• 90
• ২২শে সেপ্টেম্বর ২০২২ ইং
• Share on:

‘মণিপুরী শৈরেংগী নুমিৎ পাঙথোকপীয়ু’

ইম্ফাল, সেপ্টেম্বর ২১

মণিপুরী সাহিত্য, মণিপুরী শৈরেংগী য়াম্না মরু ওইবা নুমিৎ অমা ওইনা চহী খুদীং গী মেরাগী থানিল (পূর্ণিমা) নুমিৎতা পাঙথোক্রিবা ‘মণিপুরী শৈরেংগী নুমিৎ’ চৎলিবা চহী অসিগী ওইনা লাক্লিবা অক্টোবর ৯দা তারি। মণিপুরী লোলগী লাইওইখ্রবা অইবশিংবু ইকায়খুম্নবা ঊৎপা, মণিপুরী শৈরেংবু মীয়ামগী ওইহন্নবা পান্দম থম্বা অমদি মণিপুরী শৈরেংবু মালেমগী ফম্বাক্তা পুখৎনবা হোৎনবা হায়বশিং অসিদা মীৎয়েং থম্লিবা থৌরম অসি মণিপুরদা লৈরিবা সাহিত্যগী লূপশিং, স্কুলশিং, কলেজশিং, য়ুনিভার্সিতিশিং, খুন্নাইগী লূপশিংনা মখোয় মখোয়না ঙমজবা থাক্তা ‘মণিপুরী শৈরেংগী নুমিৎ’ অসি পাঙথোকপীয়ু হায়না ফিক্সন এন্দ পোইট্রি ক্লাব মণিপুরগী মায়কৈদগী আপিল তৌরক্লি।

মণিপুরগী মপান্দা খুন্দাদুনা লৈরিবা মণিপুরী মমালো ওইরিবা ত্রিপুরা, আসাম, মেঘালয়, নাগালেন্দ অমসুং অতোপ্পা স্তেতশিংদা লৈরিবা ইচিনা ইনাওশিংনসু নুমিৎ অসি পাঙথোক্নবা হায়জরকপগা লোয়ননা মালেমগী অতোপ্পা লৈবাকশিং মপূং ওইনা বাংলাদেশ, কানাদা অমদি মণিপুরীশিংনা লৈরিবা মফম খুদীংমক্তা লৈরিবা ইরৈচা খুদীংমক্না মখোয়না ঙমজবা থাক অমদা হেক্তা নুমিৎ অসিবু পাঙথোকপীয়ু হায়রি।

চহী খুদীংগী মেরাগী থানিলদা পাঙথোক্লিবা মণিপুরী শৈরৈং নুমিৎ অসি ইহান হানবা ওইনা ইং ২০১৭ তা পাঙথোকপা হৌখি। হৌদোকপা চহী অসিদা থৌরম অসি সম্ফাল অমসুং লক্ষিপুর (নহারোল খোরিল্লোল শিল্লুপ্না শীনবা) দা মায় পাক্না পাঙথোকখি। মসি মখা তারকপা চহীশিং হায়বদি ইং ২০১৮ দগীদি থৌরম মণিপুর মনুংদনা জিরিবাম, ককচীং য়াওনা তোঙান তোঙানবা মফমশিংদা সাহিত্য লূপশিংনা পাঙথোক্তুনা লাক্লি।
 

থৌরম অসি ইন্দিয়াগী তোঙান তোঙানবা মফমশিং খুদম ওইনা নিউ দিল্লী, গুৱাহাতি, কোলকতা, লক্ষিপুর, আগরতলা, দিমপুরনচিংবদসু পাঙথোকখি। থৌরম অসি ইন্দিয়াগী তোঙান তোঙানবা স্তেতশিংদা মপূং ফানা পাঙথোকপদা নত্তনা কনাদাদা খুন্দাদুনা, থবক ইনখাং তৌদুনা অমসুং মহৈ-মশিং তমদুনা লৈরিবা মণিপুরীশিংনসু মখোয়গী অঙম্বা থাক্তা পাঙথোকখি।

লাইবক থীবদি ইং ২০২০ দদি কোরোনা লাইচৎনা মরম ওইদুনা মীয়াম পূন্না শরুক য়াদুনা পাঙথোকপা ঙমখিদে। অদুম ওইনমক ওনলাইনগী খূত্থাংদা পাঙথোকখি। ইং ২০২১ দসু কোরোনাগী অকিবা মরক্তা মণিপুর অমসুং অতোপ্পা স্তেতশিংদা পাঙথোক্নখি হায়রি। মণিপুরী লোলগী লাইওইখ্রবা কবিশিংবু ইকায়খুম্নবা ঊৎপা, শৈরেংবু থম্মোয়নুংদা ইরাৎচবা, মণিপুরী শৈরেংবু মীয়ামগী ওইহন্নবা অমদি মীওইবা পূম্বগী থাদোক্নবা য়াদ্রবা পুন্সিগী শরুক অমা ওইহন্নবা পান্দম থম্বগা লোয়ননা মণিপুরী শৈরেংবু মালেমগী ফম্পাক্তা পুখৎনবা হোৎনবা হায়বসিদা মীৎয়েং থমদুনা শৈরেংবু নুংশিজবা, পামজবা ফিক্সন এন্দ পোইত্রি ক্লাব মণিপুরনা হৌদোক্লিবা মণিপুরী শৈরেংগী নুমিৎ থৌরম অসি মালেমগী মফম অমদা লৈরিবা মণিপুরী ইচিন ইনাও খ্বাই খিবিক্না মখোয় মখোয়না ঙমজবা শক্লোন অমদা পাক-শন্না পাঙথোকমিন্নদুনা মণিপুরী শৈরেংগী মগুন হেলহল্লসি হায়না ক্লাব অসিগী সেক্রেটারি পাউজেল্লক্লি।

সোর্স: পোক্নফম