মীলাল অমদি রাইটপ্লেটনা বাংলাদেশতগী হামোম সনাতোন ওকখ্রে
ইম্ফাল, এপ্রিল ১৭ : মীতৈ ইরোল ইয়েক লোইনশিল্লোন অপুনবা লুপ (মীলাল) ময়াই লোইশঙদা ঙরাং নোংমাইজিং নুমিৎকী অয়ুক পুং ১০ তাবা মতমদা বাংলাদেশতগী শক্নাইরবা কালচারেল এন্ড সোসিয়েল এক্টিভিষ্ট ওজা হামোম সনাতোন, সেক্রেটারী জেনারেল, মণিপুরী চৈরাওবা পরিষদ, বাংলাদেশ ওকপগী থৌরম অমা মীলালগী প্রেসিদেন্ট অমদি ৱাইখোম গোজেন মৈতৈ ভাইস প্রেসিদেন্টনা ময়াই তাঙবল লৌদুনা অমদি মীলালগী থৌপুবা মীওই কয়া য়াওনা পাঙথোকখ্রে হায়না মীলালগী চেরোল অমনা হায়রি।
চেরোল অসিনা হায়, বাংলাদেশতগী লাকখিবা ওজা সনাতোননা বাংলাদেশতা তারিবা মীতৈ পুম্নমক্না মণিপুর লৈঙাক্না শক খঙলবা গেজেটতা ফোঙলবা ময়েক ২৭ অসি লমদমদুগী মীয়াম্না য়াম্না পাম্না তম্বা পাম্মী। অহৈবা মীওই খরদি লৈরে অদুবু মীলালগী মায়কৈদগী ওজা ৩/৪ দং মফমদুদা লাকপীদুনা ইরমদমগী ময়েক অসি অথুবদা বাংলাদেশতা মীলালগী মশা লোইশঙ অমসু হাংদোকপীদুনা লমদমসিদা এমএগী থাক য়ৌনা তম্নখ্রবা ময়েক অসি তম্বীনবা হায়জখি।
মীলালগী মায়কৈদগীসু অথুবদা বাংলাদেশতা লাক্তুনা লমদমদুগী মীপুম খুদিংমক ময়েক লাইরিক মখল ৭মুক পীখি লোয়ননা মীলালগী মায়কৈদগী ঈগী ঈচিল-ইনাও ওইরিবা মপান্দা চোইনা তাখ্রবা পূম্নমক্তা মীতৈ ময়েক অসি খঙহন্নবগী পান্দমদা লেপ্পা লৈতনা হোৎনদুনা লাক্লি। মখা তানসু হোৎনখিগনি। মসিদা লমদমসিদা লৈরিবা মীপুম খুদিংমক্না শৌগৎপীয়ু হায়রি।
হন্দক চহীগী মহৈরোইশিংগী মীতৈ ময়েক চাংদম্নগদৌরিবা অসিগীদমক কেটাগোরি ক্লাস নাইন অমদি টেনগী মহৈরোইশিংগী ফার্ষ্ট, সেকেন্দ, থার্দ তারবা অসিগীদমক লুপা ৫০০০, লুপা ৪০০০ অমদি লুপা ৩০০০ হায়রিবা মনা অসি হৈরোক পার্ট-২দগী ডা. মোইরাংথেম পিবারেন হায়রিবা অসিনা মহাক্কী অপোকপা এম তোম্বা গী মীংদা কৎপগা লোয়ননা মহৈরোইশিং অসিগীদমক মনা অসি ঙম্লগনি হায়না অয়াবা পীবিরকপগীদমক মীলালগী মায়কৈদগী থাগৎপা ফোঙদোকখি।
অমরোমদা, দি রাইটার্স প্লেটফোর্ম মণিপুর (রাইটপ্লেট), ইম্ফাল ইষ্ট লংদুমনা বাংলাদেশকী শক্নাইরবা কালচারেল এন্দ সোসিয়েল এক্টিভিষ্ট সনাতোন হামোমবু ঙসি নুংথিল পুং ১ তাবা মতমদা ইম্ফালগী হোটেল খৃষ্টিনাদা অচম্বা থৌরম অমা শীন্দুনা পাঙথোকখ্রে। ঙসিগী থৌরম অসি রাইটপ্লেটকী চেয়ারমেন য়ুম্নাম কুমার, ভাইস চেয়ারমেন শমজেৎশাবম মেঘচন্দ্র, জেনারেল সেক্রেটারি কেবি ইঙারেম্বা, মণিপুর য়ুনিভার্সিটিগী এসিষ্টেন্ট প্রোফেসর ড. নাউরেম সনাতোম্বা অমসুং শক্নাইরবা মীওইশিংসু শরুক য়াখি।
সনাতোন হামোমবু ওকপগা লোয়ননা মেমোন্তো, লেংয়ান ফি, অমসুং লাইরিক খরসু রাইটপ্লেটকী মায়কৈদগী খূৎশিন্নখিবগা লোয়ননা বাংলাদেশতা খুন্দা লৈতাদুনা লৈরিবা মীতৈ/মৈতৈশিংগী পুন্সিরোল, য়ুম্বালোন, লোইনশিল্লোন, লাইনিংলোন, শেম্মীৎলোন অমসুং ঙসি ঙসিমক থেংনরিবা খুদোংচাদবা কয়াগী মরমদা য়াম্না কুপ্না খন্ন-নৈনদুনা পুকমেন পাউমেন্নখি হায়রি।
সোর্স: ইচেল নিউজ নের্টওয়ার্ক
0 কমেন্ট:
কমেন্ট তৌবিয়ু