জুদোকা লিকমাবম সুসিলাদা অর্জুন এৱার্দ পীরক্লে
ইম্ফাল, নভেম্বর ৩০ : মণিপুরগী ওলিম্পিয়নশিংগী মনুঙদা অমা ওইরিবা ইম্ফাল ইষ্টকী হৈঙাং ময়ায় লৈকায়দগী লিকমাবম সুসিল (অপোকপা এল মনিহন অমসুং অপোকপী চাওবী)দা লৈবাক অসিগী প্রেসিদেন্ট দ্রৌপদি মুরমুনা ঙসি নুংথিল রাষ্ট্রপতি ভবনদা পাঙথোকখিবা চীং লেম্লবা থৌরম অমদা অর্জুন এৱার্দ খূৎশিন্নরকখ্রে। এৱার্দ অসিদা শকখঙ চে অমসুং মেমেন্টো য়াওনা লুপা লাখ ১৫গী শেনফম য়াওরিবনি।
রাষ্ট্রপতি ভবনদা ঙসি পাঙথোকখিবা থৌরমদা লৈবাক অসিগী তোঙান তোঙানবা মশান্নশিংদগী খনগৎলবা শান্নরোয় ২৫দা অর্জুন এৱার্দ খূঃশিন্নখি। অদুগা থোইদোক হেন্দোক্না মথৌ পাঙথোকখিবা কোচ ৮ দনা দ্রোনাচার্য্য এৱার্দ পীখিবগা লোয়ননা শান্ন-খোৎনবগী লমদা খ্বাইদগী থাক ৱাংনা মনা ওইরিবা ধ্যানচান্দ খেল রত্ন এৱার্দনা ভেটরেন টেবল টেনিস প্লেয়ার অচান্ত সরথ কমলদা খূৎশিন্নখিবগা লোয়ননা রাষ্ট্রিয় খেল প্রোটসাইহন পুরস্কার ২০২২ অমসুং মৌলানা আব্দুল কালাম আজাদ ট্রোফি ২০২২ নচিংবসু য়েন্থোকখি।
অর্জুন এৱার্দ ফংলবী মণিপুরগী ওলিম্পিয়ান লিকমাবম সুসিলা হৌখিবা কুমজা ২০০৩ দগী জুদো শান্নবা হৌরকখিবনি। মহাক্কী মবুং অহল লিকমাবম সিলাকসিসু জুদো প্লেয়ার অমা ওইবদগী মঙোন্দসু মশান্না অসিবু শান্ননীংবগী ৱাখল পোক্লকখিবনি। তপ্না তপ্না শান্নরকখিবনা কুমজা ২০০৭ তগী সাইদা লৈদুনা মায় পাক্লবা জুদোগী শান্নরোয় অমা ওইরকপা ঙম্লকখিবনি। হৌজিক ফাওবদা মালেমগী থাক্তা মহাক টুর্ণামেন্ট ৩০গী মথক্তা শরুক য়াখ্রে।
সোর্স: হুইয়েন লানপাউ
0 কমেন্ট:
কমেন্ট তৌবিয়ু