• 130
• ১লা সেপ্টেম্বর ২০২২ ইং
• Share on:

মৈতৈগী ময়েক্নাইবা ফনেক্কী মগুণ

মৈতৈগী ময়েক্নাইবা ফনেক, মপাল লোনবা হায়রগসু খঙনবা ফনেক অসি মফম মতমগী মতুংইন্না শেৎপা য়াবা অমসুং য়াদবা লৈ। লাইগী থৌরম হায়বদি গোবিন্দজি মন্দিরনচিংবা খুরুম্বা অমদি ধর্ম্ম কর্ম্মগী ফিরোই উৎসবনচিংবদা ময়েক্নাইবা ফনেক শেৎনদে। মপুরোইবা লৈখিদ্রবদি ময়েক্নাইবা ফনেক শেৎনদে। য়ামদ্রবদা চহী অমদি ঙাক্না চৎনৈ। অদুম্নদি ওইরগা মচানুপানা নুপী চেল্লক্লবা, লুহোংগদবা লৈরবা মতম অদুদদি ময়েক্নাইবা শেৎপদা অকায়বা লৈতে।
মপামদা মী লৈতবা য়াওরবসু মপাম চৎপদা ময়েক্নাইবা শেৎনদে। অদুগীসু মথক্তা নিংথৌগী লৈবা (মহারানি) খক্তনা শেৎকদবা হিজম ময়েক অসিনচিংবা কয়া লৈখ্রে। মসিগী চৎনবী অসি য়াম্না কূপ্না য়েংলুরবদি, মৈতৈগী চৎনবী অসি অসুক্কী মতিক য়াম্না থাক ৱাংনা লৈখ্রে হায়না লৌই। মসিগী ৱাহন্থোক অসি ৱাখলনা শারগা পীরবদি মৈতৈ খক্তা নত্তনা মণিপুরদা খুন্দারিবা ফুরুপ খরদসু য়াম্না চাওনা লম্মুক্নবা অমা থোরকপা য়াই। পূক্নিংদা লৌথুপ লৌকোই লৈতনা হৌরকফম অদু ময়েক শেংনা থম্বীবনা ফনেক অসিগী মগুণ অমুক্কসু হেনগৎকনি অমসুং সনা লৈবাক মণিপুর অসি নুংশি চান্নবা পুরকপদা অচৌবা মতেং ওইগনি খল্লি।
ফনেক ফিবান লোনবা :-
মৈতৈনা শীজিন্নরিবা ময়েক্নাইবা ফনেক, মপাল্লোনবা ফনেক হায়রগসু খঙনবা অসিগী মরমদা চৈথারোল কুম্বাবগী লমায় ৮দা ‘মৈদিংঙু য়াংলৌ কৈফাবা শকাব্দ ৮৯১দা নিংথৌ ওইএ। মহাকথক্তা ফনেক ফিবান্দা খোই লোনবা হৌদোক্লমএ” হায়না পীরি। মসিনা ময়েক শেংনা তাকই, ঐখোয় অমত্তনি। মসিদসু নত্তনা কবুইগা মোইরাংগা লৈনবা মরী অমত্তনি হায়বগী খুদম চাংদম ইতিহাসকী লমায়দা কংলৈরোলগী লমায়দা ময়েক লানা য়াম্না শেংনা লৈখ্রে। পূম্নমক অদুগী অচুম অরান অদুদি অখঙ অহৈ ইতিহাস নৈনবশিংগী থবক ওইরসনু। পূম্নমক অদু থমখ্রগা, হৌজিক মৈতৈনা শেৎলিবা ময়েক্নাইবা ফনেক মপাল লোল্লিবা অসিগা কবুইগী ময়েক্নাইবা ফনেক (হিয়াক্কিন ফৈশোই) অসিগা করিমত্তা খেন্নদে হায়না লৌজৈ। মসিনা তাক্লিবদি ঐখোয় অমত্তনি হায়বসিদা য়েৎননীংঙাই থোইনা লৈত্রে হায়না লৌই।অদুবু, কবুই ফনেক্তা মপাল লোনশিল্লবদি মদু কবুই ফনেক্নি হায়বদি য়াররোই।
কবুইগী ময়েক্নাইবা ফনেক:
কবুইগী ফনেকশিং অসি চহী মতাংদা অমদি মফম মতমগী মতুংইন্না শীজিন্নফম তোঙান-তোঙান্না লৈজৈ। কবুইগী ময়েক্নাইবা ফনেক (হিয়াক্কিন ফৈশোই) অসিনা লাংলিবা ময়েক্কী মতুংইন্না মমিংসু তোঙান –তোঙান্না লৈ। ময়েক্কী মতুংইন্না নুপীমা, লৈশাবী, মৌনহা, মীয়াইচল্লবী অমসুং হনুবীনা শেৎকদবা ময়েক মখলশিং তোঙান তোঙান্না খাইদোকই। কবুইগী ফনেক মখলশিং, ময়েকশিং অমসুং শীজিন্নগদবা মফম মতমনচিংবশিং অদুদি য়াম্না পাক চাওনা লৈখ্রে। মরম অদুনা মদুগী অকূপ্পা ৱাফমশিং অদুদি ঙসিগী ওইনা থমজররোই। খৃ: ১৬০৯ দা নিংথৌ খাগেম্বা মতমদা তা খৌসারোন ৪ (মরি) হায়বদি: কবুই, মরাম, তাঙ্খুল অমসুং মৈতৈ হায়রিবা খৌসারোন অসি শীজিন্নখিবগী ৱাফম থেংনৈ। হায়রিবা খৌসারোনশিং অসি ক্বাক যাত্রা, ক্বাক তানবা নুমিত্তা হৌজিক ফাওবা খৌসারি। মসিমসু ঐখোয় মশেল অফবা মরী অমনি হায়জনীংই।
কবুইগী তা খৌসারোন:
মণিপুরদা তা খৌসারোল লৈরিবশিংগী মনুংদা কবুই খৌসারোল অসিসু অমনি। মণিপুরগী সনা কোনুংনা চহী খুদিংগী পাঙথোক্লিবা শ্রীশ্রী দুর্গা পুজাগী মঙানি চনবা অরোইবা নুমিৎ ক্বাক যাত্রাগী থৌরমদা কবুই খৌসারোল অসি ঙসি ফাওবা লেপ্তনা খৌসারি। লাক্কদৌরিবা চহী কয়াদসু কবুই খৌসারোলসি খৌসাখিগনি। অসিগুম্বা মতিক মগুণ লৈরবা খৌসারোল অসি মণিপুরগী নিংথৌশিংনা শীজিন্নদুনা লৈবাক ঙাক্লম্লিবনি।
মণিপুরগী অরিবা ইতিহাস নৈনরকপদা কবুই কান্থোক্লগা চৎপা শুংয়া য়ারোই। হৌখিবা খৃ: ১৯৬৮ হায়বদি চহী ৫৪ (য়াংখৈমরি) গী মতমদা মণিপুরগী সনা কোনুংনা পাঙথোকপা শ্রীশ্রী দুর্গা পুজাগী অরোইবা নুমিৎকী ক্বাক যাত্রা, ক্বাক তানবা থৌরমদা দি এল কবুই ইশামক ‘কবুই খৌসারোল’ থৌগল তৌখি। মতম অদুদা কবুইগী ফিজোল শেৎখিদে। ক্বাক তানবদা শেৎপা মৈতৈগী ফিজোল শেৎতুনা খৌসাখি। শ্রীশ্রী গোবিন্দজি খুরুম্বা ফংজখি। মদুগী নুংঙাইবদু ঙসিসু কাউদ্রি। শ্রীশ্রী গোবিন্দজি অসি মালেমগী থাক্তা লৈখ্রে। মঙোন্দা কৎখিবা জগোয় রাস মালেমগী থাক্তা লৈখ্রবনি। রাজর্ষি ভাগ্যচন্দ্রনা শ্রীশ্রী গোবিন্দজি অসি মণিপুরগী নিংথৌ হায়রম্মী। হায়রিবা ৱাফম অসি য়াম্না চুম্না ময়েক শেংনা য়েংবা অমা চঙই হায়না লৌজৈ।

সোর্স: হুইয়েন লানপাউ