অইবা যোদ্ধচন্দ্র সনসম লৈখিদবগী অহানবা নীংশিং থৌরম পাঙথোক্তুনা হৈকৎ-লৈকৎ তমখ্রে
ইম্ফাল, মে ১৬ : ঈ এন টিগী ডোক্টর অমা ওইবতা নত্তনা লমদম অসিগী মমিং লৈরবা অঈবা অমা ওইনা লৈরমখ্রবা প্রোফেসর যোধচন্দ্র সনসমনা লৈখিদবা চহী অমা মপুঙ ফারকপগী থৌরম ঙসি মোজোরখুলদা লৈবা মণিপুর প্রেস ক্লাবতা পাঙথোকখ্রে। ফেমিলি ওব প্রোফেসর যোদ্ধচন্দ্র সনসম অমসুং তুংগী য়াইফনবা শেম্বা কাঙলূপ অনীনা শিন্দুনা ঙসি পাঙথোকখিবা ফার্ষ্ট ডেথ এন্নিভার্সারি ওব প্রোফেসর যোদ্ধচন্দ্র সনসমগী থৌরম অদুদা নোংমাইথেম কিরনকুমার কনভিনর এম এল এ বি সাহিত্য একাডেমি নিউ দিল্লি, ক্বাদ রাইটার্স মোইরাংগী প্রেসিডেন্ট সলাম তোম্বা, মণিপুর য়ুণিভার্সিটিগী দিন ওব হিউমেনিটি প্রোফেসর নহাকপম অরুনা, মণিপুর য়ুনিভার্সিটি ওব কালচারগী এসিষ্টেন্ট প্রোফেসর মাখোনমনি মোংসাবা অমদি ৬ শুবা মণিপুর রাইফেলসকী এসিষ্টেন্ট কম্মান্ডেট এল কুঞ্জেশ্বর, এম পি এসনা মথংশিৎনা অথোইবা মীথুংলেন, অখন্নবা লেংবীরকপশিং অমদি থৌরম মপু ওইনা শরুক য়াখি।
থৌরম অদুদা অথোইবা মীথুংলেনগী ৱারোল পীরদুনা এন কিরনকুমারনা হায়, অইবা প্রোফেসর যোদ্ধচন্দ্র সনসমনা লৈখিদবা অসি লমদম অসিগী ওইনদি মেনখৎপা ঙম্লরোইদবা য়াম্না চাওবা অহোবা অমনি। মহাক্কুম্বা থম্মোয় শেংবা অইবা অতাঙবনি। প্রোফেসনদা ডোক্টর অমা ওইজরবসু মহাক মশা সাহিত্যদা ঙাওজবা অমদি লমদম অসিগী ফজখ্রবা চৎনবী অসিবু য়োকখৎপা পামজবা মীওইনি। কোভিদ কৌবা মহীক্না শক্নাইরবা অইবা অসিবু ঐখোয়গী ইরক্তগী ফুক্তোক্তুনা পুখবা অসি য়াম্না লাইবক থিবনি হায়খি।
ঙসিগী থৌরম অদুগা মরী লৈননা লৈখিদ্রবা অইবা অসিগী ফোটোদা হৈ লৈ কত্তুনা মীয়াম্না ইকাইখুম্নবা উৎখি। অমদি মহাক্কী মরমদা লমদম অসিগী শক্নাইরবা অইবশিংনা শৈথাদুনা ইবা ৱারেং অমদি শৈরেং য়াওবা সোভিনিয়র অমসু ঙসিগী অথোইবা মীথুংলেননা মীয়াম মমাংদা ফোঙদোকখি।
পনবা য়াবদি যোধচন্দ্র সনসম হৌখিবা কুমজা ১৯৪৪ গী নভেম্বর ২০ দা শিংজমৈ মখা সনসম কোল্লুপতা সনসম তোমাল অমসুং মোইরাংথেম নিঙোল মাইপাকপীগী মচা ওইনা পোকখি। ইন্দিয়াগী তোঙান তোঙানবা মেডিকেল কোলেজ অহুমদা মহাক ঈ এন টিগী প্রোফেসর ওইরমখি। মদুগী মতুং নেপালগী নোবেল মেডিকেল কোলেজকী প্রিন্সিপাল ওইনসু লৈরমখি। শিনফমদা ডোক্টর অমা ওইজরবসু মহাক্না লমদম অসিদা ফজরবা শৈরেং, ৱারেং অমদি ঈশৈ ময়েক কয়া খুদোল তম্লমখি। অপুনবা মতম ঈশৈ কাংলূপ (অম্মিক), ওল মণিপুর মিউজিক এসোসিয়েসন অমদি পেত্রিওটিক রাইটার্স ফোরামগী মরু ওইবা থৌশি পুরমখি। মসিদা নত্তনা মণিপুরগী অহানবা ফিল্ম মেগাজিন ফিল্মগী তাইবংগী এডিটর ইন চীফ অমসুং হকচাংগী পাউজেল মেগাজিনগী এডিটরসু ওইরমখি।
মহাক্কী ফোংখ্রবা লাইরিকশিংগী মনুংদা শৈরেং লাইরিক ঐগী ঈদা (২০০৭), ঈশৈ শৈরেং ঙসিদি অশেংবা হায়দোক্লগে (২০০৯), লৈরেং লাইরিক নংগী শমিন্দুনি চান্নবী (২০১১), নোভেল মথৌ কনবা দিএনএ (২০১৩) নচিংবা পনবা য়াই। মহাক মশা ওল ইন্দিয়া রেডিওগী এপ্রোব লিরিসিষ্ট অমসুনি। মহাক্না মীয়ামদা খুদোল তম্লম্বা ঈশৈ ময়েকশিংগী মনুংদা কুমওন অমা লাকপসিদা খুদোলসিদং তম্লক্কে, ঐসু খুদোল তমজনিংখি নংনা চৎখিবা মতম অদুদা, ঙসিগী নোংলৈ নুংশিৎ অসিদা ঐহাক্কী ৱাখল কদাইদনো পনবা য়াই।
সোর্স: হুইয়েন লানপাউ
0 কমেন্ট:
কমেন্ট তৌবিয়ু