• 628
• ৩রা মে ২০২৫ ইং
• Share on:

শান্তিবু ইখৌ লাংলিবা কবি খোইস্নাম মংগলগী শৈরেং লাইরিক ‘ঐগী লৈকাইগী ৱারী’- লাইরিক অসিদা মীৎয়েং অমা -- তোংব্রম অমরজিৎ

মীওইবদি লান পামদে। মীচম মীয়ামদি শান্তিবু ইখৌ লাংদুনা মতম খুদিং লৈরি। লান পাম্লিবশিংদি লানবু শেন্দোং তানবদা খ্বাইদগী নুংঙাইবা শিনফম অমগুম খল্লিবা শক্টিতবু মীকাবা লৈবাক্কী অঙম অথৌশিংনি হায়বসি থোক্লিবা মালেমগী তম্থিবা লাঞ্জাওশিংগী তাহৈ উহৈদ্রবা থৌদোকশিংনা লেংদ্রবা খুদম ওইরি। লৈবাক মশেল মরক্তা লৈনুংগী খোনিগীদমক্তা মিকানদুনা অসিদা হি য়াই মুন্নবগী শক্তি উৎনবা অমদি লোইলম লৈঙাকনা অশোনবা লৈবাক অমদি মীয়াম্বু শক্তি লৈবা মখোয়গী মখাদা থম্নিংবদগী লান কয়া লেপ্তনা থোক্লি ঙসিসু। রুসিয়া-য়ুক্রেন লান লোয়দ্রি। ... ঐখোয় মীওইবসি কনানা কনাগীসু য়েকনবা নত্তে। অমনা অমবু খঙনদবা, উনদনা, ৱারী ফাওবা শাদনা হেক্তা লান্দা মীওইবা মশেল অমম্বা অহিংবা করিগী ঐখোয় অমগা অমগা ওনশিন্নদুনা নোংমৈ কাপ্নগনি। মসি অরানবা মিৎয়েংনি অমদি মসিদা মালেমদা কৈদৌঙৈদা শান্তি পুরকপা ঙম্লোই। কবি মংগলসু শান্তিদা থাজবা থম্লি।

লাইরিক্কী মমিং- ঐগী লৈকাইগী ৱারী(২০১৬)
অইবা- খোইস্নাম মংগল
অফোঙবা- অশাংবা কমিউনিকেশন, ইম্ফাল
লাইরিক্কী মখল- শৈরেং
লাইরিক্কী মমল- লুপা ২০০/-
লমায় মশিং- ১৪০ (মৈতৈ ময়েক য়াওরগা)

খোইস্নাম মংগল, মমালোন অমদি সাহিত্যবু য়াম্না নুংশিনা হৌরকখি। চাওরাকনা ১৯৮৯ অদুৱাইদগী মণিপুরী সাহিত্যদা খোঙদাদুনা মমালোনগী থৌগল তৌদুনা লাকপা হৌরকখি। মরু ওইনা শৈরেং, ৱারেং ৱারীমচা ইদুনা লাক্লি। তোঙান তোঙানবা মনিপুর মপালদা ফোংবা সাহিত্যগী চেফোঙশিংগী ইদিটর ওইদুনা ঙসিসু অদুমক ইমালোলবু হেন্না থাক ৱাংনা পুখৎনবা হোৎনরিবা অইবনি। মণিপুরী সাহিত্য পরিষদ ত্রিপুরা, মণিপুরী লেংগুয়েজ এন্ড লিটরেরী ফোরম, খোয়াই ত্রিপুরা, মণিপুরী সোর্ট স্তোরি সোসাইটি ইন্দিয়া, ত্রিপুরা চেপ্টর, শ্রীশ্রীরাধামাধব সেবা কমিতি অসিনচিংবা কয়াগা পুন্না থবক কয়া তৌমিন্নদুনা চৎলি। ফোঙখ্রবা লাইরিকশিংদি (১) মৈতৈগী শীংলিদা মিহুল চোংদ্রে (রাইম) (২) মালেমগী লৈমায়দা মণিপুরীশিং (ৱারেং সম্পাদনা) অসিনচিংবনি।

মনিপুরগী ৱাংমদা খুন্দা লৈতাদুনা লৈরিবা ঈগী মরি ইচিল ইনাওশিং, লাই গুরু অহল লমন, ইপা ইতোন, ইচে ইনেমশিং মখোয়গী চরোল শুরোল কয়ানা ঙসিসু মনিপুরী অমা ওইনা মৈতৈ অমা ওইনা ইমালোল অমদি ইজাতি অসিগী চৎনবী থাজনবী লাইনিং লাইশোল ঙাকনা চাওথোকচনা হিংলি। ঐখোয়গী ইনাকখুল্লবা লোল অমদি ময়েক লৈজরম্বা অসিনা হেন্না অমুক্কা মতিক ময়াই লৈহল্লিবনি ঙসি। মনিপুরী খোরিলোলগী পুক্কৈদা মপাল মনিপুরী অইবশিংগী খুদোল শিংথানিংঙাইনি। থেংলবসু থেংনা মপাল মনিপুরী দাইস্পোরাগী ওইবা ইহৌশিং মনিপুরী খোরিলোলদা চাওনা মমি তাদুনা ঙসিদি নিংথিরবা লৈকোল অমগুম লৈশাৎ তম্লকলি। হায়রিবা অইবা অইবীশিং অসিগী মরক্তা খোইস্নাম মংগলসু মশাগী ওইবা খুৎই স্তাইল অমা শেম্নবা হোৎনরিবা অমদি মনিপুরী শৈরেংগী ঈচেলদা য়াওরিবা অইবা অমনি। মহাক্কী শৈরেংদা মনিপুরী খুনাইগী মশক, কন্তেম্পরেরি ইসুশিং, লৈবাক নিংবা থিম অসিনচিংবা কয়া ইরকপা থেংনৈ। অইবা মংগলগী ‘ঐগী লৈকাইগী ৱারী’ হায়না মিংথোনবা শৈরেং লাইরিক অসিদা পুন্না শৈরেং ৩৫ য়াওরি।

খুনাই অমদা নুপীশিংবু থাক ৱাংনা খল্লিবা অমদি মখোয়বু ইকায়খুম্নবগী মতিক খুনাই অদুনা হিরম কয়াদা লমজিংদুনা অফবা ফিদম্নিংঙাই ওইবা লম্বেল অমদা পুবা ঙমই হায়বসিদা থাজবা থমদুনা নুপীশিংদা, চনু নিংঙোলশিংদা, য়ুমগী য়ুম্বুরেম্বীশিংদা মীকপ থোকপা য়াবা পাউজেল লোয়নবা কবি মংগলগী শৈরেংনি ‘নুপী’। লাইরিক অসিগী হেক ইহান হানবা শৈরেং অসিদা কবিনা নৌহৌননা নুপীশিংদা পুকনিং ৱাখল শোন্থবা য়াদে হায়বা ৱাখল্লোন্দা ইরক্লি, “নুপী নঙ কিগনু ঙসিদি/ মান্নবগী অধিকার পীরবনি।/ নশাগী ফিদা নখুৎনা থাজরো পাকনা/ নঙদি মমানি তাইবঙ শেম্বীনি/ শিতোকউ মঙ ৱাখলগী শুমজিৎনা…কোকথক্তা অতিয়া,/ নুমিৎ থা থৱানমিচাক/ খঙঙু নঙগীসু শরুক য়াওরিবনি…” (লাঃ ১১) নুপীনা লাইরিক হেন্না তম্লগা করি তৌদোইনো হায়নরম্বা, নুপী পোকপদা কয়া হরাওরমদবা, অমদি নুপীবু থাক ৱাংনা লুম্না খল্লমদবা অখুবা মিৎয়েং, নুপীদি ভোট থাদবা য়াদে অসিনচিংবা অরানবা ৱাখল পুম্নমক শৈরেং অসিনা কাউন্ট তৌদুনা অহেনবা থৌনা অমদি ইথিল পীরি।

মীওইবদি লান পামদে। মীচম মীয়ামদি শান্তিবু ইখৌ লাংদুনা মতম খুদিং লৈরি। লান পাম্লিবশিংদি লানবু শেন্দোং তানবদা খ্বাইদগী নুংঙাইবা শিনফম অমগুম খল্লিবা শক্টিতবু মীকাবা লৈবাক্কী অঙম অথৌশিংনি হায়বসি থোক্লিবা মালেমগী তম্থিবা লাঞ্জাওশিংগী তাহৈ উহৈদ্রবা থৌদোকশিংনা লেংদ্রবা খুদম ওইরি। লৈবাক মশেল মরক্তা লৈনুংগী খোনিগীদমক্তা মিকানদুনা অসিদা হি য়াই মুন্নবগী শক্তি উৎনবা অমদি লোইলম লৈঙাকনা অশোনবা লৈবাক অমদি মীয়াম্বু শক্তি লৈবা মখোয়গী মখাদা থম্নিংবদগী লান কয়া লেপ্তনা থোক্লি ঙসিসু। রুসিয়া-য়ুক্রেন লান লোয়দ্রি। নোংপোক নোংচুপ অনীগী কোল্ড ৱার ৱারোইশিন লাকপা লৈতে। পীক্লবা চীংলৈবাক্কি ইরমদম মনিপুরদসু লানদি হৌজীকসু মকা ফোংদনা তৌরি। ফোং ফোং শারি ২০২৩গী মে ৩গী কাংলুপ ফুরুপ অনীগী লান। মীওই কয়া রিলিফ কেম্পতা লাঞ্জেন্নদুনা হিংলি মিৎলু পীরাং কংদনা। লৈঙাকনা থৌশিল শোয়বদগী ওইরগদরা ঙসিসু মীয়াম্না তংদু লৈতানা হিংবা ঙমদ্রি। ইংলিস কবি James Kirkup না ১৯৬৬তা ফোংখিবা শৈরেং ‘No Men are Foreign’ মতাংসিদা নিংশিংদবা ঙমদে। ঐখোয় মীওইবসি কনানা কনাগীসু য়েকনবা নত্তে। অমনা অমবু খঙনদবা, উনদনা, ৱারী ফাওবা শাদনা হেক্তা লান্দা মীওইবা মশেল অমম্বা অহিংবা করিগী ঐখোয় অমগা অমগা ওনশিন্নদুনা নোংমৈ কাপ্নগনি। মসি অরানবা মিৎয়েংনি অমদি মসিদা মালেমদা কৈদৌঙৈদা শান্তি পুরকপা ঙম্লোই। কবি মংগলসু শান্তিদা থাজবা থম্লি। অদুনা ইরক্লিবনি, ‘শান্তিগী পাউজেল’
“ লান কৌবা লাইসিগী মনাক্তা/ চঙখিবা লান্মি পুম্নমক/ কনাসু থোরকত্রি/ ঙসি ফাওবা হিংনা…কাইখুমফি শাবদা মপুম থীৎলবা/ মমাশিংগী থম্মোয়দা/ থৌনাগী মৈরা চুখৎলমগনি…হু য়ানশিল্লবা লমদমসিগী/ ঈশিং নুংশিৎ অখাবা মরক্তা/ হঙ্গর স্ত্রাইক প্রোটেস্ট রেল্লি/ বন্দ কার্ফ্যু/ নোংমৈ মখোল অমা/ অশিবা অমা/ পুঙৌ ফনেক মিৎলু পিরাং/ চৎনবী ওইরিবা লমদমসিদা/ ফুঙ্গাগী ৱামৈগুম মুৎপা নাইদনা চাক্লিবা/ মৈতৈগী পোৎলোইফমদা মৈ/ প্রেমগী পিরাংনা মুথৎলমগনি ঐ। …য়েকনবগী ঙকশমদা অহিংসাগী/ লীক্লাং পরেং হুকলমগনি/ শান্তিগী পাউজেল পুদুনা লাক্লিবনি ঐ…” (লাঃ ১৪) মসিদা কবিনা তেংথারিবসি লমদম অসিগী নে তাদ্রবা মশক অদুনি। অদুবু কবিনদি চেৎনা থাজবা থম্লি অহিংসাদা। নুংশিবা ঈশৈ শকনিংলি শান্তিগী লেপ্তনা। অদুনা কবি মশা ওইনা থোক্লক্লি পাঊজেল অমত্তং পীরুনবা শান্তিগী মফম খুদিংদা চত্তুনা।

লাইরিক্কী মিংথোল ওইরিবা শৈরেং অসিদা কংলৈ লমদম অসিগীদমক তেংথারক্লি কবিনা থৱায় ৱাজনা। কবিগী লৈকাই অসিমক ইরমদম মনিপুরসিনি হায়দবা ঙমদে। লমদম অসিগী লোয়শিনবা ঙমদ্রবা ইরাং অমদি হিংসাগী মরমদা নিংদোল পোম্লি। পোত্থাবা ঙমজদে কবিনা। মীহাৎ মীপুন মীশি মীনা। ফেক এঙ্কাউন্তর, অফস্পা, ঙসি মীতোপ্না খুল্লিংবা, মীতোপ্না ৱায়েনবা, ইশাগী লৈঙাক লিংবা ঙমজদবগী ফিভম অমদা লাকপগুম উরক্লিসিগা শৈরেং অসিগা য়াম্না চুনরক্লি। পালেম মমা ওইবীশিংনা মচাশিংগী তেংথাবা কনানা তারিবগে ঙসি। মরাল লৈতবা চমজবা মহৈরোইশিং ফাওবা মফম খঙদনা মাংখিবদগী থিবা খঙদনা লৈবা মশিং হেনগৎলক্লি। অসিগুম্বা ফিভম অসিদা লৈবাক অসিগী হৌরক্লিবা নহারোলশিংনা করম্না তুমিন্না লৈগনি। মসি অশেংবা ৱারীদুনি কবিনা রিক্লিবা, ‘ঐগী লৈকাইগী ৱারী’ “নোংমৈগী য়াক্লবা মখোল মরক্তা/ তিনখি মেংলবা ৱাহৈ মা/ ‘ইমা’/ তফিং তফিং চেন্থোকখিবা/ মমানা থেংনরুবদা খোঞ্জেলদু/ হিপ্পদৈ অসুম তুমথরম্লে,/ ... অদুদগী কৌবা তাদনা তুম্লিবা/ মচাগী নাক্তা ফম্না/ য়াকাইরোল ঈশৈ শকই মমানা/ অরৈবা পাঙ্গল উৎনা/ নীংতম্না কনানসু অথিংবা লৈতনা…খংহৌদনা অতিয়া শিন্থুংখি/ অমুবা নোংনা/ অখাক অরাও মরক্তা/ অকিবা খঙদনা/ চেন্থোরকই অঙাং শঙ্গু শঙ্গু/ মমিৎ ঈমুক ঙাংনা।” (লাঃ ২১)
কবি খোইস্নাম মংগলগী খুৎই য়াম্না ইচং থৌই। শিজিন্নরিবা ইমেজরি য়াম্না চংখোল্লি। ফজবা শৈরেং কয়াসু লাইরিক অসিদা য়াওরি। শৈরেং লাইরিক কয়া লেপ্তনা ইবীরক্কনি হায়না থাজবা থমজরি।