• 16
• ১৬ই সেপ্টেম্বর ২০২৫ ইং
• Share on:

লৈমরেম্বী ইন্দুপ্রভাগী শক্তম শাগৎপদা অচৌবা থৌদাং লৌখিবা থোইদিংজম তোম্বী ইকায়খুম্নখ্রে

ইম্ফাল, এপ্রিল ১৯ : লৈমরেম্বী ইন্দুপ্রভাগী শক্তম শাগৎনবা হোৎনবদা কত্থোকপগা লোয়ননা অচৌবা থৌদাং লৌখিবা নেসনেল এৱার্দি থোইদিংজম তোম্বীদা খুদোল তমদুনা ইকায়খুম্নবা ঊৎখ্রে।

মণিপুর লেজিসলেতিব এসেমব্লিগী স্পিকর তিঐচ সত্যব্রতনা কছারদা লৈমরেম্বী ইন্দুপ্রভাগী নীংশিং মীতম হাংদোকখ্রবা মতুং ঙসি অথৌবশিংগী লিক্লম থিবা লূপ অমসুং লৈমরেম্বী ইন্দুপ্রভা ইনস্তোলেসন কমিতি বিনাকান্দি-২ আসাম কছারনা ইম্ফাল ওয়েস্তকী খাগেমপল্লি পন্থক্তা লৈবা থোইদিংজম তোম্বীগী শঙ্গাইদা পাঙথোকখিবা থৌরম অমদা শক্নাইরিবা আর্তিস্ত অসিবু ইকায়খুম্নবা ঊৎখিবনি।

নেসনেল এৱার্দি থোইদিংজম তোম্বীনা হায়খি, ‘লৈমরেম্বী ইন্দুপ্রভাগী শক্তম অসি থোইথোইবা মঙাংনা য়েক্তুনা পুথোক্লগা মীয়ামদা শক্তাকপা অসিদা য়াম্না নুংঙাইবা ফাওই। অসিগুম্বা শীংথানিংঙাই ওইরিবী লৈমরেম্বী ইন্দুপ্রভাগী ৱারী হৌজিক্কী মীরোলদা খঙহনবা মথৌ তাই।’

অথৌবশিংগী লিক্লম থিবা লূপকী প্রেসিদেন্ত নন্দোনা হায়খি, মৈদিংঙু মোধুচন্দ্রগী মচানুপী লৈমরেম্বী ইন্দুপ্রভানা কছারগী নিংথৌদা য়ুম্বানখ্রবসু মহাক্না মপান লমদম মণিপুরদগী অৱা তান্থোক্নবা হোৎনবদা অমদি কছার লৈঙাক কন্নবা হোৎনবদা লৌখিবা থৌদাং অসিমক শীংথানিংঙাইনি।

লৈমরেম্বী অসিগী শক্তম অমা শাদুনা মীয়ামদা পুথোক্তুনা থা অসিগী ১৫দা বিনাকান্দি মীফমদা শক্তাকপা ঙম্লে। মসিনা লৈমরেম্বী ইন্দুপ্রভানা লৌরম্বা থৌদাং অদু হৌজিক্কী মীরোলনা খঙবা ঙম্লগনি। লৈমরেম্বী ইন্দুপ্রভাগী ৱারী অসি মহৈ তম্বদা সিলেবাস ওইনা হাপ্তুনা তুংগী মীরোলদা খঙহন্নবা হোৎনবা মথৌ তাই হায়না মহাক্না ফোঙদোকখি।

সোর্স: পোক্নফম