মণিপুরী সাহিত্য অমসুং সংস্কৃতি-বাংলাদেশ
বাংলাদেশতা মণিপুরীশিংনা চহি ৩০০ রোম মমাংদগী চোয়জাইননা মফম কয়াদা খুন্দা-লৈতাদুনা লৈরকখিবসি হৌজিক হৌজিক্তা বাংলাদেশকী মাইনোরিটি গ্রুপ ৪৫ মরক্তা খ্বায়দগী পাঙ্গল শোল্লবা অমসুং অপীকপা গ্রুপ অমনি। তৌইগুম্বসুঙ মাইনোরিটি ওইরগসু ঐখোয়গী অরিবা মণিপুরী সাহিত্যগী উত্তরাধিকার ওইবনা অমসুং চাওখৎলবা কালচার অমা মশাগী লৈজবনা অতোপ্পা জাতিনা মণিপুরী ঐখেঅয়বু ওনা তৌদবদি নত্তে।
বাংলাদেশতা মণিপুরীশিংগী মী মশীং চাওরাক্না লীশিং ৩০ রোম ওইরমগনি। মতম অমদা বাংলাদেশকী কেপিটেল সিটি ঢাকাগী মণিপুরী পাড়াদা মীতৈ লৈরম্মী। হৌজিক অমফাওবা খুন্দাদ্রে। ময়মনসিংহগী দুর্গাপুর, কুমিল্লাগী করবাদা মীতৈ লৈরম্বগী ইতিহাসনা হায় অদুবু হৌজিক্তি লৈখিদ্রে। হৌজিক্না মৌলভী বাজার জেলা অসিগী মনুং চনবা কমলগঞ্জ উপজেলা মীয়াম্না ভানুগাছ হায়না খঙনরিবা মফম অসিনা বাংলাদেশতা খ্বায়দগী মীশিং য়াম্না খুঞ্জা ১৪দা শক্তম কায়দনা হিংদুনা লৈরি।
পঞ্জরিবা খুঞ্জা ১৪ অদুদি- কোনাগাঁও, হামোমখুল, ভানুবিল, মাঝেরগাঁও, নয়াপত্তন, শ্রীপুর, কাটাবিল, তেতইগাঁও, হকতিয়ার খোলা, গঙ্গানগর, ভান্ডারীগাঁও চিৎলীয়া, মঙ্গলপুর, ছয়ছিড়ি অমসুং হুমেরজান হায়রিবা মফম অসিদা বাংলাদেশকী মীতৈ মশীংগী খাইবোকমুক লৈরি। জেলা অসিগী কুলাউড়া, বড়লেখা, জুড়ি অমসুং শ্রীমঙ্গল উপজেলাদসু খুন্দা রৈতানা লৈরি। অসিতা নত্তন হবিগঞ্জ জেলা, সুনামগঞ্জ অমসুং সিলেট জেলাদা পুল্লপনা খুঞ্জা ২০ রোম মীতৈ লৈরি।
বাংলাদেশকী মণিপুরী সাহিত্যঃ- ১৯৭৫ খ্রিষ্টাব্দদা বাংলাদেশ মণিপুরী সাহিত্য সংসদস লিংখৎখিবা মতুংদগী বাংলাদেশতা মণিপুরী সাহিত্য চর্চা চৎথরকখি। সংগঠন অসিগী মতম নাইদবা সাহিত্য চেফোঙ ‘দীপাম্বিতা’ ফোংবদগী দীপাম্বিতাগী মঙাল ফংলদুনা অইবা/অইবী কয়া চোংথোরকখি। মখোয়গী মনুংদা শক্নাইরবা অইবা কবি এ.কে শেরাম, মাইবম তোলেন, তৌরেম রবীন, শামসুন নাহার মিতা, কারাম নীলবাবু, খোইরোম কামিনী কুমার, খোইরোম ইন্দ্রজিৎ, শান্ত খুমন, সনাতোন হামোম, এন শ্যামল, হামোম প্রমোদ, শেরাম নিরঞ্জন, মাইস্নাম রাজেশ, নামব্রম শঙ্কর, এন কৈনাহল দেবী, অয়েকপম অঞ্জু, অবুজম মণিভদ্র, নিংথৌজম শান্তা, রোশন আরা বাঁশী খুৎহৈবম পনবা য়াই।
দীপাম্বিতা মতুংদা ফোঙখিবা চেফোঙ (লিটল ম্যাগ) ‘মৈরা’ ‘ইপোম’ ‘মণিপুরী দর্পণ’ ‘থরো-থম্বাল-থরিকথা’ ‘খোল্লাউ’ ‘প্রয়াস’ ‘লৈচল’ ‘য়াকাইওয়া’ ‘মতম’ ‘তাম্না’ ‘ছন্দে ছন্দে’ ‘ঔগ্রী’ ‘অয়ুক’ ‘মীৎকপ থোকপা’ ‘শজিবু’ ‘শায়োন’ ‘থাজ’ ‘অনৌবা মঙাল’ ‘ময়োল’ শুম্লবা মমল লৈরবা চেফোঙ কয়ানা বাংলাদেশকী মণিপুরী সাহিত্যগী লৈকোল অমা শেমখি। লৈকোলদা নীংথিনা ফজনা শাৎলম্বা লৈরাংশিং মতম মতমদা কেনখ্রে, লৈশাৎ তমদ্রে। হৌজিক্তি ‘মৈরা’ হায়বা চেফোঙ নত্তনা মঙাল শন্দোক পীবগী ময়োং অমফাওবা উজবা ফংদ্রে।
পঞ্জখিবা অইবা/অইবীশিংনা শৈরেং, ৱারেং পুল্লপনা লাইরিক চামমুক বাঙলাদেশতগী ফোঙখ্রে। বাংলাদেশতা লাইরিক ফোঙবিবগী পাব্লিকেশন্স অমা ফাওবা লৈতবনা সাহিত্যবু নুংশিজবা অইবা/অইবীশিংনা মরন্নাই শেলথুম পুথোক্লগা ফোঙবা নত্তনা উপায় লৈতে। অসিগী পান্দমদা বাংলাদেশকী মণিপুরী সাহিথ্য চাওখৎলে হায়বদা হায়মনবা থোক্লোয় খঞ্জৈ।
সংস্কৃতিঃ- বাংলাদেশতা মতম অমদা হায়বদি ঙসিদগী চহি য়াংখৈ/হম্ফুরোম মমাংদা মীতৈশিংগী পোকপা-শীবা, লুহোং-খোংদোংবগী থৌরম কয়াদা শক-শোনবা শাস্ত্রগী মতুং ইন্না চপ চানা পাঙথোক্নরম্মী। হৌজিক্না শেনমিৎলোন মতুং ইন্না মশা-মশাগী কান্ন কান্ননবা হোৎনবদা অতৈ অতৈ শিনফমদা মথৱায় য়াওখিবনা ঐখোয়গী কালচার হায়বদি শক-শোনবগী মীশিং অসি ৱাৎথরক্লে।
ব্রাহ্মণশিংগী তাকপী-তম্বীবদা পেন্নদবা কয়াদগী বাংলাদেশতা লাইনিং লীচৎ অহুম থোকখ্রে। গৌড় সমাজদগী খ্রীষ্টান অমসুং সনামহী লাইনিংদা অপাম অপাম্বা লম্বীদা চৎনবা য়াওনরে। অদুনা লীকখ্রবা পীকখ্রবা বাংলাদেশ লৈবাক্তা মাইনোরিটি ওইনা লৈরিবা ঐখোয় অসি নোংমা নোংমগী চাওখৎপগী মহুৎতা শোত্থরক্লে হয়াবসু য়াই। অদুবু ঐখোয়গী থৌবুরেল কয়ানা সমাজ অসিবু ঙাকপা কনবিনবগীদমক চহীগী রাসলীলা, শজিবু চৈরাউবা, লাই হরাওবা গুম্বা নাৎকী ওইবা থৌরম কয়া লেপ্তনা পাঙথোক পীদুনা অতোপ্পা জাতিদা শক্তাক্নবগী হোৎনবিবা অদুদি লেপত্রি।
সোর্স: মরূপ, আগরতলা
0 কমেন্ট:
কমেন্ট তৌবিয়ু