ত্রিপুরাগী খোঙচত্তা কবি মীনকেতন
নোংশাতাবম নিরঞ্জন দত্ত
কবি অশাংবম মীনকেতন সিংহ ইহান হান্না ত্রিপুরাদা লাক্লম্বসি ইং ১৯৭৫ গী ফেব্রুয়ারি থাদনি। ত্রিপুরাদা লৈবা মণিপুরী শিংগী লোল সংস্কৃতি, শেল থুমগী ফিবম অমদি অতৈ অতৈ হীরম কয়াদা ৱারী-ৱাতাই শানবগী দমক মণিপুরী সাহিত্য পরিষদ, ইম্ফালগী দেলিগেট টিম অমা ওঝা মীনকেতননা লুচিংদুনা ত্রিপুরাদা লাকখি। ওঝাগা লোয়ননা ডাঃ য়েংখোম ভাগ্য সিংহ, প্রোফেসর ইরাবত সিংহ অমসুং মতম অদুগী পরিষদকী জেনারেল সেক্রেটারী রজনীকান্ত সিংহ লোয়ননা মীওই অহুমসু য়াওরকখি।
লোল সাহিত্য অমসুং সংস্কৃতিগী মরমদা মণিপুরী সাহিত্য পরিষদ, ত্রিপুরাগী লুচিংবা মীওইশিংগসু ৱারী কয়া শানখি। জগোয়, ঈশৈ কলাগী লমদা ত্রিপুরাগী শক্নাইরবা ওঝাশিংবু উপাধি পীদুনা ইকাইখুম্নবা উৎপা অমদি মণিপুরী সাহিথ্য পরিষধ, ইম্ফালগী চহীগী মীফমলেন্দা দেলিগেট থাবিরক্নবা অমসুং অতৈ অতৈ মরম কয়াদসু ৱারী-ৱাতাই শানখি। মথংদা ওল ত্রিপুরা মণিপুরী য়ুথ এসোসিয়েশনগী মীহুৎশিংগসু ৱারী-ৱাতাই শানখি। ওঝা অশাংবম মীনকেতন সিংহনা লুচিংদুনা লাকখিবা পরিষদকী টিম অসি আগরতলা মটরষ্ট্যান্ড মনাক্তা লৈবা ত্রিপুর হোটেলদা লৈখি।
অশাংবম মীনকেতন সিংহনা মথংদা ত্রিপুরাদা অমুক লাকপীরম্বা চহী মতাং অসিদি ইং ১৯৮৩ দনি। ত্রিপুরা রবীন্দ্র পরিষদকী চহীগী ‘সাহিত্য মেলা’ থৌরমগী হৌদোকপা নুমিৎকী সভাপতি ওইনা পরিষদকী থৌরম অদুদা শরুক য়াখি। রবীন্দ্র পরিষদকী সাহিত্য মেলা থৌরম অসি চহীগী তত্তনা পাঙথোক্তুনা লাকই। ভারতকী শক্নাইরবা কবি সাহিত্যক অমদি কলাকার নচিংবা মীওই কয়া হায়রিবা সাহিত্য মেলা থৌরম অসিদা শরুক য়াদুনা লাকই। মসিগী মীৎয়েংদা য়েংলবদি, ত্রিপুরা রবীন্দ্র পরিষদ থৌরমদা মণিপুরদগী ইহান হান্না লাকখিভা অমসুং শরুক য়াখিবা অদুদি ওঝা অশাংবম মীনকেতন সিংহনি হায়বা য়াই।
ইং ১৯৮৩ এপ্রিল ২৩, ওঝা মীনকেতন আগরতলা এয়ারপোর্টতা থুংলরে। রবীন্দ্র পরিষদকী জেনেরেল সেক্রেটারী বানীকন্ঠ ভট্টাচর্য, সাহিত্য পরিষদকী সভাপতি রাজকুমার কমলজিৎ সিংহ অমসুং রবীন্দ্র পরিষদকী মেম্বার ঐ ইশামকসু য়াওদুনা ওঝা মীনকেতনবু এয়ারপোর্টতা ওকপা চৎলি। ওঝাগা লোয়ননা শিলচরদগী ওঝাগী অচানবা ছাত্র অমা লোয়নরকখি। এয়ারপোর্টতগী চুমদ্রিংনা ওঝাগী লৈফম শিল্লিবা সার্কিট হাউস তান্না লাকখি। মথং নুমিৎ এপ্রিল ২৪, পরিষদকী ‘সাহিত্য মেলা’ থৌরম অদু ওঝানা হৌদোকপীখি। কবি রবীন্দ্রনাথকী মরমদা ওঝানা পীবিরম্বা ভাষন ঙসিসু ময়াম্না শোন্নরি।
এপ্রিল ২৫ মথং নুমিৎ ওঝাগা লোয়ননা ট্যাক্সি অমদা ত্রিপুরাগী য়েংবা য়াবা মফম কয়া কোয়খি অমসুং মণিপুরী খুঙ্গং কয়াদসু চৎখি। মথংদা ওঝা মীনকেতন নোংমা নিনি ঐগী শঙ্গায় অভয়নগরদা লৈমিন্নখি। মণিপুরী খুঙ্গং কয়াদা অমুক কোয়খি। নীংশিবা য়াবদি, ওঝাগী মচা নুপা ডাঃ অশাংবম জগবন্ত সিংহ অসি ঐগী মরূপ নি। ইংকুমজা ১৯৬৪ দা ‘বার পুজিয়া কেম্প’ আসামদা পাঙথোকখিবা এন.সি.সি কেম্পতা শক খঙনখি অমসুং মরূপ শানখি। আগরতলাগী বনমালীপুর, অভয়নগর অতৈসু মফম কয়াদা ওঝাগা লোয়ননা মণিপুরী লোল, সংস্কৃতিগী মরমদা ৱারী শাখি। এপ্রিল ২৭, অয়ূক্তা পরিষদকী থৌবুরেনশিংগা লোয়ননা আগরতলা এয়ারপোর্টতা ওঝাবু থিন্দোকপীখি।
মরূপ পত্রিকাগী চহীগী চেফোঙ ‘শরৎকী ঈচেল’ অমদি মণিপুরী সাহিত্য পরিষদ, ত্রিপুরা সংস্থা অসিনা ফোঙবা সাহিত্য চেফোঙ তখেন লৈরাংদা ওঝাগী শৈরেং কয়া ফোঙখি। ১৯৯৫, মার্চ তাং ৫, আধুনিক মণিপুরী সাহিত্যগী লময়ানবা অমদি শক্নাইরবা কবি ওঝা মীনকেতন মীরমলেন থাদোক্তুনা লাইরমলেন্দা তিনখি। মহাক লৈখিদবগী পাউ তাবদা মণিপুরী সাহিত্য পরিষদ ত্রিপুরাগী মায়কৈদগী অৱাবা অমদি নুংঙাইতবা ফোঙদোকখি।
-সোর্স: মরূপ পাউচে
0 কমেন্ট:
কমেন্ট তৌবিয়ু