• 9
• ২৬শে অগাস্ট ২০২৪ ইং
• Share on:

শ্রীকৃষ্ণ জন্মাষ্টমী -- -বি ইবোতোন শর্মা

শ্রীকৃষ্ণ জন্মসি থৱান থাগী নিপান্নি কোনবদা মারেমগী হিন্দু পুম্নমক্না ইরাৎ থৌনিবগা লোয়ননা য়াম্না থাজনা পাঙথোকপা শেংলবা থৌরম অমনি। হায়রিবা নুমিৎ অসিদা তেংবানবা মপু মহাক্না মীওইবগী শক্তম লৌরগা অবতা তৌরকসিগী থাজনা লৌনরিবা পুরাণগী ৱারীদি অদুঙৈ দ্বাপর যুগ লোয়রমদাইদা মালেম পৃথিবীসিদা মীনুংশি য়াওদ্রবা তমথিরবা হিংচা য়াইতম্বা ময়ামসিনা ওৎ-নৈবদা অচুম্বা লম্বীদা চৎচবা পামজবা মীওইশিংনা অৱাবা কয়া খাঙদুনা হিংলিবদুগী মওং অদু উবদা পৃথি ইমাসিনা শনবীগী শক্তম লৌরগা ব্রহ্মলোক্তা চৎখিদুনা লৈশেম্বা মপু ব্রহ্মদেবতাদা করি করম তৌরগা মরাল লৈজদ্রবা ময়াম্না ৱারিবসিদগী কোকহনবা ঙমগনি হায়না হংজরকপদু তাবদা ব্রহ্মদেবন হায়রকই মসিবু কোকহনবা ঙমগদবদি শ্রীহরি বিষ্ণতনি। অদুনা ঐখোয় পুম্নমক মপু মহাক্কী মফমদা চৎতুনা হায়জরুসি হায়দুনা লাকখি।

শ্রীহরি বিষ্ণুগী মফমদা পৃথি ইমাসিনা মালেম লৈপুংসিদা নৎত-নৎতবা য়েংহৈদবা থৌদোক কয়া তৎতনা থোক্লিবসি উবদা য়েংদুনা লৈবা ঙমদ্রে, অসিগুম্বা ময়াম অসি পুবদা ৱারে অদুনা মসিদগী কোক্নবা উপায় অমতং তৌবিয়ু হায়না হায়জরকই। অদু তাবদা তেংবানবা মপু শ্রীহরি বিষ্ণুনা মালেম পৃথিসিদা ওৎ-নৈবা ফৎতবা থৌদোক থোকহল্লিবা পুম্নমকপু মাঙহন্দুনা অচুম্বা চৎপা পামজবশিংনা ইংনা-তপ্না চনিং তানা হিংজবা ঙম্বা সংসার অদু ওইহনবগী মতম য়ৌরে লোয়ননা কৈশুম শঙদা লৈরিবা দেবকী বাসুদেববুস মখোয়না মতম কুইনদগী ঐহাকপু মচা ওইনা ফংজগে নীংজরকপদুসু থুংহনবগী মত ওইরে হায়দুনা মপু মহাক্কী মপুং ফারবা গুণ পুম্নমক্না পুল্লগা শ্রীকৃষ্ণ অবতার অসি তৌখিবনি।

অসুম্না শ্রীকৃষ্ণসি মীওইবগী শক্তম লৌরগা কৈশুম শঙদা পোকপা অদুদগী অমুক নন্দ নিংথৌগী মনাক্তা পুখিবগী মরমদি কংসনা হাৎননবা ঙাইদুনা লৈরিবদুগী থৈদোক্নবা ওইনা। অদুবু মতুংদা পাওসি কংসগী নাকোংদা য়ৌখ্রবদা মহাক্না তংথীরবা হিংচাবা হিংচাবী কয়া কয়া থারক্তুনা অঙাং ওইরিবা শ্রীকৃষ্ণবু হাৎননবা হোৎনখিবশিংদু শ্রীকৃষ্ণনা করম্না চাইনখিবা লোয়ননা মখোয়দুবু মাঙহনখিবগী অঙকপা অকিবা থৌদোক কয়াদুনা তাকপদি মহাকসি ইচম চম্বা অঙাং নত্তে হায়বসি তৎতনা উৎলি।

অমরোমদসু মমা যশোদানা লৈপাক চাবা শাজিন্নরগা ময়া কাথোকহনবদা মালেম পুম্নমক উবা ফংহনখিবা। অদুবু মমানা মহাক্কী মচাসি তেংবানবা মপুনি হায়বসি খংখ্রবদি মচা ওইবগী নুংশিবদু মাংখ্রনি হায়বদগী মদু অমুক মমাদা কাওথোকহল্লি। ইন্দ্রদেবকী চাংয়েংদা ব্রজবাসী শিংবু কন্দবা য়াদে হায়বদগী গোবর্দ্ধন চীঙবু থাগৎতুনা ময়ামগী অৱাবা কোকহনবিবা। অসিগুম্বা কয়াসিনা মহাক অসি থোইদোকপা হেন্দোকপা ঈশ্বরগী গুণ চেনবা অঙাং অমনি হায়না মতম মতমদা উৎলবসু মহাক্কী ইচম চম্বা অতৈ অঙাং ময়ামদুগা শান্নমিনবা, ষন শেনবা চৎপা অদুগা সোমদমুক মাখন হুরানবা নচিংবা লমহেনবা থবক কয়া থৌবদুদা লৈকাই ময়াম্না শাওনিংবা পোক্নবসু মহাক্কী মতম পূম্নমক্তা হরাও তয়াম্না করিমত্তা খন্দবা নুংনাংদবা মওং অদুদা মহাকসি তশেংনা ঈশ্বরগী গুণ চেনবা ওইরিদ্রা হায়বদু মতম অদুগী মীশিংনা চপচানা লৌশিনবা ঙমদে।

শ্রীকৃষ্ণনা মালেম অসিদা মীওইবগী মপোক লৌরগা লক্লিবসিগী মরম লোয়ননা তুংদা লাক্কদবা মীরোলশিংদা করম্না অচুম্বা লম্বেলদা পুন্সি খোঙথাং থাংনবগীদমক পীরম্বা পাউতাকশিং মহাক্কী শ্রীমদভাগবদ গীতাদা তাকপীরম্মী। শ্রীকৃষ্ণনা গীতাগী ৪শুবা তাংকক্কী অহানবা শ্লোকতা অসুম্না হায়-‘ঐহাক্না নীতি শাস্ত্র, যোগ শাস্ত্র হায়বদি হৌন-পথাপ চৎন খুল্লোন অমদি যোগী অমগুম ৱাখল পুক্নিং লৈতানা থবক থৌরম তৌবা মতমদা মশাগী অমাঙ-অতোং অমত্তা য়েংদনা থম্মোয় শেংনা সেবাগী ৱাখলদা পাঙথোক্কদবনি হায়বসি ইহান হানবা নুমিৎতা তম্বীখি।

অদুদগী নুমিৎনা অমুক মথং মথং তম্বীরকপনি।’ মদু তাবদা অর্জুননা ‘হে মপু ইবুংঙো নহাকতি হৌজিক্কী ওইরিবা মপোক অসিদা পোক্লগা করম্না মীহৌরোলদগী লৈরক্লবা নুমিৎতা হায়রিবা জ্ঞানশিং অসি তম্বীখিবনো?ৎ মদু তাবদা শ্রীকৃষ্ণনা তাকপীরকই ‘অর্জ্জুন নহাকতি হৌজিক ওইরিবা মপোক অসিগী ৱাদুতনি নীংশিংলিবা, ঐহাকতি অসিগুম্বা ৱাখল্লোন অসি মপোক লিশিং লিশিংদগী মতম মতমগী মথৌ তারকপদা তম্বীদুনা লাক্লিবনি। অদুনা মসিগী হৌনবী চৎনবী পথাপশিং অসি মীওইবা খুন্নাইসিদা হেক কায়রকপদা হায়বদি মমা-মপা, অহল লমনদা লৌনা লোনচৎ মশক খংলকত্রবদা, অখং অহৈ গুরুগী মফমদা থকসি খাসি থৌগল্লোন য়াওরকত্রবা, অশোন অনা, লৈ লাইরবশিংদা মীনুংশি লৈত্রবা, অফবা অচুম্বদা চৎচবশিংগী মফম লৈরকত্রবা শম্না হায়রবদা থবক তৌবা মতমদা সেবা হায়বগী ৱাখল য়াওরকত্রবা মতম অদুদা ঐহাক হায়রিবা ফৎতবা পুম্নমক অসি মাঙহল্লগা চৎপা মীওইশিংনা চনিংতানা হিংজবা ঙম্বা সংসার অদু ওইহন্নবগীদমক মতম মতমগী ওইনা শায়োনসি লৌবনি।

শ্রীমদ্ভাগবদ গীতাদা য়াম্না মরু ওইবা পীরিবা পাউতাক্তি মীওইবা খুন্নাইগী পুন্সিদা খ্বাইদগী মথৌ তারিবদি মশাগী থৌফম থোকপা মথৌ হায়বদি কর্ম অদু তৌবসিনি। মালেম অসিদা কর্ম হায়বসি মশাগী শিনফম ওইবা, মদুগী থৌদাংসু পুরিবা তৌফম থোকপা মথৌ অদুবুনি। অদুনা থবক অদু হেনফদবা ওইবনা মদুদা মশাগী অপাম পামদা লোয়ননা মদুদগী ওইরক্কদবা ফল হান্ননা খন্দুনা মশাগী থৌদাংদুদগী নীঙহন্নবা চুমদে। মরমদি অর্জ্জুননা মহাক্কী মরি-মতা, মরূপ মপাং, খংন চান্নবশিংদুগা লান শোক্নবা ঙম্লোয় হায়রকপা অদুদা শ্রীকৃষ্ণনা অসুম্না পাওমেল্লকই’ নহাক নিংথৌ মচানি, অচুম্ববু ঙাক্না চৎনবা হোৎনবা নহাক্কী থৌদাংনি। অরানবা নত্তবা তৌবিশিংবু মাইথিবা পীদ্রবদি মখোয়না সংসার অসিদা তৌনিংবতা তৌরক্কনি। অদুগা নহাকসু মখোয়গুম নৎতবা লম্বী চৎপা তারনি লোয়ননা নহাক্না নশাগী থৌদাং তৌদদুনা অতোপ্পা অচুম্বা লম্বী থীরিবদুসু অরেম্বা ওইগনি। অদুনা কর্মভুমিদগী কৈদৌঙৈদা মায় লৈথোকফম থোক্তে। মীয়ামগী য়াইফা মঙ্গল ওইগদবা থবক অদু তৌবদা নশাগী কান্নবা কান্নদবা য়েদদুনা লৈজবা শক্তি শীজিন্নদুনা মাংজিল থানা চোংথোরক্কনি।

মীওইবা কাঙলুপকী ওইনা মতম পুম্নমক্তা অমাংবা ওইগদবা থৌদোক ৱাথোক্তসু ঙম্বা মখৈ থোকহন্দনবা হোৎনগদবনি। হায়বদি দ্রৌপদিবু রাজসভা মমাংদা ইকাইব পীনবা নুপী ওইবগী ইজ্জৎ মাঙহন্নবা হোৎনরকপা মতম অদুদা সভাদুদা ফমলিবা অদুগা মদুবু থিংবা ঙম্বগী শক্তিসু লৈরিবা ভীষ্মনা মহাক্কী ৱাশক কাইহনবা য়াদে হায়দুনা মখুৎ মশা প্রোক প্রোক থেক্লগা অসুম য়েংদুনা লৈখিবদু চুমদবনি।

অদুনা অর্জ্জুন কর্মযোগী হায়বদি তৌফম থোকপা থবক্তা নশাগী ওইজবা অমদি অমাং অতোং য়েংলোইদবনি হায়খি। অসিতা নত্তনা ঐখোয়না কর্ম তৌরিবসি সংসার মীওইবা হিংননবগী তঙাইফদবনি লোয়ননা মীওইবা ঐখোয়গী হকচাংসি ফনা নীংথিনা থম্বগীদমকসু থবক অসি শুদ্রবা য়াদ্রবনি। হায়বদি ঐখোয়না কর্ম হায়বদি থবক অসি শুদ্রবদি হকচাং অসিসু ফনা থম্বা ঙম্লোয় হায়বসি মতম অদুদা শ্রীমদ্ভাগবদ গীতাদা তাক্লম্বনি। (তাংকক-৩/৮)।
অদুনা মাইকৈ পুম্নমক্তগী য়েংলগা মীওইবগী পুন্সিদা কর্ম তৌবা হায়বদি মশাগী তৌফম থোকপা থৌদাং মপুং ফানা তৌনবা হোৎনবা লোয়ননা মীওইবা খুন্নাইগীসু কান্নবা য়েংদুনা শোয়দনা তৌফম থোকপনি হায়বসি থাদোকপা য়াদ্রবনি হায়বসিগী মরমদা শ্রীকৃষ্ণনা অসুম্না হায়রম্মী। -‘মালেম অসিদা ঐহাক্কী পুকৈদা অৱাৎপা অমত্তা লৈতে, মসিদা অমুক হাপচিন্নিংঙাইসু লৈতে, অদুবু ঐহাক মীকুপ অমত্তা লেপ্তনা থবক শুই। মরমদি ঐহাক্না মীকুপ অমত্তং লেপ্পদা মালেম অসিগী অমাংবা ওইগনি। অদুনা ঐহাক মারেম অসি য়াম্না নুংশি।’

মসিনা তাকপদি ঐখোয়গীদি অৱাৎপগী অৱাৎপা ঙাক্তনি। অদুনা ইশা ইশানা মশক খংনা তৌফম থোকপা থৌদাং তৌবগী লোয়ননা ঐখোয় অমগা অমগা নুংশি চান্ননা পুকচেল শেংনা থবক তৌবসিনা ইশাগী হিংনবা ওইবা অদুগা ময়ামগীসু কান্নবা ওইদুনা পুন্না হিংমিন্নবা অসিনি।

(মথং মথং)