চিৎলিয়া, কমলগঞ্জতা ৯ জানুয়ারি ‘চহি তরেৎ খুন্তাকপা’ নীংশিং থৌরম পাঙথোকখ্রে
সিলেট, জানুয়ারি ৯ : মণিপুরগী পুৱারীদা খ্বাইদগী শীংথানরিবা চহী তরেৎ খুন্তাকপদা অৱাগী খায়াত্তগী মণিপুরবু কনবিখিবা ইনিংথৌ গম্ভীর সিংহ মহারাজনা নোঙ্গাখ্রবা নুমিৎ ৯ জানুয়ারি ‘চহী তরেৎ খুন্তাকপা’ নিংশিং থৌরম ঙসি বাংলাদেশ মণিপুরী যুব সমিতি (বামযুস) কমলগঞ্জ ব্রাঞ্চনা শিনলাংদুনা মৌলভীবাজার ডিস্ট্রিক্ট মনুং চনবা কমলগঞ্জ উপজেলাগী চিৎলিয়া খুলদা গম্ভীর সিংহ মেমোরিয়েল এন্ড রিসার্স সেন্টার দা পাঙথোকখি। ময়াম্না ইনিংথৌ গম্ভীর সিংহগী মীতমদা হৈকৎ-লৈকৎ কৎতুনা ইকায়খুম্নবা উৎখি। মথংদা ‘চহি তরেৎ খুন্তাকপা’ গী মতাংদা নৈনবা মীফমদা তিনবিরিবা মীথুংলেন ময়াম্না পুৱারীগী ওইবা নুংগী ৱা ঙাংখি।
মণিপুরগী পুৱারীদা মীয়াম্না শক্ন-শোন্নরিবা নিংথৌশিংগী মনুংদা মৈদিংঙু চিংলেন নোংদ্রেনখোম্বা (১৭৮৮-১৮৩৪), মীয়াম্না নিংথৌ গম্ভীর সিংহ হায়না খঙনবা। মহাকপু মণিপুরগী মীয়াম্না শক্না-শোন্নরিবা অমসুং ঙসিগী মীরোলনা মহাক্কী মফমদা ইকায় খুম্নবা উৎপগি মরমদি মহাক লৈরমদ্রগদি ঐখোয়না ঙসি ইমা লৈবাকনি হায়না লুনা-চান্ন নীংনরিবা মণিপুর অমসুং মসিগী য়েলহৌমী ওইরিবা চীংমী তম্মী লৈরম্মোই হায়দুনা নৈনবদা ৱাঙাংলোইশিংনা হায়খি।
মপাঙ্গল কল্লবা বর্ম্মানা ১৮৯১ দা মণিপুর খূদুম চনখি। মমাঙথক্তা মৈতৈ লান্মীনা হঞ্জিন হঞ্জিন বর্ম্মাদা লান্দাদুনা তমথি তমথিরবা চৈথেং কয়ামরুম নংহনখিবদুগী লমন খুম্বা ওইনা চত্থরকখিবা বর্ম্মীজ আর্মিগী মীওৎ মীনৈ অদুদা মণিপুরগী তম্পাক লমদা নুপা লৈবা ঙমখিদে। নুপীশিং মথোঙ খঙনখিদে। চহী তরেৎ খুন্তাকপা হায়বা পুৱারীগী শাত্থিরবা তানফম অদুদা নুপাশিং খুবাক্তা য়াইরিনা লেঙলগা লানফা ওইনা বর্ম্মাদা পুখি।
চহী ৭ খুন্তাকপগী মতম ইং ১৮১৯ দগী ১৮২৬ ফাওবদা মণিপুর থাদোক্তুনা কাছার লৈবাক্তা চেল্লকখি। ইনিংথৌ গম্ভীর সিংহনা মশাগী লান্মী ৫০০ লিংখৎতুনা থৌনা ফনা অৱাশিংগা লান্থেংনখি। অৱাগী মীওৎ মীনৈগী মণিপুরীশিং নিংখা তম্বা অমুক ফংহনখি। লান লোইরবা মতুংদা খরনা অমুক মণিপুরদা হল্লকখি। খরনা কাছার, ত্রিপুরা, বাংলাদেশনচিংবদা খুন্দাদুনা হৌজিক লৈরিবা অসিনি হায়দুনা তিনলিবা ময়ামদা শন্দোক্না পুৱারি ওইনা তাহনখি।
0 কমেন্ট:
কমেন্ট তৌবিয়ু