• 786
• ২৪শে মে ২০২২ ইং
• Share on:

লিসিপ্রিয়ানা ইষ্ট তিমোরগী প্রেসিডেন্ট ৱাশক লৌবদা ৱা ঙাঙখ্রে

ইম্ফাল, মে ২২ : ইষ্ট তিমোরগী অনৌবা প্রেসিডেন্ট অমদি নোবেল পীছ প্রাইজসু ফংখ্রবা জোস রামোস হোর্টাগী ৱাশক লৌবগী থৌরমদা শরুক য়াখিবা মশক নাইবা মীওইশিংগী মনুংদা মশাগী চহী তরাখক্তা ঙায়রিবী মণিপুরদা পোকখিবী ইন্দিয়াগী ক্লাইমেট এক্টিভিষ্ট অমদি এনভাইরনমেন্টেলিষ্ট লিসিপ্রিয়া কাঙুজমসু অমনি।

লিসিপ্রিয়ানা থৌরম অদুদা স্পিসিয়েল গেষ্ট ওব ওনার ওইনা শরুক য়াখি। মসি এসিয়াগী খ্বাইদগী নৌবা লৈবাক অমা ওইখিবা ইষ্ট তিমোরগী ২০লকশুবা নীংখা তম্বা নুমিৎকী নোংমা ৱা ঙাঙবগী খুদোংচাবা ফংখি অমদি অসিগুম্বা অৱাংবা থাক্কী মালেমগী থৌরম অসিদা অঙাং মচা অমদা ৱা ঙাঙনবা চেবাও পীরকপা হায়বসি অতাঙবনি। লিসিপ্রিয়ানসু পর্তুগালগী প্রেসিডেন্ট মার্সেলো রেবেলো অমদি নীংতম ঈহৌগী মতম অমগী অফাওবা লুচিংপুরেল লোয়ননা ইষ্ট তিমোরগী অহানবা প্রেসিডেন্ট জনানা গুস্মোগসু উনখি। মহাক্না ইষ্ট তিমোরগী পিএম তৌর মতম রোককসু উনখি।

খোঙচৎ অসিদা লিসিপ্রিয়ানা মণিপুরগী শুমাঙ লীলা মালেমগী ফম্বাকথক্তা থাঙ্গৎলমখি। মহাক্না ইষ্ট তিমোরগী নীংখা তম্বগী ৱারীদা য়ূম্ফম ওইবা ‘গুস্মোগী খূদোল’ লীলাগী মরমদসু মীয়ামদা পাউদম্লমখি। মখোয়গী মীয়াম লীলা অসি য়েংনবা মহাক্না পাউজেল পীখি।

তিমোর-লেষ্ট হায়নসু খঙনবা ইষ্ট তিমোর এইটিন সেঞ্চুরিদগী পর্তুগালগী মখাদা ১৯৭৫ ফাওবা লৈখি। পর্তুগালনা হনখ্রবা মতুং ঈথৎ লৈবাক অসি ইন্দোনেসিয়ানা মখোয়গী লমনি হায়দুনা অমুক মখোয়গী মখাদা ওৎ নৈদুনা থমখি। কুমজা ১৯৯৯ দা য়ু এননা নীং খা তম্বগী রিফরেন্দম লৌদুনা ইন্দোনেসিয়াদগী চহী অহুমগী মতুংদা নীং খা তম্বা অমুক হঞ্জিনখি।

পর্তুগালগী প্রেসিডেন্ট মার্সেলো রেবেলো গা লিসিপ্রিয়া কাঙুজম

লিসিপ্রিয়ানা হায়খিবদা, ঐহাক্কী খোঙচৎ অসিনা ইন্দিয়া অমদি ইষ্ট তিমোর লৈবাক অনীগী মরী হেন্না নকশিন্নহনবা ঙম্লে। ক্লাইমেট এক্টিভিষ্টশিং অসি হীরম খুদিংদা য়াওহনবা তঙায়ফদবা মতম ওইরে। ঐখোয়গী তুংগী ঈং চীকপা পুন্সি অমা লেপচনবা মালেমগী লুচিংবশিংনা ফজবা ৱাহৈ ৱাতা ঙাঙদুনা লৈবগী মহুৎতা থবক ওইনা মালেমগী অকোয়বা ফীভম কন্নবা হোৎনৌ হায়না ফোঙদোকখি।

মশক নাইবা ফোরেন গেষ্টশিংগী মনুংদা পর্তুগালগী প্রেসিডেন্ট মার্সেলো রেবেলো, গিনি বিসাওগী প্রাইম মিনিষ্টার গোমাস নাবিয়ম, অষ্ট্রেলিয়াগী গভর্নর জেনারেল দেবিদ হর্লি, নোবেল লৌরেট কাইলাস সত্যার্থিনচিংবা য়াওবতা নত্তনা মালেমগী লৈবাক কয়াদগী লাকপা ফোরেন মিনিষ্টারশিং অমদি মশক নাইবা লুচিংবা কয়াসু শরুক য়াখি। হোয়াইট হাউসকী আমেরিকাগী প্রেসিডেন্ট জো বিদেননসু প্রেসিডেন্সিয়েল দেলিগেসন অমা থারকখি।

গিনি বিসাওগী প্রাইম মিনিষ্টার গোমাস নাবিয়মগা লিসিপ্রিয়া কাঙুজম

জোস রামোস হোর্টানা ইষ্ট তিমোরবু ইন্দোনেসিয়াগী মখূৎতগী ঈং চীক্না ৱারী শান্নদুনা লান হৌরম্বা লৈবাক অসিবু নীং খা তম্বা হঞ্জিলহনবা ঙমহনখিবগীদমক মহাকপু কুমজা ১৯৯৬ তা নোবেল পীছ প্রাইজ পীদুনা ইকায় খুম্নবা উৎখি। মহাক্না প্রেসিডেন্টকী ফম অসি পায়বা অনীরকশুবা ওইরে। মহাক্না কুমজা ২০০৭-২০১২ ফাওবা প্রেসিডেন্ট ওইখি অমদি লৈবাক অসিগী অহানবা প্রাইম মিনিষ্টারবু ২০০২দগী ২০০৭ ফাওবা ওইখি। ইষ্ট তিমোর হায়রিবা লৈবাক অসি ক্লাইমেট চেঞ্জনা মরম ওইরগা চহী চা খরগী মতুংদা সমুদ্র ঈরোলনুংদা লূপখিবা য়াবগী অকিবা লৈ। মমাঙ চহীদসু ট্রোপিকেল সাইক্লোন সেরোজানা মীওই কয়া হাৎখি অমদি মীওই কয়া ময়ুম মাঙ তাকহনখি।

প্রেসিডেন্ট অমদি নোবেল পীছ প্রাইজ লোরেট ডোঃ জোস রামোস হোর্টান লিসিপ্রিয়াগী মিংদা ‘লিসিপ্রিয়া ফাউন্দেসন’ কৌবা ট্রাষ্ট হৌদোকখি

মহাক্কী খোঙচৎ মনুংদা ইষ্ট তিমোরগী সিভিল সোসাইটি ওর্গানাইজেসন কয়ানা শীন্দুনা নহাশিং অমদি অঙাংশিংগা ৱারী ৱাতাই শান্নদুনা উনখি। লোয়ননা মহাক্না লুচিংদুনা মালেমগী লুচিংবশিংদা মালেম অসি ক্লাইমেট চেঞ্জদগী কন্নবা খোল্লাউ লাউদুনা খোঙজং কয়াসু ইষ্ট তিমোরদা চঙশিনখি।

ঐহাক্না মখোয়গী ক্লাইমেট চেঞ্জনা থোকহল্লিবা অৱাবাগী ৱারীশিং তারে অমদি ঐহাক্না শোয়দনা মালেমগী লুচিংবশিংদা মখোয়গী ৱারীশিং অসি খঙহল্লগনি। ঐখোয়না তুং কোইবা ঈং চীকপা, তরু তনানবা মালেম অমদি কমদৌনা ক্লাইমেট চেঞ্জ পূন্না লান্থেংনগনি হায়বগী মরমদা ৱা কয়া খন্নখি হায়না পাউমীশিংদা লিসিপ্রিয়ানা হায়খি। ঐহাক্কী খোঞ্জেল অসিনা তাবীদ্রবা মীওই মিল্লিয়ন কয়াগী খোল্লাউ মহুৎ শিল্লিবনি অমদি করিসু খঙজদ্রবা মরোল থোকচদ্রবা জিবা পানবা মশীং থীঙমদ্রবা কয়াগী খোঞ্জেলসু ওইরিবনি হায়না মখা তানা ফোঙদোকখি। ইষ্ট তিমোরগী প্রেসিডেন্ট অমদি নোবেল পীছ প্রাইজ লোরেট ডোঃ জোস রামোস হোর্টান লিসিপ্রিয়াগী মিংদা ‘লিসিপ্রিয়া ফাউন্দেসন’ কৌবা ট্রাষ্ট অমসু থাংজ নুমিৎতা হৌদোকখি।

সোর্স: পান্দম