• 7
• ৮ই জুন ২০২৪ ইং
• Share on:

ত্রিপুরাদা মণিপুরী মশীং - আরকে তরুনজিৎ সিংহ

চহীচা কয়া কুপশিন ফুমজিদুনা লৈরুরবা ত্রিপুরাগী মৈতৈগী পুৱারীবু ঐখোয়না মশক থোক্না খঙবা ঙম্বসি পংকুই কুইদ্রি। মণিপুরগী 'চৈথারোল কুম্বাবা'গুম্না ত্রিপুরাগী 'রাজমালা'সু শীংথানিঙাই ওইরবা পুৱারীগী মশকনি। অদুম্নদি ওইরগা 'রাজমালা' দা ত্রিপুরাদা লৈবা মণিপুরী মরমদা পনবা কয়া য়াওরবসু মপুং ওইবা মণিপুরীগী মরমদা খোমজিল্লগা ফোঙবদি য়াওদে।

মপান মণিপুরদা চোইজাইননা তাখ্রিবা মরু ওইনা তখেন ত্রিপুরাদা মণিপুরীশিংনা করম্বা মতমদগী খুন্দা লৈতাখিবনো, করম্না খুন্দাবা হৌরকখিবনো, ত্রিপুরাদা মণিপুরী মশীং, মখোয়গী পুন্সি মহীং, মহারাণী, রাণী লৈমাশিংগী থৌদাং অমসুং সংস্কৃতি, সমাজগী শক্তম, লাইনিং লাইশোন, হৌন-লোনচৎ নচিংবা মতৌ মওং করম্না লৈখি অসিনচিংবা ৱারী লীখুনশিং খোমজিল্লগা অহানবা ফোঙবা হৌরকপসি 'শরৎকী ঈচেল' হায়বা মণিপুরী জর্নেলদনি।
১৯৬৯ খৃঃদা ত্রিপুরাদগী মণিপুরী লোলদা ফোঙবা চয়োলগী পাউচে 'মরূপ' অমসুং পাউচে অসিনা ফোঙবা চহীগী জর্নেল 'শরৎকী ঈচেল' দা মথং মনাও নায়না তখেল মৈতৈগী পুৱারীবু মশক থোক্না ময়ামদা শকখঙহনবদা চাওনা থৌদাং লৌখিবসি রাজকুমার কমলজিৎ সিংহ নি। মরমদি মসিগী মমাংদা মৈতৈশিংগী মরমদা রাজমালাদা খরা যাওবা নত্তনা থোইদোক্না মপুং ওইবা লাইরিক অমত্তা ফোঙবা লৈখিদে। 'শরৎকী ঈচেল' দা রাজকুমার কমলজিৎ সিংহনা ইবা 'ত্রিপুরাগী মৈহৌরোলদা মৈতৈ' হায়বা ৱারেংসি লাইরিক ওইনসু ফোঙদোকখ্রে।

লাইরিক অসি তখেনদা খুন্দাবা মৈতৈগী পুৱারীবু মশক তাক্লিবা মণিপুরীশিংগী ট্রেজারনি হায়বদি মমল য়াম্লবা মৈতৈগী পুক্কৈনি। তশেংনা হায়রবদা 'মরূপ' অমসুং 'শরৎকী ঈচেল' ফোঙলমদ্রবদি ঙসিসু ত্রিপুরাদা মণিপুরীগী মরমদা খঙবা হোৎনবদা য়াম্না ৱানা থোক্লমগনি। মশীং লিকচরবসু মীরোলগী মরক্তা ত্রিপুরাদা চহীচা কয়া মমাংদগী খুন্দারক্লবা মণিপুরীশিং মশাগী লোল, সাহিত্য, নাৎ সংস্কৃতি নচিংবা জাতি অসিগী তোপ তোপ্পা তোঙানবা ইতিহাসসু লৈজৈ হায়বা ৱাখল্লোন অসিদা রাজকুমার কমলজিৎনা হিংলিঙৈ মতম অমসুং অদুগী মমাংদা হিংদুনা লৈরম্বা অহল-লমনশিং অমসুং অখঙ-অহৈশিংদগী তাজহৌবা চিন্থাং ৱারী ময়ামশিং অমসুং ত্রিপুরা সরকারগী মতম মতমদা ফোঙবা গেজেটতা মৈতৈগা মরী লৈনবা ৱাফম কয়াশিং অদু খোমজিল্লগা ফোঙবা হৌরকখি।

অসুম্না মৈতৈগী পারী-পুরী হৌরকফমগী ৱারী লীখুন ইথোক্না ফোঙলমদ্রবদি ত্রিপুরাগী মণিপুরীগী মরমদা খঙবদা অতৈসু খেলেমগনি। ওসিদি লমদম অসিগী অইবা, থিজিন খোমজিনবা খুৎমাবা মীওই কয়ানা বাংলা অমসুং ইংরেজি লোলদা ফোঙদুনা ত্রিপুরাগী মৈতৈগী পুৱারীবু অতৈসু মশক থোক্না খঙহনবদা খৌদাং লৌরক্লি। মসিগী দমক অহানব'মক্তদা লৈখিদ্রবা রাজকুমার কমলজিৎকী মফমদা তৌবিমল অমদি ইকাইখুম্নদবা ঙমদে।

তখেন মহারাজ বীরচন্দ্র মানিক্যগী মতমদা ১৮৭২ খৃঃদা ত্রিপুরাদা অহানবা ওইনা মী মশীং থিবা সেন্সাসকী থবক পাঙথোকখি। মদুদা ত্রিপুরাগী মীশিং অসি শুপ্না ৩৫,২৬২ খক্তনি। মণিপুরী মশীংদি খঙবা ঙমখিদে। চহী খরা লৈরগা ১৮৭৫ খৃঃদা W..W..Hunter সাহেবকী "A Statistical Account of Bengal"গী মী মশীং থিবগী রিপোর্ট মতুং ইন্না ত্রিপুরাদা মণিপুরী মশীং ৭০৪৫ লৈরে হায়না পল্লি। তৌববুদি বৃটিশ সরকারনা ভারতকী তোঙান তোঙানবা দেশীয় রাজ্যগী নিংথৌশিংদা মাগী মাগী লৈবাক্কী মীশীং থিবা 'সেন্সাস' তৌবীয়ু হায়জবদগী ১৯০১ খৃঃদা ভারতকী অতৈ অতৈ মফমদা সেন্সাস তৌবগুম্না নিংথৌ রাধাকিশোর মহারাজগী মতমদা তখেন ত্রিপুরাদসু মী মশিং থিবা 'সেন্সাস'কী থবক চত্থখি।

১৯০১ খৃঃদা সেন্সাসকী মতুং ইন্না ত্রিপুরাগী মী মশীং অসি ১,৭৩,৩২৫ নি হায়না পল্লি। মদুদা মণিপুরী মশীং অসি ১২,৮৫১ (নিপা ৬৭৫৫, নুপী ৬০৯৬) অদুগা মণিপুরী মুসলিম (মৈতৈ পাঙন) মশীংনা ৪০৫ (নিপা ১৯৫, নুপী ২১০) খক্তনি। ত্রিপুরাগী সদরদা মণিপুরী ৬,৬৮৪, কৈলাশহরদা ৩,৬৫২, ধর্মনগরদা ১৯৭৩, খোয়াইদা ৩৬১ অমসুং সোনামুড়াদা ১৮১ মণিপুরী লৈ হায়না সেন্সাসতা পল্লি।
অদুগা সেন্সাসকী মতুং ইন্না মতম অদু আগরতলাদা মী মশীং অসি ৬৪১৫ খক্তা লৈরম্মী হায়। আগরতলাদা লৈবা অয়াম্বা মীশিংদি মৈতৈ অঙম অথৌ অমসুং নিংথৌগী ঙাইশেন, মরীমতা, ঠাকুর পরিবারগী ঙাক্তনি। অসুম্না মথং চহী তরা মতুংগী (১৯১০ খৃঃ)সেন্সাসতা ত্রিপুরাগী মী মশীং ২,২৯,৬১৩ লৈখি, মদুদা মণিপুরী মশীং ১৬,৩৮১ (নিপা ৮৭১৭, নুপী ৭৬৬৪) হায়না পল্লি। ১৯২০ খৃঃগী সেন্সাসতা ত্রিপুরাগী মী মশীং শুপ্না ৩,০৪,৪৩৭ লৈবদা মণিপুরী মশীং ১৫,৫৪৯ লৈখি। চহী তরা তরা মতুং পাঙখোক্লিবা ১৯৩১ খৃঃগী সেন্সাসতা ত্রিপুরাগী মী মশীং ৩,৮২,৪৫০ লৈবদা মণিপুরীগী মশীংনা ১৯,২১০ (নিপা ৯৮৭২, নুপী ৯৩৩৮) লৈখি। মদুদা আগরতলা টাউনদা মৈতৈ ২৫৩, সদর আগরতলাদা ৪৯৭০, কৈলাশহরদা ৮৭৫০, ধর্মনগরদা ৪২১৮, খোয়াইদা ১০১৯ লৈরম্মী হায়না পল্লি।

ভারত নীংতম্বগী ঈহৌ ত্রিপুরাদসু মমি তাবা হৌখি। ১৯৪৭ খৃঃদা ভারতনা নীংতম্বা অদুগা ১৯৪৯ খৃঃদা ত্রিপুরানা ভারজ মর্জ তৌখিবা মতুংগী ১৯৫১ খৃঃগী সেন্সাসতা ত্রিপুরাগী মী মশীং খংহেন হেনগৎলকখি। শুপ্না ত্রিপুরাদা মী মশীং ৬,৩৯,০২৯ ওইখি। মদুদা চিংমী মশীং অসি ১,৯২,২৭০ নি অদুগা মণিপুরীগী মশীংনা ১৯,০৮৬ নি হায়রি। অদুবু ভারত সংবিধানগী বেকৱার্ড ক্লাসেসকী মতাংদগী ১৯৫১ খৃঃদা ত্রিপুরা স্টেট মণিপুরী শিক্ষা সমিতিনা থৌনোম্লগা ত্রিপুরা মণিপুরী কল্যান সমিতিনা ফোঙবা সেন্সাসতা ত্রিপুরাদা মণিপুরী মশীং লিশি ৩০ লৈরে হায়রি।

অদুবু সেন্সাস অনুগী অকুপ্পা মরোল অমসুং রেকর্ড ফংদবনা তশেংবদু খঙবা ঙমদ্রে। নীংতস্বগী ঈহৌদা ভারত-পাকিস্তান অনী খায়দোক্নবদা নোংপোক পাকিস্তান (হৌজিক্কী বাংলাদেশ) দগী হিন্দুশিং ত্রিপুরাদা চঙশিল্লকপা হৌখি। মসিনা মরম ওইদুনা ত্রিপুরাগী মীশীংগী চাং খংহেন হেনগৎপা ওইরম্বা য়াই। অসুম্না মতম অদুদগী তপ্না তপ্না নোংপোক পাকিস্তানন্দগী লেপ্পা নাইদনা মীকোপ চঙশিল্লপনা মরম ওইদুনা ত্রিপুরাদা য়েলহৌমী মশীংগী চাংদা চাওনা অহোংবা লাকপা হৌরকখি। মথংগী ১৯৬১ খৃঃগী সেন্সাসতা ত্রিপুরাদা মী মশীং ১১,৪২,০০৫ য়ৌরে। চিংমী মশীংনা ৩,৬০,০৭০ নি।

মণিপুরীনা ২৭,৯৪০ হায়না পল্লি। ১৯৭১ খৃঃগী সেন্সাসতা ত্রিপুরাগী পাক চাওরবা লম স্কোয়ার মাইল ৪১১৬ নি। অদুগা মী মশীংনা ১৫,৫৬,৩৪২ নি হায়না পল্লি। সেন্সাস রিপোর্টতা চিংমী মশীং য়াম্না হস্থখি ৪,৫০,৫৪৪ নি খক্তা হায়না পল্লি। অনুগা মণিপুরী মশীংনা ১৭,১৪৪ অনুগা বিষ্ণুপ্রিয়া মশীংনা ১৮৮৪ হায়না পল্লি। মণিপুরীদগী শরুক অমা তোঙাননা বিষ্ণুপ্রিয়া হায়বা মীংখোনদা সেন্সাসতা শক তাকপা হৌবদগী মণিপুরী মশীং হন্থরকপা ওইরম্বা য়াই। ১৯৮১ খৃঃগী সেন্সাসতা ত্রিপুরাগী পাক চাওরবা লম অসি স্কোয়ার কিঃমিঃ ১০,৪৯১.৬৯ ওইখি। মী মশীংনা শুপ্না ২০,৪৭,৩৫১। ১৯৮১ গী সেন্সাস মতুং ইন্না মণিপুরী মশীং ১৭,৯৯৯ (নিপা ১০৭১, নুপী ৮৯২৮) অদুগা মণিপুরী মুসলিমনা ১৮০২ (নিপা ৯০০, নুপী ৯০২) নি হায়না পল্লি। মনুদা ত্রিপুরাগী নোংচুপ জিলা মনুং চনবদা মণিপুরী মশীং অসি ৯,৮৮১ নি। সদরদা ৬৩৯৩, আগরতলা টাউনদা

১৬৩৭, খোয়াইদা ১৮৫১ শুয়া ৯,৮৮১ নি। পনবা য়াবদি ১৯৬১ দী সেন্সাসতা মণিপুরী মীশিং ২৭,৯৪০ লৈরম্মী। সেন্সাসতা খুহিদগী মশীং য়াখা চহীনি। অদুবু ২০১১ গী সেন্সাসতা মণিপুরী মশীং ২৩,৭৭৯ দা হন্থরকথি। হায়বদি চহী ১০০ গী মতুংদসু ত্রিপুরাদা মণিপুরী মীশিং খোইদোক্না হেনগৎপা লৈত্রি।

১৮৭২ খৃঃদগী ২০১১ ফাওবনি সেন্সাসতা ত্রিপুরাগী মীশিং অমসুং মণিপুরী

সেন্সাস চহী      লম স্কোয়র/বিঃমিঃ       অপুনবা মীশিং                         মণিপুরী + মণিপুরী মুসলিম

১৮৭২              স্কোয়র মাইল ৩,৮৮      ৩৫,২৬১

১৮৭৪                                                  ৭৪,২৪২                       ৭০৪৫

১৯০০               স্কোয়র মাইল ৪,০৮৬    ১,৭৩,৩২৫                   ১৩,২৫৬ (মণিপুরী মুসলিম ৪০৫ য়াওনা) (নিপা ৬,৯৫০, নুপী ৬,৩০৬)

১৯১০               স্কোয়র মাইল ৪,০৮৬    ২,২৯,৬১৩                   ১৬,০৮১ (নিপা ৮,৭১৭, মুন্সী ৭,৬৬৪)

১৯২০               স্কোয়র মাইল ৪১১৬      ৩,০৪,৪৩৭                   ১৫,৫৪৯

১৯৩১               স্কোয়র মাইল ৪,১১৬     ৩,৮২,৪৫০                   ১৯,২১০ (নিপা ৯৮৭২, মুন্সী ৯,৩০৮)

১৯৪১

১৯৫১               স্কোয়র মাইল ৪,১১৬     ৬,০৯,০২৯                   ১৯,০৮৬

১৯৬১               স্কোয়র মাইল ৪.১১৬     ১১,৪২,০০৫                  ২৭,৯৪০

১৯৭১               স্কোরর মাইল ৪,১১৬     ১৫,৫৬,৩৪২                ১৭,১৪৪

১৯৮১               স্কোয়র কিঃমিঃ ১০,৪৯১,৬৯      ২০,৪৭,৩৫১     ১৯,৮০১

(মণিপুরী মুসলিম ১৮০২ য়াওনা)

(নিপা ৯৯৭১, নুপী ৯৮৩০)

১৯৯১               স্কোয়র কিঃমিঃ ১০,৪৯১,৬৯     ২৭,৫৭,২০৫     ১৯,৭৩৭

২০০১               স্কোয়র কিঃমিঃ ১০,৪৯১,৬৯     ৩১,৯১,১৬৮      ২০,৭১৬

২০১১               স্কোয়র কিঃমিঃ ১০,৪৯১,৬৯      ৩৬,৭৩,৯১৭     ২৩,৭৭৯

ত্রিপুরাদা হৌজিক হৌজিক জিলা ৮ গী মনুংদা মরু ওইনা জিলা ৬ দা মণিপুরী/মৈতৈশিং চোইজাইননা খুন্দা-লৈতাদুনা লৈরি। মণিপুরীশিংনা তাবা জিলা ৬ অদুদি:- (A) নোংচুপ জিলা, (B) সিপাহীজলা জিলা, (C) খোয়াই জিলা, (D) উনকোটি জিলা, (E) ধলাই জিলা অমসুং (F) অৱাং জিলা অসিনি। অতৈ জিলা ২ অদুদি গোমতি জিলা অমসুং খা-ত্রিপুরা জিলানি। হায়রিবা অনীদা লৈবা মৈতৈশিং অদুদি সরকারগী থবক তৌবা পোষ্টিং তাদুনা লৈবা ডাক্তনি।।

ৱারেং অসি ইবদা মতেং লৌজখিবা:-

১) শরৎকী ঈচেল, ১৯৮০, ১৯৮১।-ইডিটর, রাজকুমার কমলজিৎ সিংহ

2) Tripura the Manipuris Census-1981: By Tripura Manipuri Apunba Committee, Agartala,

৩) ত্রিপুরাগী মৈহৌরোলদা মৈতৈ, ২০১৫:- রাজকুমার কমলজিৎ সিংহ।

৪) তখেনগী পুৱারীদা মণিপুরী, ২০১৬ঃ- ৱাংখেম বীরমঙ্গল।