মীলালগী ২২ শুবা মপোক কুমওন পাঙথোকখ্রে
ইম্ফাল, আগস্ত ১৮ : মীলাল (মীতৈ ইরোল ইয়েক লোয়ন শিল্লোল অপূনবা লূপ) কংলৈপাক্কী ২২ শুবা মপোক কুমওনগী থৌরম ঙসি ইম্ফালগী জি এম হোলদা পাঙথোকখ্রে।
থৌরম অদুদা লম্লাই এ সিগী এম এল এ খাংবান্তাবম ইবোমচা, ইম্ফাল ওয়েস্ট জিলা পরিষদকী চেয়ারপার্সন লাইশ্রম বোবী, জি পি উইমেন্স কলেজ গী মণিপুরী দিপার্তমেন্তকী হেদ দাঃ ৱাইখোম রোমেশ, হেরিকোনগী প্রেসিদেন্ত য়ুমখাইবম সুরজিৎকুমার খুমন অমসুং মীলাল কংলৈপাক্কী লুচিংপুরেল খাইদেম ইঙোচা মীতৈনা প্রিসিদিয়াম মেম্বরশিপ ওইনা শরুক য়াখি।
মীলালগী লুচিংপুরেল খাইদেম ইঙোচা মীতৈনা হায়, লমদম অসিগী লাইওইখ্রবা ইপা-ইপুশিংনা ইদুনা থম্বীরম্লবা মীতৈ ইরোল-ইয়েক অসিবু হেন্না চাওখৎহন্নবগী পান্দমদা মহৈরোয়শিংগী ওইবা মীতৈ ময়েক চাংদম্নবগী থৌরম অসি চহী খুদীংগী পাঙথোক্লি।
মহাক্না হায়, ইপা ইপুশিংনা চৎন-লোনচৎ, কংলৈপাক অসিদা লৈরিবা য়েলহৌমী খুদীংমক হিংমিন্নরম্বগী ৱারী শীংবুল কয়া অমা অহা লমনশিংনা মীতৈ ময়েক্তা ইরগা থম্বীরম্মী। মদু কাঙলুপ খুদীংমক্না খঙলক্লগদি ঙসি ৱাখল তাদ্রিবা ময়াম অসিসু শোয়দনা তারক্কনি হায়না মীলালনা থাজবা থম্মী।
ঐখোয়গী ইরোল-ইয়েকপু লমদম অসিদা খুন্দামিন্নরিবা চীং অমসুং তম অনীমক্কী মীওইশিংদা খঙহন্দুনা ঐখোয় মশেলগী মরক্তা পাউ ফাওনবদা থেংনরিবা অৱাবা অসি কোকহন্দুনা অমত্তা ইরোল-ইয়েক থমদুনা নুংশি-চান্ননা ঐখোয় মশেল লৈমিন্ননবা ঐখোয়গী ইরোল-ইয়েকপু মীপূম খুদীং দা খঙহন্নবা মীলালনা ঙসি ফাওবা কন্না হোৎনদুনা লাক্লিবা অসিদা মীয়াম্নসু মতেঙ পাংবীয়ু হায়না ইঙোচানা ফোঙদোকখি।
থৌরম অদুদা শরুক য়াখিবশিংনা মীলালগী লাইওইখ্রবা লুচিংপুরেলশিংগী মফমদা লৈ-শু কত্তুনা ইকায়খুম্নবা ঊৎখি। মীলালনা শীন্দুনা থা অসিগী ৩দা পাঙথোকখিবা ক্লাস ৱান-তেন ফাওবগী মহৈরোয়শিংগী ওইবা মীতৈ ময়েক চাংদম্নখিবা অদুদা মকোক মথং তাখ্রবা মহৈরোয়শিংদা মনা য়েন্থোকখি।
সোর্স: পোক্নফম
0 কমেন্ট:
কমেন্ট তৌবিয়ু