• 6
• ২২শে অক্টোবর ২০২৩ ইং
• Share on:

ত্রিপুরাগী মণিপুরী

শ্রীরাজকুমার কমলজিৎ সিংহ

মৈতৈ নিংথেম মচাশিংবু মণিপুরদা লৈপাক্কী সম্মান পীবগুম আগরতলাদসু নিংথেম মচাশিংদা শাগৈ নাতৈগী ওইনা থা-থাদা শেন্থোং কোনুংদগী পীরম্মী। রাজকুমার বুদ্ধিমন্ত (অঙৌস্না) গী মিং পনবা য়াই। মপান মণিপুর ময়াং লমদা রবীন্দ্রনাথ ঠাকুরগী শান্তি নিকেতনদা রাজকুমার বুদ্ধিমন্তনা মণিপুরী জগোই হৌদোকপীরম্বসি তখেল নিংথৌ বীরেন্দ্র কিশোর মহারাজগী মতেংননি।

ভারত নীংখা তমদুনা দেশীয় রাজ্য (নিংথৌ পানবা) লৈপাক পুম্নমক ভারত্তা তিনখিবা মতমদগী ভারতপুম্বগী রাজনীতি, অর্থনীতিদা অওনবা অমা লাকখি। পুম্নমক হোংখ্রে। ভারত্তা ত্রিপুরানা তিনখিবদগী ইতিহাস ওইরে। মৈতৈ অমসুং ত্রিপুরীনা ত্রিপুরাদা লাখ মঙাগী মপু ওইজরম্বদু হৌজিক লাখ ২০ মশীং ওইরে। অথোইবা মশীং হেনগৎপা হৌজিকসু লেপত্রি। রাষ্ট্র রাজনীতি য়াওনদা মশীং য়ামদবগী শীংথাবিদবা, মফম ফংদবা হায়বদু মপু ওইরম্বা ত্রিপুরী অমসুং মণিপুরীশিংদা থোকলে।

ত্রিপুরাগী রাজধানী (কোনুং) আগরতলা দা মমাংঙৈ নিংথৌগী ঙাইশেন, ফম্নাইবা মৈতৈশিংগী মৈতৈ খুল মঙা রোমদা মৈতৈ লিশিং অমা (১০০০) রোম লৈবসি নত্তনা অতৈদি অয়াম্বদি লৌউ-শিংউদুনা খুন খুনশিংদা চোইনা চোইনা খুন্দানা লৈরম্মী। ত্রিপুরাদা চাওরাক্না মৈতৈ লিশিং কুন (২০) রেমাগী মনুংদা মৈতৈ পাঙ্গন লিশিং অনী (২) রোমতনি। ত্রিপুরাগী ডিষ্ট্রিক্ট ও গী মখাদা সাব ডিভিশন ১০ গী মনুঙদা নোংচুপ অমসুং অৱাং জেলাগী ডিভিশন ৪ দা মৈতৈশিং খুন্দারি।

চোইনা চোইনা খুন্দাবগী মরমনা মফম অমদা লিশিং অনী (২০ ফানা মৈতৈ খুন লৈতে। মাইল ২/৩ থাপ্না থাপ্না চোয়না চোয়না লৈরিবা মরক অসিদা অনৌবা মীওইশিংগী মফম ওইরে। মৈতৈ অয়াম্বা চাদা ৯৮% লৌউ-শিংউনা খুঙ্গংদা লৈ। লিশিং ১ রোমদি ড্রাইবার, সিপাই, পুলিশ অয়াম্বা। স্কুলগী ওঝা ২০০ রোম লৈরি। অদুগা এডভোকেট ডাক্তার ইঞ্জিনিয়ারসু লৈরে। লৌমীশিংগী মনুংদা চাদা ৬০% মশাগী লৌফম লৈজদে। হায়রিবসি ত্রিপুরাদা মণিপুরী অপূনবা কমিটিনা শোক ১৯৮১ ইংদা পুথোকখিবা মীকোক থিদুনা (সেন্সাস) ফংজবনি।   

রাজনীতিগী মাইকৈদা বিধান সভাদা সদস্য অহুম য়াওরবসু ঐখোয় মণিপুরী অশেংবা সদস্যদি অমখক্তনি। বিষ্ণুপ্রিয়াগী তোঙানবা লোল, সংস্কৃতি লৈজৈ হায়দুনা তোঙানবা আইডেন্টিটিগী দাবী তৌরিবা বিষ্ণুপ্রিয়া কাঙবুনা ‘মণিপুরী’ তপশিনবনা মণিপুরী ঐখোয়গী আইডেন্টিটি মতাংদা চয়েৎনবা অমা থোকহল্লে। মসিনা মরম ওইদুনা আগরতলা রেডিও ষ্টেশনদা মণিপুরী প্রোগ্রামসু চয়েৎনরে, ইমালোননা লাইরিক তম্বগী মতাংদসু চয়েৎনরে।

ত্রিপুরাদা গাঁও পঞ্চায়েত ৬০০ হেন্না লৈ। মৈতৈ প্রধান ১০ সু য়াওরি। নিংথৌ পানবা মতম ত্রিপুরাদ মণিপুরী অমসুং ত্রিপুরীনা মপু ওইরম্বদু ঙসিদি প্রজাতন্ত্র ভারতকী সংবিধাননা মপু ওইদুনা রাষ্ট্র শাসনগী চুপ্পি পায়খ্রে। বেকৱার্ড ক্লাস মিংথোন পীদুনা সিডিল্ড ট্রাইব (এসটি) কাষ্টবু আইনগী চৈঙাকনা মপু ওইরম্বা ত্রিপুরীশিংবু চৈঙাক পীবিরে। মণিপুরী ঐখোয়দি ত্রিপুরীশিংগা ফুরূপ অমত্তনি, শাগৈ নাতৈনি, ইমুং মনুংনি হায়না খঞ্জরম্বদু রাষ্ট্রগী আইন সংবিধাননা মদু য়াবিদ্রে।

ভারত সংবিধাননা ত্রিপুরীশিংবু ঙাকশেনবিবদা মণিপুরীশিংবুদি য়াওহনদ্রে। ত্রিপুরী-মণিপুরী লাখ মঙা (৫) দগী মণিপুরী লিশিং ২০ খায়দোক্নগা সমুদ্রগুম্লবা পাক চাওরবা মীশিং লাখ ১৫ দা তিলহনবিরে। ত্রিপুরাদা মণিপুরী লৈব্রা হংনরক্লে। মরম অসিনা ত্রিপুরাগী মণিপুরীশিংনা ত্রিপুরীগী মণিপুরীশিংনা ত্রিপুরীগী সিডিউল্ডদা চনশিন্নবা দাবী তৌরক্লিব অসি চহী মতম শাংলে। হৌজিকসু দাবী তৌরি।

ওল্লক্লিবা য়াওল অসিদা ত্রিপুরা রাজ্যদা লৈরিবা মণিপুরীশিংনা মতু শোন্থনা তরক্ তরক্না মণিপুরী ঐখোয়গী কনাসু লৈজদে হায়না খল্লকপা মতমদা মণিপুরী সাহিত্য পরিষদ, সংস্কৃতি সংস্থা কয়াগা লোয়ননা রাজনীতি লুচিংবা মন্ত্রী কয়ানা ত্রিপুরাদা মণিপুরীবু খোংগুল লীবা ওইনা লেংবিরকপসি মণিপুরীশিংনা অনৌবা ঈথৌ অমা ফংঙকপা চহী দশক অনীরোম শুরে হায়বা য়াই। ‘মণিপুর’ জাতিগী ইমা লৈবাকনি হায়বদুমক ঐখোয়বু নীংশিংহল্লি।

লোল সংস্কৃতিগী লমদা ইমা লৈবাক্কী লাইগুরু, ইচিল ইনাওশিংনা ত্রিপুরাগী মণিপুরীশিংবু কোনশিনবিদুনা পুক্নিং থৌগাৎপীরবসু রাষ্ট্র, রাজনীতি মাইকৈদা ত্রিপুরা অসি রাজ্য অমা ওইবনা রাজ্যগী শাসন অমসুং রাজনীতিদা মণিপুরী লিশিং ২০ রোমগী মফম ফংবসি অৱাবনি। মরম অসিনা ত্রিপুরী ফুরুপকা সিডিউল্ড ওইরবদি শীংথাবিগদ্রা হায়বসি খন্নরি।