শক্নাইরবী অইবী কে শান্তিবালাদা সাহিত্য একাদেমী এৱার্দ খূৎশিন্নখ্রে
ইম্ফার, মার্চ ১২ : মণিপুরগী শক্নাইরবী অইবী দাঃ কোইজম শান্তিবালাগী ‘লৈরোন্নুং’ কৌবা শৈরৈং লাইরিক অসিদা সাহিত্য একাদেমী এৱার্দ পীদুনা ইকায় খুম্নবা ঊৎখ্রে। সাহিত্য একাদেমী নিউ দিল্লীনা চহী খূদিংগী পাঙথোকপা লৈবাক অসিগী খ্বায়দগী চাউবা ‘ফেস্তিবেল ওব লিতরেচর-২০২৩’ হৌখিবা থাংজ নুমিৎতা নিউ দিল্লীগী রবিন্দ্র ভবনগী কমানি ওদিতোরিয়ামদা য়ুনিয়ন মিনিষ্টার ওব ষ্টেট কালচার, অর্জুন রাম মেঘৱালনা অথোইবা মীথুং ওইদুনা হৌদোকখ্রে।
নুমিৎ ৬নি চূপ্না চত্থগদবা ‘ৱান আর্থ, ৱান ফেমিলী, ৱান ফ্যুচর’ হায়বা থিমদা পাঙথোকপা ৩৯ শুবা ফেস্তিবেল ওব লিতরেচর অসিগী মনুং চন্না লেমজনীংঙাই ওইরবা লৈবাক অসিগী খ্বাইদগী ৱাংবা লোয়নশিল্লোনগী মনা সাহিত্য একাদেমী এৱার্দ-২০২২ লৈবাক অসিগী তোঙান-তোঙানবা লোন ২৪ গী অইবা অমসুং অইবীশিংদা খূৎশিন্নখি।
মদুদা মণিপুরগী ওইনা, ‘লৈরোন্নুং’ হায়রিবা শৈরেং লাইরিক অসিদা দাঃ কোইজম শান্তিবালাদা সাহিত্য একাদেমী এৱার্দ লান্থোকখিবনি। ইম্ফাল ইস্তকী মনুং চনবা খুরায়দা পোকখিবী দাঃ কে শান্তিবালা-হৌজিক এম য়ুগী মণিপুরী দিপার্টমেন্ততা এসিষ্টেন্ট প্রোফেসর ওইরি। অইবীসি হৌজিক ফাওবদা শৈরেং, ৱারীমচা অমদি দ্রামা য়াওনা পূন্না লাইরিক ৭ ফোঙখ্রে। অইবী অমা ওইনা মহাক্না ফংখিবা মনাশিংগী মনুংদা দাঃ খোইরোম তোমচৌ নীংশিং গোল্ড মেদল ২০০৬, মোইরাংথেম নিংথৌ নীংশিং মনা ২০১১, বাল সাহিত্য পুরস্কার ২০১১ পনবা য়াই।
মার্চ ১১দগী ১৬ ফাওবা চত্থগদৌরিবা ৩৯ শুবা ফেস্তিবেল ওব লিতরেচর অসিদা মণিপুরগী লেঙ্গুয়েজ এদভাইজরী বোর্দ, নিউ দিল্লীগী কনভেনর নোংমাইথেম কিরনকুমার য়াওনা শক্নায়রবা অইবা/অইবী কয়ানা ৱারীমচা অমসুং শৈরেংগী পেনেলিস্ত ওইনা শরুক য়ারি।
সোর্স: পোক্নফম
0 কমেন্ট:
কমেন্ট তৌবিয়ু