• 382
• ১১ই অগাস্ট ২০২৫ ইং
• Share on:

পুখ্রম্বম প্রেমচন্দ্র সিংহদা ২০২৫গী নেসনেল লালিত কলা একাডেমি এৱার্দ  --- তোংব্রম অমরজিৎ  

...প্রেমচন্দ্রনা ঙসিদি মনিপুরগী মায় পূদুনা লাক্লি। ঐখোয় পুম্নমকপু কয়াদা চাওথোকচহল্লিবা। ককচীং ইমাবুসু মোমোন নোকহল্লে। অসিগুম্বা শিংথানিংঙাই ওইরবা মিংচৎ পুরকপসিদা অমুক্কা হেন্না হরাও নুংঙাইরিবশিংগী মরক্তা লমদম অসিগী ভিজ্যুএল আর্তিসকি কম্যুনিতিসু তশেংনা থম্মোয় পেঞ্জরি। ... য়াম্না অঙনবা মতমদা শকনাইরবা ওজা থোইদিংজম তোম্বীনা অসিগুম্বা লালিট কলা একাদেমি মনা অসি ফংলকপদা য়াম্না হরাওনখি, চাওথোকচখি। নীংশিংবা য়াবদি হৌখিবা ২০১৩-১৪গী ওইনা ককচীংদগী নোংমাইথেম নন্দারাজনসু মহাক্কী স্কপ্লচর ‘ডি গ্রেট দিতেক্টর’ হায়বসিদা মিংচৎ পুরকখিবনি। লমদম অসিদা টেলেন্ট লৈবা ভিজ্যুএল আর্তিস কয়া লৈরি। ইন্দিয়াগী মমিং লৈরবা আর্ট ইন্সতিত্যুসনশিংদা তম্নরি। মীরমদা আর্টকি ওজা ফাওবা ওইদুনা মনিপুর মশক তাক্লি।পীক্লবা চীংলৈবাক্কি মনিপুরনা আর্টকি লমদা তৌরিবা খুদোল অচম্বা নত্তে।

                    আর্টিস পুখ্রম্বম প্রেমচন্দ্রগী ‘মেক মি চেঞ্জ’  স্কপচর

মনিপুরদা ভিজ্যুএল আর্তকি ফিদা নোংম- নোংমগী মতিক মগুন লৈবা হেনগৎলকলি। অসিগুম্বা ইকায়খুম্নবা অমদি শকখঙবীবগী ফিদা অমদি লাইওইখ্রবা লময়ানবা লাই য়েকপা ইপা ইপুশিংনা শেম্বীরমখি। মনিপুরগী আর্টকি পুৱারী অমদি মীরোল কয়াগী মমাংদগী শেমদুনা অমদি মখোঙ শোমদুনা লাকখি।  মিৎয়েং শান্না উবা অহল লমনশিংনা ১৯৭২ মনিপুর আর্ট সোসাইতি লিংখৎখি। চহী অসিমক্তদা মনিপুর স্তেত কলা একাদেমিসু থবক হৌখি। লমদম অসিগী কলা সংস্কৃতি য়োকখৎনবা অমদি হৌরক্লিবা মীরোলশিংদা ঐখোয়গী ইনাক খুল্লবা কলচরগী ভেল্যুসশিং  মশক খঙহন্নবা হোৎনবদা থৌদাং চাওনা লৌদুনা লাক্লি। ঐখোয়না য়াম্না চাওথোকচনিংঙাই ওইরিবদি ১৯৪৯দা মতম অদুগী ভিজন্নরি আর্টিস মরু ওইনা ওজা হঞ্জবম শ্যাম্মো শর্ম্মানা মরু ওইনা লমজিংদুনা লমদম অসিগী লৈবাক লৈহাওদা আর্ত স্কুল লিংখৎখি। স্কুল অসি মমৈথংদা ১৯৫৯দা ইম্ফাল আর্ট কোলেজ ওইবসু ঙমখি। মীয়ামগী লাই য়েকপা ওজা শ্যামোনা কোলেজ অসিগী অহানবা প্রিন্সিপালসু ওইখি। কোলেজ অমা ওইরকনবা হোৎনবদা পুন্সি অমদি কৎথোকখি। পুন্সিগী পান্দমসু মসিনি। মীওইবা খুনাইগীদমক্তা য়াইফনবা থবক অমা মশক থোকনা তৌরম্বদুনি তান্নরিবা মীওই মপোকনা।  ইন্দিয়াগী অৱাং নোংপোক লমদমদা অসিগুম্বা লাই য়েকপা শাবগী প্রিমিয়র ইন্সতিত্যুট অমা মনিপুরগীদমক থম্বীরম্বসি কয়াদা লাইবক ফরিবনো ঐখোয় পুম্নমক্কিদমক্তা। হৌখিবা চহী খরসিদা অমুক ঙসিগী মীরোলদা লমজিং লমতাক ওইনবা হেন্না অৱাংবা থাক্কি মহৈ মসিন তম্বদা হিমায় চুম্নবগীদমক্তা মনিপুর য়ুনিভর্সিতিদা অমদি মনিপুর য়ুনিভর্সিতি ওফ কলচরদা ভিজ্যুএল আর্টকি দিপার্টমেন্ট হাংদোক্লে। ঙসিদি টেলেন্ট লৈরবা হৌরক্লিবা মীরোল কয়া ইন্সতিট্যুটশিং অসিদা অৱাংবা থাক্কী মহৈ তম্নরি। একজিবিসন কয়া লেপ্তনা পাঙথোক্লি। মনিপুর স্তেট কলা একাদেমিনা চহীগী ওইনা আর্ত একজিবিসনশিং শিন লাংদুনা পাঙথোক্লি।  মপাল লমদা ফাওবা স্তেট কলা একাদেমিনা শিন্দুনা লমদম অসিগী ভিজ্যুএল আর্টিসশিংগী নিংথিজরবা কলাগী পোত্থোকশিং উৎতুনা লাক্লি। আর্ত সোসাইতি মনিপুরনসু থৱায় য়াওনা লমদম অসিগী লাই য়েকপগী কলা অসিবু মালেমগী মীয়ামদা মশক তাকনবা থবকশিং লেপ্তনা পাঙথোক্লি। 

মিনিস্তর ফোর কলচর অমসুং টুরিজম, গাজেন্দ্র সিংহ শেখাৱাটনা আর্টিসপুখ্রম্বম প্রেমচন্দ্রদা মনা খুৎশিন্নখিবা 

নেসনেল অমসুং ইন্টরনেসনেল্গী থাক্তা মনিপুরগী কলা সংস্কৃতিগী মফম য়াম্না চাওনা কন্দুনা লাক্লিবা মরকসিদা হন্দক পাঙথোকখিবা ৬৪শুবা নেসনেল একজিবিসন ওফ আর্টতা ইন্ডিয়াগী ওইনা য়াম্না লেমজনিংঙাই ওইরবা নেসনেল লালিট কলা একাদেমি এৱার্দ লমদম অসিগী স্কপচর আর্টিস পুখ্রম্বম প্রেমচন্দ্রগী ‘মেক মি চেঞ্জ’ হায়না মিংথোনবা অসিদা পীখি। ইন্দিয়া পুম্বদা লৈরিবা ভিজ্যুএল আর্টিস কয়ানা থাজিল্লকপা আর্ট ৱার্ক ৫৯০০ হেনবদগী অমুক ২৮৩ খনগৎপদা প্রেমচন্দ্রগী স্কল্পচরসু য়াওখি অমদি ফাইনেল জ্যুরিনা মনা ফংলবা আর্ট ৱার্কশিংগী মিং লাওথোকলকপদা প্রেমচন্দ্রসু য়াওখি। তরাই তরাইবা থবক অমদি নত্তে। মনা অসি ফংবদি ইচম চম্নদি হেক্তা ওইথোকপা নত্তে। হোৎনবা কনবা থম্মোয় শেংনা আর্টপু নুংশিবা অমদি চংই। আর্ট হায়বসিদদি নাপল য়াদে। মাদি ক্রিএসননি অমদি ভিজননি। তৌশিন্নবসু খক য়াদে। প্রেমচন্দ্রগী হোৎনজমল মহৈ য়ানবা হৌরকপনি হন্দক্কি খোঙফম অসিমক।  ইন্দিয়াগী ওইনা ভিজ্যুএল আর্টিস ২০ মখোয় মখোয়না য়েক্লিবা শারিবা আর্ট ৱার্কশিংদা থোইদোক হেন্দোকপা মগুনশিং য়াওবনা লেমজনিংঙাই ওইরবা মনা অসি একাদেমি অসি লিংখৎখিবগী ৭১শুবা মপোক কুমওন থৌরমগা মরি লৈননা হৌখিবা আগস্ত ৫দা  কমানি ওদিতোরিয়মদা পাঙথোকপা চিংলেম্লবা থৌরম অমদা লৈবাক অসিগী য়ুনিয়ন মিনিস্তর ফোর কলচর অমসুং টুরিজম, গাজেন্দ্র সিংহ শেখাৱাটনা অথোইবা মীথুং ওইদুনা মনা মথুমশিং আর্টিসশিংদা খুৎশিন্নখি।       

লেমজনিংঙাই ওইরবা লালিত কলা একাদেমি মনা ২০২৫ ফংলবা পুখ্রম্বম প্রেমচন্দ্রা সিংহ ককচীং নীংথৌ লৈকাইদা লৈবা পুখ্রম্বম ইন্দ্রজিৎ অমদি পুখ্রম্বম ওংবী তাবাবী অনীনা মচা পিবা ২ অমদি মচা নিংঙোল অনী পোকচবগী মনুংদা প্রেমচন্দ্রনা অহুমশুবনি। মহাক ১৯৮৭কি মার্চ ২দা তাইবঙ খোঙদারকখি। কলাগী লম অসিদা লমজিং লমতাক তৌরকপশিংগী মনুংদা মহাক্কী হেক পোকমিন্নবা ময়াম্বা প্রেমজিৎনা মনাওনুপাবু হিমায় চূমদুনা লাকখি। পনবা য়াবদি প্রেমচন্দ্রগী ময়াম্বসু স্কল্পচরগী আর্টিস অমনি। 
লাই য়েকপা শাবা পামজদুনা লাক্লবা পুখ্রম্বম প্রেমচন্দ্রনা মখা তানা হেন্না অৱাংবা থাক্কী মহৈ তম্নবা হায়দুনা ২০১২তা  IKSVV Khairagarh (Chhattisgarh)দা বি এফ এ স্কল্পচর তমথখি। মসিগী মতুংদা স্কল্পচরদা  MVAসু অমুক  MSU Baroda (Gujarat) লোইশিনখি। ২০১৩দা পাঙথোকপা মনিপুর স্তেট কলা একাদেমিগী আর্ট একজিবিসন্দা মহাক য়াম্না নহা ওইনা লাই য়েকপা শাবদা মনিপুর স্তেট  কলা একাদেমি এৱার্দ ফংখি। চহী অসিমক্তদা মহেন্দ্রা পণ্ডীয়া ফাউন্দেসন এৱার্দসু ফংখি। ২০০৯দগী হৌনা তোঙান তোঙানবা মনা কয়া ফংদুনা লাকখি প্রেমচন্দ্র।মসিগী মনুংদা ২০১১-১২তা মিনিস্ত্রি ওফ কলচর গোভর্মেন্ট ওফ ইন্দিয়ানা পিবা য়ং আর্টিস স্কোলারশিপসু ফংখি। থবক লেপ্তনা শুখি। লাইরিকশু লেপ্তনা তমথখি। হোৎনবা কনবা, অখাং কনবা অমদি নিংহন্নবা লৈখিদে কলাগী লমদা। মসিগী মহৈ ওইনা ২০১৫-১৬দা লালিট কলা একাদেমিগী রিসার্চ স্কোলরসিপ অমুক ফংখি। অদুগা অমুক ২০১৯-২০ অমদি ২০২১-২২দা মথং শিৎনা ক্রাফ স্তেট এৱার্দ অমসুং মোদর্নাইজেসন এৱার্দ স্তেটকি থাক্তা পীবা মনাশিং ফংখি। ২০১৯দা মহাক য়ুজিসি নেট একজাম মায় পাকখি। আর্টকি থিওরি ময়ামসু কলেজ অমদি য়ুনিভর্সিতিদা তম্না-তম্না অমুক স্কল্পচরদি শুবা লেপখিদে। মীওইবনা হোৎনবদা ঙমদবা লৈতে হায়বদু থবকনা উৎলকই। ব্রাজিল্গী মমিং লৈরবা নোভেলিস পাউলো কোইল্লোনা মহাক্কী দি অল্কেমিস্তা হায়বদু য়াম্না চুম্মি, “ And when you want something, the whole universe conspires in helping you to achieve it" প্রেমচন্দ্রনা ঙসিদি মনিপুরগী মায় পূদুনা লাক্লি। ঐখোয় পুম্নমকপু কয়াদা চাওথোকচহল্লিবা। ককচীং ইমাবুসু মোমোন নোকহল্লে। অসিগুম্বা শিংথানিংঙাই ওইরবা মিংচৎ পুরকপসিদা অমুক্কা হেন্না হরাও নুংঙাইরিবশিংগী মরক্তা লমদম অসিগী ভিজ্যুএল আর্তিসকি কম্যুনিতিসু তশেংনা থম্মোয় পেঞ্জরি। প্রেমচন্দ্র ২০২৪দা মণিপুর য়ুনিভর্সিতিগী দিপার্টমেন্ট ওফ ফাইন আর্টসতা পি ঐচ দি রেজিস্ত্রেসন তৌদুনা হৌজীক হৌজিক রিসার্চ তৌরি। অদুগা ইম্ফাল আর্ট কোলেজতা গেস্ট ফেকল্টি ওইনা স্কল্পচর তাকপী তম্বীরি। মসিগী মরক্তা ইন্ডিয়াগী অমদি মনিপুরদা পাঙথোকপা আর্ট একজিবিসন অমদি আর্ট ৱার্কসোপ অমদি আর্ট কেম্প কয়াদা লেপ্তনসু শরূক য়াদুনা আর্তকী লমদা চংশিনবা লেপ্ত্রি। য়াম্না অঙনবা মতমদা শকনাইরবা ওজা থোইদিংজম তোম্বীনা অসিগুম্বা লালিট কলা একাদেমি মনা অসি ফংলকপদা য়াম্না হরাওনখি, চাওথোকচখি। নীংশিংবা য়াবদি হৌখিবা ২০১৩-১৪গী ওইনা ককচীংদগী নোংমাইথেম নন্দারাজনসু মহাক্কী স্কপ্লচর ‘ডি গ্রেট দিতেক্টর’ হায়বসিদা মিংচৎ পুরকখিবনি। লমদম অসিদা টেলেন্ট লৈবা ভিজ্যুএল আর্তিস কয়া লৈরি। ইন্দিয়াগী মমিং লৈরবা আর্ট ইন্সতিত্যুসনশিংদা তম্নরি। মীরমদা আর্টকি ওজা ফাওবা ওইদুনা মনিপুর মশক তাক্লি।পীক্লবা চীংলৈবাক্কি মনিপুরনা আর্টকি লমদা তৌরিবা খুদোল অচম্বা নত্তে।   
লমদম অসিগী ফাইন আর্টকি মফম অমা কন্নবা হোৎনবদা ঙসিদি তোঙান তোঙানবা আর্ট লভর অমদি আর্টিস মশা মশানা ফাওবা হোৎনজদুনা প্রাইভেট আর্ট গেল্লরি ফাওবা হাংদোকনরক্লি। অসিগুম্বা ময়ামসিগী মরক্তা আর কে সি এস আর্ট গেল্লরি এন্ড ম্যুজিয়ম য়াম্না শিংথানিঙাই ওইবা থবক তৌরি। ইম্ফাল আর্ট গেল্লরিসু ঙসিদি হেন্না মমিং লৈরক্লি। আর্ট ইভেন্টশিং লেপ্তনা শিল্লি। আই আর্ট গেল্লরিসু থবক লেপ্তে। আর্টকি ইহৌ অমা লাক্লি। মসি পুম্নমকনা শৌগৎপা অমদি পুকনিং থৌগৎফম থোকই। মনিপুরগী ফাইন আর্টনা মালেমদা মশক তাক্লকপা মতমসিদা লমদম অসিগী আর্ট লভরশিং অমদি আর্ট তৌরিবা পুম্নমকনা হন্দক প্রেমচন্দ্রনা লালিট কলা একাদেমি মনা ফংলকপদা থম্মোয়দগী অতৎ অখম লৈতনা হরাও নুংঙাইবা ফোংদোকনরক্লি। হেন্না হেন্না মায় পাকপসু ওইসনু অমদি হৌরক্লিবা মীরোলশিংদগীসু হেন্না মায় পাকপা অমদি মিংচৎ পুরকপা ঙম্বসু ওইসনু।