লান ঙমদুনা খাবা লৈপাক লৌশিনখি।

অদুবু খাবা লৈপাক্কী নিংথৌ খাবা লৈরোন খৈদি লান অসিদা শিহৌদ্রে। মহাক্না মরৈবাকপু অঙোমগী মখুক্তগী লৌননবা অমদি মহাক্কী নিংথৌ খুভম হঞ্জিন্নবা খুম্নুং থোংঙারেনগী মফমদা লান পাংবিয়ু হায়নবা লান নেকপা চৎখি। খম্নুং থোংঙারেন্না খাবা লৈরোন খৈগী ৱা অদুবু য়াবিরদুনা মহাক্কী মনাও পোইরৈতোনবু লাইনাও তাবিগা লোয়ননা তাইবঙদা খুল থোক্তুনা তাইবঙশিংবু অরুবা অনানবা ফজবা য়ুম্লৈ-কৈরৈ য়ুম্বান কৈবাল নুংঙাইবা পুন্সি মহিং অমা তম্বীরুচো অদুগা খাবা লৈরোনখৈগী লানসু পাংবিরুচো হায়না শিন্থা পীরকখি। পোইরৈতোন লাইনাও তাবী অনীনা খম্নুং থোঙারেনগী য়াথং মতুং ইন্না মনাই মশেন খোংমী লান্মী ময়াম অমগা লোয়ননা তাইবঙমীশিংনা চানগদবা হিংনা চাগদবা মরম কয়া থোংলগা চাগদবা মরম কয়া পুরদুনা মখুক্তা মৈরা অমমম পায়দুনা খুল থোক্লকখি। মখোয়না খুল থোক্লকপদা পুরকপা মৈ’নি হায়দুনা পোইরৈ তোন্না পায়রকপা মৈ’ অদুবু পোইরৈ তোন্না খুন্থোক মৈ, পোইনাওতানা খুনফাও মৈ কৌনখি। মখোয়না খুন থোক্লকপা মতমদা তাইবঙশিংনা চানবনি হায়দুনা লফোই, চেং অমুবা মখল অমা অমসুং পোৎচৈ ময়াম অমা পুরকপা মতমদা লফোই মখল অমা য়াওরক্লম্মী। অদুগুম্লবা লফোই অদুবু ঙসি ফাওবা লফোই ওমপোৎ হায়না খঙনরি।

অদুগা চেং অদুবুনা চা-হাও পোইরৈতোন হায়না খঙনরি। অসুম্না মখোয়না খুল থোক্লকপা মতমদা পায়রকপা মৈ অদু ঐখোয়গী লৈপাক অসিদা য়ৌরক্লবা মতমদা মৈ হৌবা য়াবা মফম অমা য়েংলগা সাম্বা হায়না কৌবা উগী মশাশিংনা শিং ওইদুনা মৈ অদুবু মুৎত্তনবা য়াম্না চেকশিন্না মৈ হৌদুনা থম্লম্মী। মৈ’ অদুবু মফম অদুদা লৈরম্বা মীশিংদা মৈ অসি মুৎত্তনবা হোৎনৌ কো হায়দুনা শিন্নরম্মী, মফম অদুদা-লৈম্বা মীশিংনসু মৈ’ অদুবু য়াম্না চেকশিন্না থৱায় য়াওনা হোৎনদুনা মৈ অদুবু মুৎহনবা য়াদে খন্দুনা মুৎহন্দনা থম্লক্লি। অদুগুম্লবা মৈ অদু ঙসি ফাওবা ঐখোয়না নোংমাইচিং চিংখোঙগী নোংপোক থংবা চিংয়াদা লৈরিবা অন্দ্রো হায়রিবা মফম অসিদা ঙসি ফাওবা মুৎহন্দনা লৈরিবা মৈ’ অসিনি কো ইশু-শা! অদুগা অমনা ঐখোয়গী লৈপাক অসিদা নিংথৌ ওইনা পানখিবা চিংঙু নোংদা লাইরেন পাখঙবনা ফম্বাল কাবা ফম্বাল তোংবা নুমিত্তা মফম অসিদগী মৈ লৌদুনা ফম্বাল মৈরা কৎখি ফম্বাল মৈরা ওকখি। মরম অসিদগী ঐখোয়গী লৈপাক অসিদা নিংথৌ ওইনা হেক পাল্লকপা ইনিংথৌ খুদিংমক্না ফম্বাল কাবা ফম্বাল তোংবা নুমিত্তা মফ অসিদগী মৈ লৌরুরগা ফম্বাল মৈরা ওকপা চৎনরকখি।

সোর্স: মরূপ পাউচে