সিফাই লালহৌ অমসুং সনা চহী অহুম — রাজকুমার শ্রীস্নাহল সিংহ
সিফাইশিংগা সনা চহী অহুমনা (নরেন্দ্রজিৎ রাজকুমার) লুচিংবা সিফাই লালহৌবশিং অদুগা মণিপুর ঙমখৈদা লাল থেংনরমই। হন্দক্কী লালফম অসিদা সনা চহী অহুমবু ফাদুনা মণিপুরদা পুরকখি। বৃটিশ সরকারনা কাছাড়দা সিফাই লালহৌবগী লুচিংবা সনা চহী অহুম (নরেন্দ্রজিৎ রাজকুমার সিংহ) বু মণিপুরগী মপান্দা পুথোক্লগা বিচার তৌবা পাম্লমই। মণিপুরগী ৱাংমদা পুথোকপা হায়বসি চন্দ্রকীর্তী মহারাজনা য়ানিংলমদে।
ভারতকী মফম কয়াদা ১৮৫৭ ইংদা ভারতকী সিফাইশিংনা বৃটিশ সরকারগী মথক্তা হৌখিবা লাল অদুবু ভারতবর্ষগী ইতিহাসতা ‘সিফাই লালহৌ’ হায়না খঙনৈ। ১৮৫৭ ইংগী জানুয়ারিগী ২৩দা কলিকাতাগী মনাক্তা লৈবা দমদমদা লৈবা সিফাইশিংদা পিবা কার্ত্তুজশিংদু শিজিন্নৌ হায়বা য়ারমদে। মখোয়না য়াখিদবগী মরমদি শিজিন্নৌ হায়দুনা পিরম্বা কার্ত্তুজ অনৌবশিং অদু ওক্কী মহাউ তৈরমই হায়বা অসিনি। অসিদা নত্তবা সিফাই লালহৌবগী মফম কয়া অমসু লৈরম্মী। মসিগী মমাংদগী হৌরদুনা সিফাইশিংগী মনুঙদা মপুক্নিং লাংলম্মী। রেজিমেন্টদা লৈরম্বা সিফাইশিংদা মখোয় মশেল চাপাটি অমসুং থম্বাল য়েল্লম্মী। মসি কদায়দগী মতৌ করম্না য়েল্লকপা হৌখিবনো হায়বা কনা অমতনা খঙবা ঙম্লমদে। মসি হৌরকপসি দিল্লীদগী ওইরমগনি হায়না লৌনরমই।
হায়রিবা চহীসিগী মার্চ ২৯দা কলিকাতাদগী মাইল ১৫ থাপ্না লৈবা ব্যারাকপুরদা মঙ্গল পান্ডে হায়বা সিফাই অমনা ৩৪শুবা এন.আইগী এডজুটেন্ট লেফটেনেন্টকী কোয়াটার গার্ড মমাং মক্তদা নোংমৈনা কাপথুরম্মী। সিফাইশিংনা ব্যারাকপুরদা লৈবা সিফাইশিংগী ব্যারাক কয়া মৈ থারম্মী। চহীসিগী মার্চ অমসুং এপ্রিল থাদা অম্বালা ক্যান্টনমেন্টা লালহৌবা সিফাইশিংনা মৈ ২৫রক থাকি। মিররটতা ৩শুবা কেভেলরীগী সিফাইশিংনা মখোযদা পিবা কার্ত্তুজশিং অদু শিজিন্নৌ হায়বা য়ারমদে। চহী অসিগী মেগী ৩ অমসুং ৭ দা আউট ইন ফ্রেন্ট্রিগী সিফাইশিংনা লক্ষ্ণৌদা লাল হৌরম্মী। মথংগী নোংমাইজিং নুমিৎতা নুমিদাং ৱাইরমদা কেভেলরী অমসুং ইনফেন্দ্রিগী রেজিমেন্ট অনিগী সিফাইশিংন জেল থুগায়রমই। মখোয়গী ফাজিন্দুনা থমখিবা মরূপ-মপাংশিং থাদোক্লম্মী অমসুং মখোয়না থেংনবা ইউরোপিয়ান খুদিংমক হাতোক্লম্মী।
নুমিৎ অসিবু হায়বদি ১৮৫৮ ইংগী মে ১০ অসিবু সিফাই লালহৌবা হৌখিবা নুমিৎনি হায়না লৌই। মসিদগী সিফাই লালহৌবা অসি ভারতকী মফম মফমদা শন্দোকখি। মিরটতা সিফাইশিংনা লাল হৌরক্তুনা চহী অসিগী মেগী ১১দা হীদা যমুনা লাল্লগা দিল্লী য়ৌরকখি। দিল্লীদা লৈরম্বা সিফাইশিংসু লালহৌখি। মিরট অমসুং দিল্লীদা সিফাই লালহৌবগী পাউসি মেগী ১৪দা কানপুরদা য়ৌরমই। পাউসি য়ৌবগা কানপুরদসু সিফাইশিংনা লাল হৌরম্মী। মিরটতা সিফাই লালহৌবগী পাউসি মেগী ১৪ অসিমক্তদা লক্ষ্ণৌ য়ৌরমই। দিল্লীগী পাউনা মথংগী নুমিৎতা দিল্লীদা য়ৌরকখি। সিফাই লালহৌবা লক্ষ্ণৌদগী আউধতা শন্দোকখি। লালহৌবগী পাউ বিহার হেক য়ৌবগা বিহারগী মফম কয়াদসু সিফাই লাল হৌরমই। মিরট অমসুং দিল্লীদা সিফাই লাল হৌবগী পাউ অসি য়ৌবগা ঝাঁসিদসু সিফাইশিংনা লাল হৌরমই। ঝাসিগী লাল হৌবা অসি ঝাসিগী রানীনা তোংশিল্লমই। ময়াই থংবা ভারত অমসুং পাঞ্জাবতসু সিফাইশিং লাল হৌখি।
কলিকাতা মপান্দা মফম কয়াদা সিফাইশিংনা লালহৌখি-বীরভূম, বাকুরা, যশোহর, কৃষ্ণনগর, মালদহ, ঢাকা, ফরিদপুর, বীরগঞ্জ, ত্রিপুরা, শ্রীহট্ট, অমসুং চিটাগোং নচিংবা মফমদা। মসিনা বেঙ্গলগী ৱাফম্নি।
আসামদনা মতম অসিদা করম তৌরি? ১৮৫৭ ইংগী সিফাই লালহৌবা মতমসিদা দিবান মনিরাম কলিকাতাদা লৈরমই। মহাক সিফাই লাল হৌবশিঙনা তিন্নরগা বৃটিশকী মায়োক্তা লালহৌনবা শেম শারম্মী। মহাক্না আসামগী অচৌ অশাংশিংদা চিঠি থারমই-১৮৫৭ ইংগী থা পানখৎলকপা ৮নি চনবদা লালহৌগনি অমসুং আসামগী নিংথৌ মশুনিপা কন্দরপেশ্বরবু আসামগী সিংহাসন্দা থাঙ্গৎকনি। পাউ পুবা মীনা চেকশিন্দবদগী থৌশীলসি মহৈ য়ানখিদে। সরকারনা য়াম্না থুনা লাকশিনবা ঙমখি। কন্দরপেশ্বরবু কোনুংদা ফাদুনা থমখি। লুচিংবা মনিরামবু কলিকাতাদা ফাজিন্দুনা থম্লম্মী। আসামগী মতম অদুগী মরৈবাক নিংবা মচামখৈ ফাগৎতুনা বিচার তৌরম্মী। বিচারগী মতুং ইন্না মনিরাম অমসুং পিয়লী ফুকনবু ১৮৫৮ ইংগী ফেব্রুয়ারি ২৬তা পুন্না ফাঁসি তৌদুনা হাৎখি। অতৈ কয়াসু জেলদা থম্লম্মী।
কাছাড় রোমদদি করম তৌই? ৩৪ শুবা নেটিভ ইনফেন্ট্রি লালহৌবা সিফাইশিংনা চিটাগোং ট্রেজারী লুঠ তৌরবা মতুংদা ত্রিপুরাগী কোনুং আগরতলা রোমদা খোংশাল্লকখি। উদ্দেশ্যদি ত্রিপুরা ফাওরগা কুমিল্লা য়ৌবা অমসুং মফম অদুগী সিফাইশিংবু লালহৌবদা য়াওশিলহনবা, অদুদগী মথং মথং কাছাড় য়ৌরগা মণিপুর ফাওবা লালহৌবগী ঈরাং থোকহনবা অসিনি। বৃটিশনা ত্রিপুরাদা লালহৌবশিং চংশিল্লকপগী পাউ হেক ফংবগা নিংথৌ ঈশানচন্দ্র মানিক্যদা লাল হৌবা সিফাইশিং অদুনা চংশিল্লকপা থিংনবা অমসুং ফানবা হায়রম্মী। নিংথৌসু ফানবা য়াথং পিরম্মী। ওয়েবস্টার সাহেবকী মতুং ইন্নদি লালহৌ সিফাইশিংদু উদয়পুর লানশিল্লক্লগা কুমিল্লা য়ৌনবা লম্বী থিংলম্বা উবদগী জঙ্গল ফাওদুনা অৱাং পানখি।
বৃটিশ সরকারনা লালহৌবা সিফাইশিংগা যোগাযোগ তৌনৈ হায়দুনা ত্রিপুরাগী নিংথৌবু চিংনখি। সিফাই লালহৌবগী পাউ অসিনা মণিপুরদা য়ৌরক্লবদা প্রজা পুম্নমক পাখৎনরম্মী। চিটাগোংদগী লাকপা সিফাই লাল হৌবশিং ত্রিপুরাগী জঙ্গল ফাওরক্লগা সিলেট তান্না লাকখি। ১৮৫৭ ইংগী ডিসেম্বরগী ২৫দা সিফাই লালহৌবশিংগা বৃটিশকী লান্মীগা লাটুদা লাল থেংনখি। সিপাইলালহৌবশিং অসিনা কাছাড়দা য়ৌরকপগা চৌরজিৎ মহারাজগী মজাইবুংঙো সনা চহী অহুম (নরেন্দ্রজিৎ রাজকুমার) সিফাই লাল হৌবদু য়াওশিল্লম্মী। মদুদা কাছাড়দা লৈবা মণিপুরী মচা কয়াসু সনা চহী অহুমগী মীংদা লালহৌবা অদুদা য়াওশিল্লম্মী। কাছাড়দা সিফাই লালহৌবশিং অসিগা কাছাড়দা হাৎখিবা সিফাই লালহৌবগী মশীং ১৮৫ নি। ত্রিপুরা অমসুং সিলেটতা হাৎখিবগী মশীংনা ৪৪নি। মখোয়দগী কাছাড়দা মুনবা নোংমৈ মশীংনা চাওরাক্না লুপা লিশিং ৩০ রোম মখোয়দগী লৌখৎলি। সিফাই লালহৌবশিংদুনা মথং মথং জিরিরোমদা লাক্লগা মণিপুর য়ৌরকপা য়াই হায়না চিংনবদগী মণিপুর পোলিটিকেল এজেন্ট মেজর মেকুলোকনা হায়জবদগী মহারাজ চন্দ্রকীর্তি সিংহনা মণিপুরী লাম্মী ৪০০ মেজর অমগী মখাদা লালহৌবশিং মণিপুরদা চংশিল্লকপা থিংননবা জিরিদা থারমই।
সিফাইশিংগা সনা চহী অহুমনা (নরেন্দ্রজিৎ রাজকুমার) লুচিংবা সিফাই লালহৌবশিং অদুগা মণিপুর ঙমখৈদা লাল থেংনরমই। হন্দক্কী লালফম অসিদা সনা চহী অহুমবু ফাদুনা মণিপুরদা পুরকখি। বৃটিশ সরকারনা কাছাড়দা সিফাই লালহৌবগী লুচিংবা সনা চহী অহুম (নরেন্দ্রজিৎ রাজকুমার সিংহ) বু মণিপুরগী মপান্দা পুথোক্লগা বিচার তৌবা পাম্লমই। মণিপুরগী ৱাংমদা পুথোকপা হায়বসি চন্দ্রকীর্তী মহারাজনা য়ানিংলমদে। মহারাজনা পোলিটিকেল এজেন্টনা ১৭৭৯ শকাব্দগী ফাল্গুনগী ১১দা ইবা চিথি অসিদগী মসি খঙবিগনি- “শ্রীয়ামবুং নরেন্দ্রজিৎ সিংবু সাহেবনা পিসিল্লু হাইবা চুম্মী…একতা ঐকী য়াম্মানী সাহেব …হাইতুনা ফারবনী লৈবাক অসিদা সাহেব লৈ অসিদা বিচার তৌতুনা লাললম লাবাদি বন্দি তৌতুনা থমচাকে ..” বৃটিশনা য়াদবদগী সনা চহী অহুমবু (নরেন্দ্রজিৎ সিংহ) কাছাড়দা বিচার তৌবা পুশিনখি মতাংসি চৈথারোল কুম্বাবদা অসুম্না ইরি-“য়ুম্না চাওবগী কুম শোক ১৭৮০, ২৯নি লৈপাকপোকপা শজিফুগী পালোক ওই। কালেন থাদি ইমকৈশনা হল্লে। ২নি শগোনশেন্দা ইবুংঙো চহি ৩ ময়াং থাজিনখিএ।”
সনা চহী অহুম (নরেন্দ্রজিৎ সিংহ) গী বিচার কাছাড়দা তৌরম্মী। কাছাড়গী অফিসিয়েটিং সুপারিন্টেন্ডেন্ট লেফটেনেন্ট আর. ষ্টেৱারীনা সনা চহী অহুমবু ১৮৫৭ ইংগী এক্ট ১৪(Act. XIV of 1957) গী মখাদা বিচার তৌরম্মী। সিফাই লাল হৌবদুদা য়াওরম্মী হায়বগী মপুং ফাবা প্রমান ফংলে হায়না সুপারিন্টেন্ডেন্ট অসিনা ১৮৫৮ ইংগী মে গী ১০ দা ফোর্ট উইলিয়ামদা লৈবা গভর্ণমেন্ট অব বেঙ্গলগী সেক্রেটারীদা ইবা চিঠিদা অসুম্না ইরি–
“The evidences against him (Narendrajit Singh) is most complete” মহাক্না ১৮৫৮ ইংগী জুন ৮দা সেক্রেটারী অসিদা চিঠি ইবদা অমুক্কা অসুম্না হায়রি- “The honor to inform you that Narandrajeet Sing, the Manipore prince found guilty by me of having joined the Mutineers of the 34th Native Infantry while in Cachar and who was swat down by me to Calcutta on the 10th May last, has lest a family of 9 wives and 7 children here behind him.”
বিচারগী রায় মতুং ইন্না সনা চহী অহুম (নরেন্দ্রজিৎ সিংহবু কলিকাতাগী আলিপুর জেলদা মতম খরা থনমই। অদুদগী সনাচহী অহুমবু আন্দামানদা থাজিনখি। মণিপুরী মচাশিংগী মনুংদা সিফাই লালহৌবা য়াওখিবা অসি মরু ওইনা সনা চহী অহুম (নরেন্দ্রজিৎ সিংহ)নি।
সিফাই লালহৌবা অদুদা বৃটিশ সরকারগী মতেং পাংখিবা অদুগীদমক মহারাজ চন্দ্রকীর্ত্তি সিংহদা ড্রেস অব ওনার অমা, থাং অমা অমসুং খ্বাংলি অমা ১৮৫৯দা পিখি। অদুগী মথক্তা সিফাই লালহৌবা নমথনবা হোৎনখিবা মৈতৈ ফম্নাইবা ৮দা চিংঙাখম্বা পুখ্রম্বা, চিংঙাখম্বা দেৱান, নেপ্রা শেলুংবা, লাইরিক য়েংবা হঞ্জবা অমসুং গোকুল ঠাকুরদা রোফ অব ওনার পিখি। সিফাই লালহৌবা অদুদা লাল শোক্নবা য়াওখিবা মেজর রোমাসিংহদা বৃটিশ সরকারনা ‘মিউটিনি মেটাল’ পিখি।
(রাজকুমার শ্রীস্নাহল সিংহনা ইবা ৱারেং অসি ‘শরৎকী ঈচেল’দগী লৌখৎচবনি)
কর্টেসি – মরূপ
0 কমেন্ট:
কমেন্ট তৌবিয়ু