• 777
• ১২ই ডিসেম্বর ২০২৩ ইং
• Share on:

পালাদা শেল থাবগী চৎনবী লেমজনিংঙাই নত্তে - - চোংথাম থোইবা

সরকারগী থবক্তগী পোত্থারবা ঈশৈদি ময়েক অমা ফাওবা চুম্না শকপা হৈতবা কয়াসু ঈশৈ তৌরিবনি হায়দুনা পালা য়াওদুনা শেল তান্নবা হোৎনরকপা অসি উনরবনি। মসিবু কলাগী থাক ৱাংখৎহন্নবরা? চৎনরিবা শেল থাবগী মওং অসি শক-মায় য়েংনবগী ৱাখলদা য়ূম্ফম ওইবনি নীংই।

মান্ডপ ময়াইদা পালাদা শেল থাবা ঈরাংগী থৌওংনি, চৎনরিবা পালাগী নুংগী ওইবা অর্থদি কনানসু খন্নরুদে। ঈশৈ য়েংলিবা নত্রগা তারিবশিংগী চাদা ৪/৫ ফাওবনা, কর্মধারী অদুগী নত্রগা থৌরম অদুগী মরমদা অৱা-নুংঙাই শরুক য়ানবগী ৱাখল থোইনা য়াওরোই। শক্লিবা ঈশৈ অদু য়াম্না নুংঙাইদুনা শেল থাবসু নত্তে। থাঙ্গৈ শেংবদি ঈরাংদা ইতাউ তাউনা থাবা শেলনি। ঙসিগী য়াম্না কন্না চৎনরিবা শেল’মথা অসিনা জাতি অসিগী কালচারগী শরুক অমা ওইহনবদা লেমজনিংঙাই করিসু ওইরোই হায়বদা লাল্লোই।
য়াম্না ঙল্লিঙৈ মতমদদি নুংগী ৱাখল্লোনদা য়াম্না শেংনা অমদি চম্না চৎনরম্মী। পালাদা নগুণ অঙম্বা পৈশা য়াম্লবদা শেল সিকি অমত্তং দক্ষিনা তৌজরগা অদুম শক শোল্লম্মী। শেল থাবা চৎনবা হৌরকপা মতমদা ফাওবা পুং য়ৈবা, ঈশৈ শকপা, দুহার খোনপাংবদংদা শেল থাবগী চৎনবী লৈরম্মী। মসিদসু নত্তনা পালা মরক্তগী কনাগুম্বা ঈশৈ ফজনা শক্লকপশিং অদুদা অখন-অখন্ননা পেন্দুনা শেল থানরম্মী। পালা য়াওরিবশিং অদুসু ঈশৈ খুমবাংবা কর্মগী মাঙওইননা ঈশৈ তিন্নবা কয়া চৎনরম্মী। মমৈথংদা শেল অমদি ফি থানবা হেনগৎলকপদগীনি লৈকায় পালা য়াওহন্নবগী লৈকায় লৈকায়গী চৎনবী শেম্নরকই। মসিদা লৈকায়দা ৱাথোক কয়া অমা অমুক থোক্লকখি। লৈকায় পালাদ দুহার নত্রগা খোনপাঙবা ওইহন্নরম্মী। ‍হৌজিক্তি পালাদা শেল থাবগী ঈরাং থাক য়াম্না ৱাংনা লৈরে। লুপা ১, ২, ৫ দগী ঙসিদি লুপা ১০ চৎপীনা খুজিং ওইনরক্লে।

অদুগা নাকল অমরোমদনা, সমাজ অসিদা লৈরিবা লৌমি-শিম্মী কয়াগী নোংমগী খুৎশুমনদি য়াম্না পীনিংদনা পীনরি। নোংমগী অয়ুক পুং ৯/১০ দগী নুমিদাং ৱাইরম পুং ৪/৫ তাবা ফাওবা মপাঙ্গল তেকপা মখৈ থবক শুজরুরগা লুপা চহুমসি য়াম্না ৱানা ফংই। লৌমী-শিম্মীশিংদি সমাজ অসিগী য়াংলেন শরু ওইরিবনি। অদুগা পালা/ঈশৈ তৌবশিংনা করিগুম্বা পোৎ অমত্তংসু পুথোক্নরোইদবা উতাংবী গুম্লবা কাঙলুপনি। মখোয়দা শেল থাবা অসিনা খুন্নাই অসিগী কালচারদা কয়াদ ফাওবা লেমজনিংঙাই শরুক য়ারিবগে নৈননিংঙাইনি। শেল থাবগী চৎনবী অসিনা কলাগী মগুণ অদু হেনগৎহল্লি হায়বা অদুদি লানগনি। শেল থাবা তোক্লগা কলাগী মগুণ হেন্নদুম হেনগৎকনি খল্লি। কনাগুম্বা সংস্থান অমনা শিনবা ওইরবদি ‘মান্ডপতা চঙলগা শেল থাবিগনু’হায়দুনা লাওথোকপা নত্রগা প্লে-কার্ড থেৎতুনা থম্বা য়াওনরিবনি।

সরকারগী থবক্তগী পোত্থারবা ঈশৈদি ময়েক অমা ফাওবা চুম্না শকপা হৈতবা কয়াসু ঈশৈ তৌরিবনি হায়দুনা পালা য়াওদুনা শেল তান্নবা হোৎনরকপা অসি উনরবনি। মসিবু কলাগী থাক ৱাংখৎহন্নবরা? চৎনরিবা শেল থাবগী মওং অসি শক-মায় য়েংনবগী ৱাখলদা য়ূম্ফম ওইবনি নীংই। কর্মধারীগী থৌদোক অসিদা করম্না অমুক্তং শেল থাবা চংলোইদৌরিবনো হায়বসিনা মরু ওইনা খন্নৈ। কর্মধারী অমগী ঈশৈদা শেল থাবা য়াম্না চঙবিদ্রবদি মরূপ সঙ্গ লৈজদবনি হায়না খন্নবগী মওং অমুক্কসু লৈ। শম্না হায়রবদা মীনা করি হায়খিগদগে হায়বগী ঈজ্জৎ তান্নবা ৱাখলদা শেল থানবা ঙাক্তনি হায়বদা লান্নিংঙাই লৈতে।

কলাদা মগুণ হাপ্নবা থাবা শেল নত্তে। শেল থাবগী মওং অসিনা মান্ডপ ময়াই অসি শেল কায়থোক কায়শিনগী পুমলাং লাঙবদা ব্যাঙ্ককী একাউন্টকা মান্নরে। শেল অচোইবা কায়থোক কায়শিন তৌনবদা শেল হেন্না লৌখিগদ্রা হায়বগী য়েংনবদসু ঈশৈ শক্কনি হায়বা কাউনবগুম উদবসু নত্তে। পালানা শেল অদুগী থীদোক-থীজিন তৌরিবা অসিমক য়েংবদা সংকীর্ত্তনগী অশেংবা মশক মাঙহল্লি শেল থাবা চঙলকপশিং খরনসু পালাদা শেল য়াম্না থারকখিগনি হায়বগ ঈঙ্গিৎতা শেল চবুন অমা পায়শিল্লগা লুপা চাম্মা চৎপীনা মখা-ককা থারদুনা উত্তুনা চঙলকপসু য়াওদবা নত্তে। য়েংবদা য়াম্না মীৎ নাবা করেম্নবসি তোয়না থোক্লি। অদুগা ঈশৈ শকপশিংনসু শেল খরা থারকখিগদবা উরবদি ঈশৈ য়াম্না থৱায় য়াওনা কুইনা শক্নবা হোৎনৈ। চৎনবী অসিনা নুংগী ওইবা অশেংবা ৱাখল অদু মাঙহল্লি। শক শোল্লিবসি শেলগী শেনথাগী চৎনবীগী খুদোংচাবা অমনি ওইজ ওইথক্কী ৱাখলগী মখা পোল্লি।

শেল থাবগী চৎনবী অসিনা ঈশৈ তৌবশিংদগী মোরেল অমদি অশেংবা ৱাখল অদু মাঙহল্লি। হান্না বার্তোনদি লৌশিল্লুরবা কর্ম অমগীদা শেল য়াম্না থারক্লোইদবা ফিভম লৈরবদি সঙ্গ ফবা ইনাক কৈরাক খুনবা কনাগুম্বনা কোন্না তৌরকপা বার্তোন অদু লৌশিল্লগা অহানবগী বার্তোন হায়দোক্লকপসি তোয়না থোক্লি অমদি ঈশৈ তৌরিবশিংগী মোরেলগী থাক উত্থোকই।
ফিভম পুম্নমক অসিবু সমাজ অসিদা লৈরিবা ময়াম্না থোইনা খন্থরুদে। মীনা তৌই/তৌনৈ/তৌনমাল্লে হায়দনা ভাব ইতা হেক তাদনা মথং মথং খুদুং ইন্নরুবদগী ঙসি লেমজদ্রবা চৎনবী অসিবু কালচারগী মচাক অমা ওইহল্লিবসি জাতি অসিগী লেমজনিংঙাইদি নত্তে। পৃথিবীগী  জাতি অমত্তনা হরাও কুম্মৈ নত্রগা অশি-অনাগী কর্মগী থৌদোক্কী ঈশৈদা শেল থাবগী মওং অসি চৎনদে। ঈশৈ/পালা অসি তৌদ্রবসু য়াবসিবু য়াম্না মরু ওইনা লৌনরিবা অসিমক য়াম্না ঙক্নিংঙাইনি। শিরমদাইদা ফমাংদা শরাত খক শোনবা অমসুং অশিবা পুথোক্লমদাইদগীনা পোৎলোইরিবা মফম অদুদা ফাওবা শেল থাবগী চৎনবীসু নুংগী ওইবা করম্বা অশেংবা ৱাখলনো? খন্থনসি। কনাগুম্বা অমা হেক শিবদা পোৎলোইবগী মশা তুমদ্রিঙৈদা ‘পালা কনানা শকহনগনি’ হায়না পুমলাঙ লাঙদুনা ঈশৈ বার্তোনগীদমক কোইচেন চেন্নৈ। ঈশৈগী পুমলাঙ লাঙনবদা লৈখিদ্রবা ইমুংদুগী নুংঙাইতবা অমদি অৱাবা ফোঙদোকপা শঙনদ্রে। অদুগা চহী ফারক্তুনা কুমওন ফিরোই অমুক লাকপদা চৎনবী অমা অমুক হৌদোরক্লে। লাক্লিবা মী অয়াম্বনা ঈশৈদা শেল থানৈ। মসিবু য়াম্না নোক্নিংবা মওংনি কর্মধারী অদুনা মরন্নাই দক্ষিনা তৌজগদবদু মীয়াম্না নাকোইননা পীহনবা ওইনা থোক্লে। ঈশৈ নুংঙাইবা/নুংঙাইতবা থাবা অমুক্তংদি চঙদবা য়াদবগী ৱাখলদা মী অয়াম্বা তয়রিবা লাক্নরে। মসিনা ফিরোই অসি হোটেল অচৌবগা চপ মান্নরে। মসিবু ফজবনি লৌনগদৌরিবরা? চাক্কী মমল অদু নাকোইননা পালানা লৌহনবগী ৱাফমতনি। থারিবা শেল অসি লৈখিদ্রবগীদমক্তি কনাগুম্বা অমত্তনা অৱাবা, নুংঙাইতবা খনবিবা, ফোঙদোকপীবা লৈতে। ঈশৈ শক শোল্লিবশিংগী অৱামল অসি য়ানবগী চাং অমদা য়ূম্বু অদুনা পুন্না দক্ষিনা তৌজবনা হেন্না পুম্নমক্কী লেমজনিংঙাই ওইগনি।

কোর্টেসি - মরূপ

*(চোংথাম থোইবগী ‘য়াওল্লক্তগী’ হায়বা ৱারেং লাইরিক্তগী লৌথোকপনি)