বাংলাদেশ ঐতিহাসিক মণিপুরী কাংফম -- মুতুৱা বাহাদুর
বাংলাদেশকী সিলেটতা মদন মোহন কলেজকী হেক মায়েক্নবা লৈবা লাইশঙ অহুম (পাখংবা, য়ুমজাউ লাইরেম্বী অমসুং মোংশাবা) গী মমাঙ পাংনা খরা চৎলগা চাওরাক্না কিলোমিটার মখায়গী চাংদা ‘কাংফম’ হায়না ময়াম্না খঙনরবা মফম অমা লৈগনি। মফমসি বাংলাদেশকী মুসলামনশিংনা শা, মনা-মশিং নচিংবা য়োনফম অমা ওইনা শীজিন্নৈ। চহী খুদিংগী ইঙেন থাগী নিনি পানবা নুমিৎতা সিলেটকী মীতৈ লৈকাই ১৩ গী খুঞ্জা শিংনা কাংশিং পুরক্নদুনা মফম অসিদা থেন্দুন থম্লগা ময়াম পুন্না আরতি কৎলি। লৈকাই লৈকাই দগী কাংশিং চিংলকপা মতমদা খুদোং চানবা হায়ুনা কৈথেল ফম্লিবা শিংনা নোংমা ৱাৎলিঙৈদা মফম অসিগী অকোয়বদা শেংদোক-খোৎতোকপা নচিংবা থৌরম পাঙথোকই। কাংফম অসি তরু তনালনা থম্মী।
পুৱারীগী তাঙ্কক অমনা গম্ভীর সিংহ মহারাজা গী মতমদা কুম শোক ১৭৫১ (১৬২৯ খৃ: কুমজা) দা মফম অসিদা অহানবা ওইনা কাং চিংবা হৌদোক্লম্মী। কাং চিংখিবগী ৱারোল অসি ‘চৈথারোল কুম্বাবদা’ পল্লি। চৈথারোল কুম্বাবদা ৱাফম অসিগী মতাংদা অসুম্না পল্লি-‘থিয়াম অনন্দ্রামগী কুম শোক ১৭৫১.. মুসলমানগী লাইগী কুম্মৈগা রথ যাত্রাগা ফাংনরক্তুনা খৎনরকপদা মুসলমাননা হান্না তৌহনও হায়না সাহেবনা হায়রক্লপাপু শ্রীযুৎ মহারাজ না ঐনা হান্না তৌগনি হায়দুনা হিন্দু পূম্নমক্না লোয়না রথ যাত্রাগী নুমিৎ কাইতনা তৌবতা শিলোৎবাসি পঞ্চিমগী সিফাই পূম্নমক্না শ্রীযুৎ মহারাজবু ধর্ম্ম ঙাকই হায়দুনা থাগৎনৈএ..।
সিলেটকী লৈকাইশিংদগী চিংনরকপা কাংশিং কাংফম হায়না খঙনরিবা মফম অসিদা থেন্দুনা থম্মী। মতুংদা পুন্না আরত কৎলি। আরতি লোইরগা ময়াম য়ুবী লাকপি হায়বা মশান্না অমা পাঙথোকই। আরতি কৎফম মনাক্তা অশাংবা ৱা অমদা ফিশিং য়ান্দুনা থম্লগা য়ুংই। লৈ-পরেং অমসু য়াল্লি। ফিশিং অদু য়ুবি লাকপা ঙম্বা নুপা অদুগী ওই। লৈ-পরেং অদু মঙক্তা শিদুনা লাইশিংবু খুরম্মী। মসিগী চৎনবী অসি ইং শোক ১৯৮২ দগীদি থোকখ্রে।
সমাজসেবক য়েনশনবমা শান্তনা লুচিংদুনা সিলেটতগী খরা চৎলগা লৈবা নরসিং টিলাদা লৈরম্বা লাইশঙগী অতেক অকায়শিং য়েংবা ঐ মুতুৱা বাহাদুর অমসুং ডাঃ ওইনাম ইবোচাউবা ঐখোয় পূন্না চৎলি। নরসিং টিলা অসি চাওরাক্না লম এক ৭ লোম চাওবা চীংদুম মচা অমনি। লাইশঙ অমসুং অচৌবা শঙলেন অদুগী লৈমায়দা লৈরম্বা য়ুম্ফমশিং অদু পাকপা চাওবা ওনখি। লাইশঙশিং অসি মীতৈ শিংনা লিংখৎলম্বনি হায়না ঐখৈায়বু লুচিংবিবা য়েনশেনবম শান্তনা তাকপী।
সোর্স: মরূপ
0 কমেন্ট:
কমেন্ট তৌবিয়ু