ইম্ফাল, জুলাই ০৮ : মণিপুরদা হৌজিক থোক্লিবা শাথিরবা থৌদোক অসিনা মরম ওইদুনা মখল কয়াগী অৱাবা মায়োক্নরিবা মীয়ামদা অঙম্বা মতেং খরা পাংনবগীদমক্তা হৌখিবা জুলাই ৫দা ত্রিপুরাদগী লাক্তুনা অমুকোগী ওফিসতা লৈরকখিবা টিম অসিনা মণিপুরগী মফম কয়াদা চৎতুনা অঙম্বা মতেং পাংবগী থবক চত্থরি হায়না অমুকোগী মাইকৈদগী ফোঙদোরক্লি।

হিরম অসিগা মরী লৈননা অমুকোনা থাদোরকপা চেরোল অমনা হায়, ত্রিপুরা মণিপুরী তেংবাং পুক্কৈ হায়না মীংথোনবা মণিপুরদা তেংবাং পীনবগীদমক লাক্লিবা টিম অসি ত্রিপুরাগী মৈতৈ লুপ খরা হায়বদি মণিপুরী লিটরেরি এন্দ কালচারেল ফোরাম ত্রিপুরা, তখেললৈমা তেংবাং লুপ ত্রিপুরা, মরুপ ওর্গানাইজেসন ত্রিপুরা অমদি ত্রিপুরা গৌরনগর মৈরা পায়বী হায়রিবা লুপশিং অসিনা পুনশিন্দুনা শেম্বনি।

ত্রিপুরা মণিপুরী তেংবাং পুক্কৈনা অমুক্কোগী থৌমীশিংগা পুন্দুনা মণিপুরগী মফম কয়াদা চৎতুনা খুল ঙাক্লিবা মীওই কয়াদা অমদি ময়ুম মৈ থাদোকপীখ্রবা মীওই কয়াদা শেলগী মতেং পাংদুনা লাক্লি। মসিদসু নত্তনা হৌজিক মণিপুরগী লম অমদি লৈঙাকলোনগী অপুনবগী শক্তম ঙাক্নবগীদমক্তা লান্থেংনরিবা মীওইশিংন অশোক অপন য়াওরকপদা মতেং পাংনবগীদমক লৈরিবা ভলন্টরি হেল্প য়ুনিট সেন্তার রিমসতসু লুপা লিশিং ১০গী মতেং পাংখি। খুল ঙাক্লিবা ভলান্টিয়ারশিংদা মখোয়গী মথৌ তাবা পোৎলম খরা রেইনকোর, খোংউপ বুট, টোর্চলাইটনচিংবসু মতেং পাংখি হায়রি।

সোর্স: হুইয়েন লানপাউ