• 4
• ২২শে অক্টোবর ২০২৩ ইং
• Share on:

মৈতৈ নাৎকী ইপা-ইপুনা চৎনবা অমদি পামজবা পান্থোইবী ইমাবু ইনাৎ-থৌনিরকপা

বি. বি. চিংঙাখম

মীওইপোক্তা লৈরিবা ঐখোয়না ইশাগী হৌরকফম লাই ওইখ্রবা ইপা-ইপুগী লাইনিং লাইশোল চৎন-লোনচৎ থিজিনবা খঙজিনবা হায়বসি মন্তিক্নবা য়াদবা অতাংবশিংগী অথোইবনি হায়না থমজনিংই। তাইবঙ মপু মাগী ওইবা মশানা অনীথোক্না শখায়দুনা শায়োল-লাংওলনা মহৌশা কৌবা কৌবী ওইনা চিংঙু নোংপোক পান্থোইবী কৌনা শায়োলবনি থাজনৈ।

নোংপোক পান্থোইবী অনীনা হৌরকপসি নূঙ-পাল ঈচেল অনী থোকই। পান্দমদি লাই ওইরিঙৈবু নুঙলোন খংনৈ। মীরোল-পোরোল তারকপদুনা লাললোন  কৌই।

মপু মাগী অমত্তা ওইবা মশানা মওং হোং হোংদুনা ওইনিংবা মওং ওইববু শায়োল কৌই। অমুক থুপ্পা অমুক ফোংবা হায়বদি অমুক শিবা অমুক পোকপবু লাংওন হায়। অসুম্না মাকু শবাইবা শবাইবী অনীনা মোংবা হনবী লাওন্না হয়ি চকক্তা নোংপোক মার হনবা অমদি অপান থোইবী (পান্থোইবী) ওইনা লাংওনখি লৌনৈ। অদুনা নোংপোক পান্থোইবী অনীদি তেংবালবা মপুনা শায়েঅল লাংওনবনি। নোং হংশিগী মতমদা তেংবালবা মপুনা মতোমতা লৈবনদি তাইবঙ কূম্মৈ ওইররোই মশাগী অমত্তা ওইবা নোংলুমা অনী থোক্না শখায়খিবনি লৌনৈ। পোকপনা লাইহৌ, হিংবনা হরাওবা, শিবনা লাইরোই কুম্মৈবু নোংপোক পান্থোইবী অনীনা লুচিংবা লুচিংবী ওইনা শয়োলবিবনী। অদুনদি লাই হরাওবদা লাইনিংথৌ লাইরেম্বী অনীগী মচাঙাক ওইবনা লাইনিংথৌ লাইরেম্বী লাই মনাইশা হায়নরিবনি।

তাইবঙ মীওইবিশিংনা হয়িচক্কী মতমদা থকশি খাশি নায়না য়ারৌ শাগুম অকন অকনবনা অশোন অশোনববু য়েংদুনা তুহৎপগী চৎনবী লিংলমই। মসিগী মতৌ উবদা খমনুং খোঙারেন শিদবনা মপারী তিংকম-লাংকম অনীবু মালেমদা তাইবঙ মীওইবগী মরৌ চন্নবা হায়দুনা থাবিখি হায়নৈ। অসুম্না তিংকম লাইকম অনীনা মালেমদা কুমদুনা তাইবঙ য়ুমথোং চংনা লৈরকপা কুমশিং য়াম্লক্লে। তাইবঙশিং চাবা-থকপা ফংদবদগী শিবা মচেৎ খাক্না ৱারবদা তেংবাল মপু ইমা ইমা কৌদুনা মালেম ইমাগী মতম্বাক্তা ওন-থোইনা মপুগী মীংকৈ শোন্দুনা খাংলবদা ইমা লৈমরেল শিদবীনা তাইবঙ মচাশিংগী অৱাবা মতৌ অদু য়েংঙমদ্রদুনা তেংবালবা মপুগী হলেন্দগী পুথোকপা পাম্বা কৈরেলগী সয়াংথক্তা তোংখ্বাংদা নারিল লিম্না খ্বাংচেৎ ওই, অঙাংবা অরংবা মৈরিনা শেৎ অশংবা ঈশিংনা ফিজোল ওই। অকনবা নোং নুংশিৎকা শাগোন্নরগা থাক লাওনা মালেমদা ফমদুনা কনখিবগী ৱারী লৈ।

পান্থোইবী ইমাবু ইরাৎনরকপগী লারবা ৱারী শিংবনু কয়ানি।

১) চেংলৈ খাবগী য়ুমদগী নোংপোক অমদি পান্থোইবীনা চেনখিবদা খাবা অমদি মাগী শাগৈনা কোয়তান তান্নরম্মী। চহী কুমজা কয়া চংনা খাবনা হোৎনববু মায় পাকপা ঙমখিদে। উনা উনা মাংখি থিবা খংদে। অরোইবা তান্নবদা ইবুঙো ইবেম্মা অনীনা কাখিবা চীং অদুবু লাই চীংদোনঅকা চীংজিন হায়না খংনৈ। ইমা পান্থোইবীনা খাবা ইয়েকচাদা অসুম্না তাকপীরম্মী, নবুঙো নবেম্মা অনীনা তাইবঙলেন্দা কুমদুনা লৈগদবা মতম লোইরে। ঐখোয়দি খোইয়ুমগী শায়োন লাংওননি। অদুনা নয়ুম মোংবা মরান য়ৌরগা শংলেন লাইশঙ শাদুনা খুভম শাদুনা লাৎচৌ। ঐবু ইরাৎ থৌনিগদবা মতমদি মেরাগী নোংমা পানবদগী তরানি পানবনি। চাককুবীগে লনকুবীগে অসুম্না অখং অহৈদগী তাজৈ।

২) মোইমোম্বা অমদি নাওথিংমং মচিল মনাও অনীনা থেঙ্গু চিংজিল ইরমগী মরিলবু শেংদোকপদা ককয়েন মীঙম্বনা থক্তুনা লৈরবদা খোং শেংদোকপা ঙমখিদে। কুমজা কয়া লান্থেংনরবসু মায়থিখি। অরোইবদা উপাই লৈত্রবদা ইমা পান্থোইবীবু খুরমদুনা নিংজখি। ইমাগী থৌজালনা য়োইমোম্বা অমসুং নাওথিংমাং মচিল মনাওনা পাঙ্গল্লবা ককয়েন মাঙম্ববু হাৎখি।

৩) খাগেম্বা নিংথৌনা ফম্বাল তোংখিবা ইং ১৫৯৭ মতমদা পান্থোইবী ইমাগী শঙলেন শাদুনা ইরাৎ থৌনি তৌরকখি। খাগেম্বনা মচা ধারা ফংদ্রবদা ইমাবু লাক্তুনা থৌনিজখি। মদুগী মহৈনা মচা নুপা খুজাও ফংখিবগী ৱারী লৈ।

পুম্নমক অসিনা পান্থোইবী ইমাসি লাইগী শায়োলনি। ইমাবু নিংজবা লাৎচবা হায়বসি লন-থুম ধারা নালা পীনহৈবী শা লালগীসু অথোইবী লাইরেম্বীনি হায়না থাজনা লৌবদা লান্দে। নাৎকী ওইবা লাইরেম্বী ওইনা মৈতৈনা থাজবা হেনগৎনরক্লি। অমরোমদা মশাগী হৌরকফম কাংলোন ইপানাৎ ইপুনাৎকী চৎনরকপা কয়াবু হিংগৎহন্নিংবগী কত্থোকপা হোৎনবগী মতেংনা তপ্না তপ্না হেনগৎলক্লি।