শিল্পগুরু অমসুং নেসনেল এৱার্দ জি শান্তি অমসুং এম নলিনীদা এৱার্দ পীরক্লে
নভেম্বর ৩০: লৈবাক অসিগী হেন্দিক্রাফ্ত আর্তিসানদা পীবা লেমজনিংঙাই ওইরবা খ্বাইদগী চাউবা মনা শিল্প গুরু অমসুং নেসনেল এৱার্দ অসি অৱাং নোংপোক্কী ওইনা মণিপুরদগী আর্তিসান অনী জি শান্তি অমসুং এম নলিনীনা ফংলে।
মিনিস্ত্রি ওব টেক্সটাইলসনা শীন্দুনা নিউ দিল্লীগী বিজ্ঞান ভবনদা ২০১৭-১০১৮ অমসুং ২০১৯গী ওইনা এৱার্দ য়েন্থোকখিবা অদুদা মণিপুরদগী গুরুময়ূম শান্তি দেবীদা ২০১৮ গী শিল্প গুরু এৱার্দ অমসুং মাইস্নাম নলিনী দেবীদা ২০১৯ গী নেসনেল এৱার্দ অসি ইন্দিয়াগী ভাইস প্রেসিদেন্ত জগদীপ ধনখর অমসুং তেক্সতাইলস, কম্মার্স এন্দ ইন্ডাস্ত্রিজ মিনিস্তর পিয়ুশ গোয়ালনা খূৎশিন্নখি। এৱার্দশিং অসিদা সাইতেসন, শেলগী মনা, তাম্রপত্র, সাল অমসুং গোল্ড মেদেল য়াওরি।
ইং ২০১৮ গী ওইনা শিল্প গুরু এৱার্দ অসি পীনবা আর্তিসান তরা খনগৎপগী মনুংদা মণিপুরগী কালীমাই মন্দির, য়াইস্কুল পুলিস লেনদগী গুরুময়ুম শান্তি দেবী, মপুরোইবা লবুকতোংবম চাওবা শর্ম্মা য়াওরকখিবনি। আর্তিস্তিক তেক্সতাইলসকী মনুং চন্না মহাক্কী লুহোং ফিজিন, খামেন চৎপা অমসুং লমথাং খুলক ক্রাফততা শিল্প গুরু এৱার্দ অসি শান্তিদা খূৎশিন্নরকপনি। মহাক অসি মণিপুরগী ওইনা শিল্প গুরু এৱার্দ ফংবা ৩ শুবা আর্তিসান্নি। শান্তি ২০০৬ তা ইন্দিয়া গভর্নমেন্তনা পীবা নেসনেল এৱার্দসু ফংখ্রবী আর্তিসান্নি।
অমরোমদা, ২০১৯ গী ওইনা নেসনেল এৱার্দ অসি পীনবা লৈবাক অসিগী আর্তিসান ৩১ খনগৎপগী মনুঙদা মণিপুরদগী মাইস্নাম নলিনী য়াওরকখি। ৱাংখৈ য়োংলান লৈরক্তগী লৈখিদ্রবা এন রোমি সিংহগী লোয়নবী এম নলিনীবু ইন্দেঞ্জার কেতেগোরিদা মহাক্কী শাফি-লানফি ক্রাফ্টতা নেসনেল এৱার্দ অসি খূৎশিন্নরকখিবনি। এম নলিনীবু শাফি-লানফি ক্রাফ্ট অসিমক্তদা মণিপুর গভর্ণমেন্তনসু ২০০৮-০৯ দা স্তেত এৱার্দ খূৎশিন্নখ্রবী আর্তিসান অমনি। থৌরম অদুদা মিনিস্ত্রি ওব তেক্সতাইলসকী সেক্রেটারি রাচনা শাহ, মিনিস্ত্রি ওব তেক্সতাইলসকী দিবেলপমেন্ত কমিশনার (হেন্দিক্রাফ্ট) শান্তমনু অমসুং মিনিস্ত্রি ওব তেক্সতাইলসকী এদ্দিসনেল দিবেলপমেন্ত কমিশনার (হেন্ডিক্রাফট) মুদিতা মিশ্রাসু শরুক য়াখি।
লমদম অসিগী আর্তিসানশিংনা ক্রাফতশিং য়োকখৎনবা লৌরিবা থৌদাং অসিবু শকখঙবীদুনা মনা খূৎশিন্নকপগীদমক্তা গভর্ণমেন্ত অমসুং মরী লৈনবা খুদীংমকপু গুরময়ুম শান্তি অমসুং মাইস্নাম নলিনী অনীনা থাগৎপা ফোঙদোরক্লি।
সোর্স: পোক্নফম
0 কমেন্ট:
কমেন্ট তৌবিয়ু