• 794
• ২রা এপ্রিল ২০২৩ ইং
• Share on:

সনামহি শঙলেন অমদি শোন্নাপুং শানবগী উরেপ উয়ুং তমখ্রে

ইম্ফাল, এপ্রিল ১ : লাইনিংথৌ সনামহি লাইনিং লুপ,  কোনাগাঁও বাংলাদেশনা শীন্দুনা লাইনিংথৌ সনামহি টেম্পল বোর্দ (এলএসটিবি) মণিপুরগী মেম্বার সেক্রেটারি মাইস্নাম শিবদত্তা লুৱাংনা অথোইবা মীথুং ওইদুনা ঙসি অনিরকশুবা ওইনা মীংখৈ লৌবগী থৌরম য়াওনা সনামহি শঙলেন অমদি সোন্নপুং শাবগী উরেপ উয়ুং তমখ্রে।

লাইনিংথৌ সনামহি লাইনিং লুপ  কোনাগাঁও, বাংলাদেশকী ভিপি কৈশাম মোনিন্দ্রোনা থৌরম মপু ওইদুনা পাঙথোকখিবা থৌরম অদুদা সঙ্গিৎ নাটক একাদেমি এৱার্দি সৌগ্রাকপম হেমন্ত এলাইজ ওজা তোলহন অমদি এলএসটিবি মণিপুরগী পীবা লোইশঙ থৌবু, য়েন্দ্রেম্বম নন্দো লুৱাং, মিষ্টার ৱার্ল্ড ২০১৪ না অখন্নবা মীথুংশিং ওইনা শরুক য়াখি।

পাঙথোকখিবা থৌরমগী তাংফম অমা

থৌরমগী শরুক অমা ওইনা এলএসটিবি মণিপুরনা শকখঙচে পীদুনা থবক থৌরমশিং পাঙথোকপা হৌবগী অয়াবা পীখি। থৌরম অদুগী অথোইবা মীথুংলেন ওইখিবা মাইস্নাম শিবদত্তা লুৱাংনা হায়, লমদম অসি ঙল্লিঙৈ মতমদগী মরৈবাকপু নুংশিবা অমদি মাঙখিগে তৌবা ইনাৎ লাইনিংগী ময়ামদা ইনোৎ পীফম মরুওইবা মফমনি হায়বসি খঙবা ঙম্লে। হৌজিক মণিপুরদসু সনামহি লাইনিং অসি ২০১১ সেন্সসকী মতুংইন্না চাদা ৭.৮ তা হন্থরকপদগী মণিপুরগী সিএমনা অচৌবা থৌদাং লৌবীদুনা মাইনোরিটি ওইনা শকখঙবীনবা মরী লৈনবা ডিপার্টমেন্টতা চে থাখ্রে। মদুনা করিগুম্বা শকখঙবীরক্লগদি মৈতৈগী মশিং অসি হেনগৎলক্কনি।

সনামহি লাইনিং অসি মীকোক থিবা সেন্সস কোদ য়াওদবদগী আদারসতা মেনবা অসি কোক্নবা সনামহি রিলিজনগী সেন্সস কোদ হাপ্নবা এসেমব্লিদা পুখৎখ্রে। ইশাগী মীং থোনবা য়াওনা ইরোলদা কৌবীদুনা মীংগী মনিংদা ইশাগী য়েক সলাই খঙনা হাপ্তুনা শক তাক্নবা আপিল তৌরক্লি। লোয়ননা সনামহি শঙলেন অমদি সোন্নাপুং অসি শাবা হৌনবা এলএসটিবি মণিপুর অমদি মীয়াম্না হৌজিক ফাওবদা তেংবাংবীরকপা অপুনবা লুপা ১,৯৬,০০০ সু খুৎশিন্নখি।

শঙলেন অমদি সোন্নাপুং অসি শানবগী মীয়ামগী তেংবাং লৌনবা শৌগ্রাকপম হেমন্ত এলাইজ ওজা তোলহন, রঙ্গিলাল অমদি হেপি রাজেননচিংবা য়াওনা শেমখিবা ফান্দ দ্রাইব কম্মিটিনা মখা তানা তেংবাং পীদুনা অথুবদা শঙ্গানবা হোৎনমিন্নসি হায়বা ৱাফম থমখি। শঙলেন অসি অহিংবা শঙলেন ওইহন্দুনা বাংলাদেশতা সনামহি লাইনিং মীতিং হেনগৎহন্দুনা ঈগী পল চেকশিন্না ঙাকপীয়ু হায়খি। লাইনিংথৌ সনামহি লাইনিং লুপ কুনাগাওন বাংলাদেশকী ভিপি কৈশাম মোনিন্দ্রোনা লাইনিং লাইশোনগী থবক থৌরম অসি মপুং ফানা লৈনবা শক শোন্নবা অমদি অমাইবা অমাইবীশিং থম্বীনবা এলএসটিবি মণিপুরনা হোৎনবীয়ু হায়খি।

সোর্স: সঙাই এক্সপ্রেস