মণিপুরগী নুপী লৌমী অনিদা মহিলা কিষান সম্মান এৱার্দ পীখ্রে
ইম্ফাল, অক্টোবর ১৫ : লৌউশীংউবগী হীরমদা থোইদোক হেন্দোকপা থবক তৌবগীদমক মণিপুরগী নুপী লৌমী অনী রাজকুমারী বিনিতা দেবী অমসুং কাংঙবম ইন্দিরা দেবীদা মহিলা কিষান সম্মান এৱার্দ পীদুনা ইকায়খুম্নখ্রে।
গুৱাহাতিগী খন্নাপারাদা লৈবা কৃষ্ণ কান্ত হেন্দিক স্তেত ওপেন য়ুনিবার্সিতিগী ওদিতোরিয়মদা পাঙথোকখিবা থৌরমদা এৱার্দশিং অদু খূৎশিন্নখিবনি।
রাজকুমারী বিনিতা দেবী অসি শক্নাইরবী চেঙ্গুম থাবী অমনি। মহাক্না একর ০.৩৯ দা চেঙ্গুম ফার্ম তৌদুনা চহী অমদা লুপা লাক্ষ ১৩ তানবা ঙমখি। মহাক্কী থবক অসিগীদমক তোঙান তোঙানবা স্তেত লেবেল এৱার্দ কয়াসু পীদুনা ইকায়খুম্নবা ঊৎখ্রবনি।
অমরোমদা, কাংঙবম ইন্দিরা দেবী অসিসু ইন্তিগ্রেতেদ ফার্মিং তেক্নিক শীজিন্নদুনা মখল কয়াগী মহৈ-মরোংশিং থাবগা লোয়ননা পিগরি অমদি কম্পোস্তিং য়ুনিত হাংবগীদমক মশক নাইবী লৌমী অমনি। মহাক্না মহাক্কী ফার্মদা কোবী, চম্প্রা, লফোই, আলু, হঙ্গাম অমসুং চুজাক থাদুনা চহী অমদা লুপা লাক্ষ ১৩ রোম তানবা ঙমখি। মহাক্না সস্তেনেবল ফার্মিংগীদমক মণিপুর গবর্নমেন্তকী এগ্রিকলচর দিপার্তমেন্ততগী মতেঙ কয়া ফংখি।
লৌমী অনী অসিনা এৱার্দ ফংলকপদা মণিপুর গবর্নমেন্তকী এগ্রিকলচর দিরেক্তর এন গোজেন্দ্রোনা থাগৎপা ফোঙদোকপগা লোয়ননা এৱার্দ অনী অসি মখোয়না এগ্রিকলচরগী হীরমদা মায় পাকপা অদু শকখঙবনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু