• 19
• ৬ই এপ্রিল ২০২৩ ইং
• Share on:

য়েক সলাই অমসুং গোত্রা

লমদমসিগী লৈরিবা মীতৈশিংনা লাইনিং অমসুং তিলশোল লাইশোলগী মতাংদা চৎনরিবা চৎনবীসি অংকপশিংগী মনুংদা অঙকপা অমনি। লাই-তিল হায়বসি লাইনা লাইনি। তিল হায়বসিনা মীনি। য়েক সলাই অমসুং গোত্রা উমং লাই হরাওবগী অমদি লুহোং খোংহোংবগী হায়না শিংনরকপা মতমদা য়েক সলাই থিনৈ। অদুবু মীতৈচাশিংগী মনুংদা হিন্দুগী লাইনিং চৎপশিং অসি লুহোং খোংদোংবগী মতাংদদি হিন্দুগী গোত্রদা থৌরম পাঙথোকই।

ইং ১৭০৯ ইনিংথৌ পামহৈবনা পানবা মতমদা মীচানচা লম্বোইবা শান্তিদাসকী থৌশিলদগী য়েক সলাই তরেৎসি গোত্রা মাপলদা ওন্থোকখি। য়েক সলাইবু গোত্রদা ওন্থোকসি য়াদবা মীওইশিং নিংথৌনা চৈরাক চৈথেং পীখি। নিঙথৌগী য়াথং ইন্দবগীদমক্তনি মোইরাং ললহানবা মায়চৌবু মিহাৎ কোঙ্গোয় লাংদা থুরগা য়াইবি থৱাই লৌনবা হোৎনখিবা। মীতৈ অমদি কবুই, তাঙ্খুল, অনাল, ললফৌনচিংবা ফুরুপচাশিং অসিগীসু য়েক তরেৎ লৈ। য়েক তরেৎ গোত্রদা ওন্থোকখিবশিং অদুদি মঙাং য়েক্না শান্তিলা, লুৱাংনা কাশ্যাপ, খুমননা মধুগলা, অঙোমনা ভরদ্বাজ, মোইরাংনা আত্রেয়ো/অঙ্গিরস, খাবা ঙানবনা নৈমিষ, সাই লৈসাংথেমনা বশিষ্টনি।

কংলৈপাক মণিপুরদা লৈরিবা বামোনগী গোত্র মশিংনা ১২ নি। মীতৈগা বামোনগা মান্নদে। অদুবু বামোনসু মীতৈনি। বামোনগী গোত্র মশীং ১২ অদুদি-ভরদ্বাজ, সান্তিলা, কাশ্যাপ, অমকু, বশিষ্টা, কৌশিক, বাসা, গৌতম গোত্রা, মকুন্তা গোত্রা, মধুগলা গোত্র, ব্যাশ্যা গোত্রা, পরশ্বর গোত্র অসিনি। য়েক সলাইবু গোত্রদা ওন্থোকখিবগী মাঙজবা কয়া ঐখোয়দা লৈ। মালেমদা লাইনিং লিচৎ কয়া লৈ। মালেমগী চৎনা কাংলোলনা মানা-মানা পামজবা লাইনিংদা চৎচবা য়াবগী অয়াবা পী অদুম্নদি ওইরগা মালেমগী লৈবাক কয়াদা লাইনিং লীচৎনা মৈরী ওইদুনা লৈবাক কয়া তুমখ্রে।

অসিগুম্বা কয়াসি উরুরগনি কার্ল মাক্সনা রিলিজন(ধর্ম্ম) লাইনিং লিচৎ হায়বসি খ্বাইদগী ইনাৎপু হাৎলোইদবনি। কালচার অমসুং রিলিজন অনীগী খেন্নাবা য়াম্না লৈ। ঐখোয়গী ইরমদম অসিদদি লাইনিং লীচৎনা কালচারবু হাৎনবা হোৎনৈ। কালচারগী ওইবা ৱাহন্থোক অসি য়ামখ্রে। ইনাৎ কালচারদি তাইবং মালেমদা মীওইবনা খোঙদারকপা মতমদা অদুম্মক লোয়নরক্লবনি। ঐখোয়গী হৌরকফম ইনাৎপু খোঙ্গাওনরগা মপাল লমদগী হুম্লকপা নোংলৈ নুংশিৎকী শহুমদা ঙাওজবা মীশক কয়াসু ঐখোয়গী ইরমদম অসিদা লৈতবা নত্তে। করিগুম্বা অনা-অনা খুদোংথীবা তারকপা য়ুমদা, ইঙ্খোলদা খোই শারকপা, লফুদা ময়ায় ওইবদা মপাল শারকপা মতমদা অমাইবা অমাইবীনা মপা-মপু অপোকপদা থৌনিজৌ হেক্তা হায়। খুরম্বদা চংগদবা পোৎলমশিং শাগৈ সলাই অমগা অমগা মান্নদে।

মঙাং য়েককী ওইনা খুরম্বদা চংগদবা পোৎলমশিংদি-লৈদি থম্বাল অঙাংবনে, হৈদি থমচেৎনে, ঈশিংদি নুংজেং ইকোলনে, লেমলৈ ঙাদি শারেং ঙাংলৈনবনে, থাংদি চাক থাংনে, খাম্বি মৈদি তরেৎনে, লাদি চংবি লানে, শিংদি শয়িনে, নাহৈবদি উরুমনে, সলাই মচুদি অঙাংবনে, নুং-পাৎ উকোলদি নুংজেং ঈকোলনে, অপোকপা থৌনিবগী লোয়দাম থাদি ইঙানে।

লুৱাং য়েক সলাইগীনা শিঙেল লৈরাংদি মেল্লৈনে, হৈদি কিহোমনে, ঈশিংদি লমফেন পাৎনে, ঙাদি শারেং ঙৌরুনবনে, থাংদি তোনতোম্বনে, মৈদি খোইজু লৈখামনে, শিংদি হৈকুনে, লাদি লারোংনে, নাহৈবদি উখোক মতোলনে, সলাইগী মচুদি হিগোকনে, নুং উপাৎতি লমফেলনে, য়াইফ থৌনিজবা থাদি লোয়দাম ৱাকচিং থানে।

খুমন য়েক সলাইগী ওইনা লৈদি লৈশংনে, হৈদি হৈবুংনে, ঈশিংদি পুমলেন পাৎনে, লেমলৈঙাদি শারেং মুরৈনবনে, থাংদি তোলকাপনে, খাম্বি মৈদি মৈথাং মৈনে, শিংদি চাওখাংনে, লাদি চঙবিনে, ক্কাকলানে, নাহৈবদি পুমফাইনে, য়েক সলাইগী মচুদি অমুবনে, নুং পাৎ উদি পুমলেননে, শজিবু লোয়দাম থাজদা অপোকপদা থৌনিজৈয়ে।

অঙোম য়েক সলাইগী ওইনদি লৈদি থরো অঙৌবনে, হৈদি হৈবোংনে, লাইজা ঈশিংদি কোংবা মৈরোংবিনে, লেমলৈ ঙাদি শারেং অঙৌবনে, থাংদি পুংকক থাংনে, খাম্বি মৈদি মৈরা মৈনে, শিংদি উপলনে, লাদি লারোংনে, নাহৈবদি তাইরেলনে, সলাই চরৈ ফিদি অঙৌবনে, কোংবা মরুদি অঙোম য়েক সলাইচাশিংগী অরুবা লাইফমলেন্নে।

মোইরাং য়েক সলাইগীদি লৈদি য়েরুমলৈনে, হৈদি কাংগ্রৌনে, ঈশিংদি লোক্তাকনে, ঙাদি শারেং শাংনা লাংবনে, থাংদি য়েকতোক শাবনে, মৈদি মৈথাং অহুমনে, শিংদি কুহিনে, লাদি খাংলানে, নাহৈবদি নাওত্রিংনে, সলাইগী মচুদি নাপুনে, নুং পাৎ উদি লোক্তাক মরুনে, মচা মনাইশিংনা থৌনিজবা থাদি লোয়দাম লমতা থানে।

খাবা ঙানবা য়েক সলাইগী ওইনদি লৈদি লৈমংনে, হৈদি হৈবুংনে, লাইজা ঈশিংদি লৈতাং পাৎনে, লেমলৈ ঙাদি শারেং অঙাংবনে, থাংদি চিনাই থাংনে, মৈদি লৈখাম খাম্বী মৈনৈ, শিংদি চিং য়েনশিলনে, লাদি লৈহৌলানেল নাহৈবদি নাপি শিংবিনে, নুং পাৎ উদি লৈতাং লালাসনা লোইদাম কালেন থাজদা মচা মনাইশিংনা য়াইফ থৌনিজৈয়ে।

চেংলৈ সলাই লৈশাংথেমগী ওইনাইপা ইপু অপোকপদা থৌনিজবা মতমদা লৈদি লৈশংনে, হৈদি হৈনম নাইবনে, লাইজা ঈশিংদি তাক্নাখদগীনে, লেমলৈ ঙাদি শারেং মুরৈনবনে, থাংদি খুন্থোক থাংনে, খাম্বি মৈদি মৈথাং মঙাদগী লৌগদবনে। শিংদি নোংলৈশংনে। নাহৈবদি নাপি শিংবিনে।

ঐখোয়গী হৌরেক্লোন পুৱারি নীংথিনা লৈজরম্বা লৈরিবা ঐখোয়সি অতোপ্পা লাইনিংগী গোত্রদা ওনশিন্নবা হোৎনরম্বা অমদি হোৎনরিবশিং অসি য়াম্না তমথীবা ঐখোয়গী য়েক্নবনি। ইমা লৈপাক ইরমদগী মমিংসু সনা লৈপাক, কংলৈপাক, মীতৈ লৈপাকম, মুৱা পল্লি পূম্নমক নমশিন্দুনা থম্লগা মীয়াল লোলনা ‘মণিপুর’ হায়না থোনজিনবা ঐখোয়গী খুন্নাইসিগা মরী লৈনবা ৱারী শিংবুন পুৱারী কয়াবু মুত্থৎলগা মীয়াল মীতোপচাশিংগী নোংলৈ নুংশিৎতা ঙাওজবা। মতম অমদা কংলাগী নোংচুপ সন্নথোঙদা লমদমসিগী শক্নাইবা অইবা অইবী ময়াম্না মীতৈলোল কনগদবনি হায়বগী ইহৌদা ৱাকৎ মীফম পাঙথোকখি।

নুমিৎ খরনিগী মতুংদা শক্নাইবা অইবা অমগী মমা লৈখিদ্রে হায়বগী পাউজেল ফংবদা ঐহাক চৎলি। মমালোল মতৈলোল নুংশিজবা মহাক্কী মমাগী লান্ন-থৌরম অদুদা মীতৈলোলগী ঈশৈ অমত্তা শক্লমদে। ঙাঙবনা অমা তৌথোক্লকপনা অমা। লাইনিং লিচৎ অমদি লৈঙাক্লোননা ঐখোয়গী ইনাৎপু হাৎনবা হোৎনরোইদবনি। শেম্মিৎলোলগা লাইনিং লীচৎকসু য়াম্না মরী লৈনৈ। শেম্মিৎলোলদা মহাম তাগদবা লাইনিং লীচৎতি ঐখোয়না য়েক্নবনি হায়না খনগদবনি। শান্তিদাস গোসাই ইচম চম্না রামান্দি ধর্ম্ম শন্দোকপা লাকপা নত্তে। মহাক্কী হৈশিংবনা পামহৈবা নিংথৌগী পূক্নিং ওলহনখি। শিম্মীশিং ইন্থোকখি। লৈখা তাহনখি। মহাক্না লমদমসিদা মপাল্লমদগী পোত্থোক্কী ওইবা কৈথেল অমা লিংবা পামখি।

থুম পুথোকপা ৱাইখোং, চন্দ্রখোং, ফাঞ্জংখোং, নিংঙেল তুমুখোং নিংথৌগী মীৎয়েংদগী তাম্না থমহনখি। কমেং, লৈম্রাম, ঐখোয়গী শেম্মিৎলোলগা মরী লৈনবা খুঞ্জাশিং অসিবু নিংথৌগী মীৎয়েংদগী তাম্না থমহল্লগা মপাললমদগী পুশিল্লকপা পোৎলমশিংনা মহুৎ শিন্নবা থৌশিনখি। মদুমক মহৈ য়ানখি। শিন্মীশিংবু নমথদুনা থম্বা য়ারোই। শাগৈগী ওইবা অচৌ-অশাং, অনেম-অৱাং খায়বগী চৎনবীগী শম্বল লৌথোক্কদবনি হায়বগী ৱাখল্লোলদনি খ্বাই নুংজেং পিবানা নুমিৎ কাপ্পগী লানফমদা লানচিং পুরেল ওইখিবা। পূম্নমকসি থম্লগা ঐখোয়গী য়েক সলাইবু হিন্দুগী গোত্রদা পুশিনখিবা হায়বসি ঐখোয়গী চীংনা ইকোয় কোয়শিনবা লমদম অসিদা লৈজরিবা ফুরুপচা অসিগী কাংখুল মুত্থৎনবা চাওবা থৌশিননি। চৎনিংবা লাইনিং লম্বীদা চৎলবসু, নিংনিংবা লাই নিংলবুস ঐখোয়গী ইনাৎ অমদি লোল ময়েকপুদি হাৎনবা হোৎনরোইদবনি। লোলনা ইমানি, ময়েক্না ইপানি হায়বা অদুঙৈগী মায়চৌ পুরেল পুকোকশিংনা হায়বিরম্বা ৱাফম ঐখোয়না কাওফম থোক্তে।

সোর্স: সঙাই এক্সপ্রেস (৩১ মার্চ ২০২৩)