হোজাইদা চহী তরেৎ খুন্তাকপা নীংশিং নুমীৎ থৌরম পাঙথোকখ্রে
ইম্ফাল, জানুয়ারি ০৯ : আসামগী হোজাই দিষ্ট্রিক্টতা লৈবা হোজাই গার্লস কোলেজগী কলচরেল কমপ্লেক্সতা ঙসি অয়ুক পুং ৯ তাবদগী হৌদুনা ৱী দি মৈতৈ, হোজাই, আসামনা শীন্দুনা ‘চহী তরেৎ খুন্তাকপা নীংশিং নুমীৎ’ থৌরম পাঙথোকখ্রে।
ঙসি পাঙথোকখিবা থৌরম অদুগী হৌদোকপা ওইনা ‘ৱী দি মৈতৈ’ হোজাই-আসামগী এদভাইজর কৈশাম মোহেন্দ্রনা লুচিংদুনা ফিরাল চিংখৎখি। মতুংদা ইনিংথৌ চিংলেন নোংদ্রেনখোম্বগী ফোটোদা থৌরম অদুদা শরুক য়াখিবা মীয়াম্না লৈ কত্তুনা ঈকায় খুম্নবা উৎখি। থৌরম অদুদা টি ঐচ মনিহার প্রেসিদেন্ট ফোক্স, মাইবম সঞ্জিৎ প্রেসিদেন্ট দিমপুর মৈতৈ কাউন্সিল, এলাংবম দেৱান প্রেসিদেন্ট জিরি দিভেলপমেন্ট ওর্গানইজেসন, ব্রুস পেবম সেক্রেটারি জেনারেল অমসু হেদ ক্বার্টার, ওইনাম ইনাওবী ভাইস প্রেসিদেন্ট য়ু এল ঈ এস সী ও মণিপুর, তেনশুবম মণিহার প্রেসিদেন্ট এম এস পি এ-ঐচ দি সী, বি পদ্মাপতি শর্ম্মা প্রেসিদেন্ট অপূনবা মৈরা পায়বী লূপ হোজাই-আসাম, অসেম শ্যামকিশ্বোর এক্স-প্রেসিদেন্ট এম এস পি এ-ঐচ দি সী, এল মনি সিংহ এক্স-ভি পি এম এস পি এ–ঐচ দি সী হোজাই হায়রিবা শক্নাইরবা মীওইশিং অসিনা দেজগী মেম্বার ওইনা শরুক য়াখি।
থৌরম অদুদা ৱা ঙাংবদা ফোক্সকী প্রেসিদেন্ট টি ঐচ মনিহারনা হায়খিবদা, ঐখোয় মশেলগী মরক্তা লিংজেল মান্নদবনা অমুক হন্না মণিপুর অসি চহী তরেৎ খুন্তাকপগী ফীভম অদু লাক্কদ্রা হায়বগী চিংনবা অমা মীয়ামগী থম্মোয়দা লৈতবা নত্তে। অদুনা ঐখোয় পূকচেল খোয়জেল তীন্ননা অপূনবগী ৱাখল্লোন্দা থবক তৌমিন্নবা চুম্মী হায়খি।
দিমাপুর মৈতৈ কাউন্সীলগী প্রেসিদেন্ট মাইবম সঞ্জিৎনা ফোঙদোকখিবদা, ঐখোয় মৈতৈশিংনা অমত্তা ওইনা পুনশিনবগী মতম ওইরে। ঐখোয়না অমত্তা ওইবা লীচিংদা চৎমিন্নদুনা অমনা অমগী অৱাবা তারবা মতমদা মতেং পাঙনগদবনি হায়খি। মৈতৈ ঐখোয় অমত্তা ওইনা পুনশিন্নসি হায়বা তারগদি ঐখোয় মৈতৈশিংগী মরক্তা নাগালেন্দ মৈতৈ, আসাম মৈতৈ, ত্রিপুরা মৈতৈ, বাংলাদেশ মৈতৈ হাযনা খায়দোক্লোইদবনি হায়খি। অসুম্না খায়দোকপা অসিনা মৈতৈশিংগী মরক্তা অমনা অমবু হন্থনা লৌনবগী মরম ওইহল্লি অমদি ঐখোয় পুনবা ঙমহন্দে হায়না ফোঙদোকখি।
ঙসিগী থৌরম অদুগা মরী লৈননা য়ু এল ঈ এস সী ও মণিপুরগী মনা-মথুমসু য়েন্থোকখি। তখেল্লম্বম বিরমনি, গীতামন্দির হোজাইদা ইনিংথৌ চিংলেন নোংদ্রেনখোম্বা (গম্ভিরসিংহ) খোঙা এৱার্দ, য়াংলেম পোকলেম, গোচোরা, জুগিজানদা মনাও ইবুংঙো চিংথংলেন পামহৈবা (নরসিংহ) খোঙা এৱার্দ অমসুং খোইরোম নবদ্বিপ, আমতলা হোজাইদা সনা হেরাচন্দ্র খোঙা এৱার্দ হায়রিবা এৱার্দশিং অসি খূৎশিন্নখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু