• 635
• ২৩শে জানুয়ারী ২০২৪ ইং
• Share on:

চিংশুবম অকাবা লৈখিদবগী ১৮শুবা নীংশিং থৌরম পাঙথোকখ্রে

ইম্ফাল, জানুয়ারি ২২ : মণিপুরগী চীং-তমগী অপূনবা শক্তম্বু কায়হন্দনবা অমসুং ঐখোয়গী ইরোল-ইয়েকপু চাওখৎনবা হোৎনবদা কত্থোকপগা লোয়ননা অচৌবা থৌদাং লৌরম্বা মীয়াম্না ‘ওজা অকাবা’ হায়রগা থোইদোক্না খঙনবা চিংশুবম অকাবা লৈখিদবগী ১৮ শুবা নীংশিং থৌরম ঙসি ইম্ফালগী হয়িং খোংবান উফোং য়ূম্ফমদা লৈবা লাইনিংথৌ  সনামহী লাইশঙদা পাঙথোকখ্রে।

মিলাল (মীতৈ ইরোল-ইয়েক লোয়নশিল্লোন অপূনবা লূপ), কংলৈপাক্না শীন্দুনা লুপ অসিগী প্রেসিদেন্ত খাইদেম ইঙোচা মীতৈনা প্রিসাইদ তৌদুনা পাঙথোকখিবা থৌরম অদুদা জে এন মণিপুর দান্স একাদেমীগী দিরেক্তর পুখ্রম্বম বিলাশ, ৱামা কংলৈপাক্কী প্রেসিদেন্ত মোইরাংথেম নাওখম্বা মীতৈ, হেরিকোনগী প্রেসিদেন্ত লোংজম রতন, এল এস তি বিগী ভাইস প্রেসিদেন্ত বিদ্যাপতি সেঞ্জম (ৱাখল লমজিংবা), জিরিবাম দিস্ত্রিক্তকী ইনফোর্মেসন ওফিসার নামৈরাকপম বিদ্যানন্দ, মিলালগী এদভাইজর এনজি প্রেমকুমার, ৱামাগী এদভাইজর ৱাইখোম রোমেশ মীতৈ অমসুং হামোম নবচন্দ্র অসিনচিংবনা শরুক য়াখি।

থৌরম অদুদা হেরিকোনগী প্রেসিদেন্ত লোংজম রতন্না হায়, ঙসি মণিপুরগী ওইরক্লিবা ফীবম অসি ঐখোয়না ঐখৈায়গী কলচর, নাৎ, পুৱারী নৈনরুদবা, লৈরিবা ফুরূপশিং মশক খঙদবা, য়েলহৌ ফুরুপ্না কনানো খঙলুদনা থোরকখিবনি। মসি পূম্নমক অসি ফোর্মেল এদজুকেসন্দা তমদ্রবসু ইনফোর্মেল ওইনা হৌরক্লিবা নহা অমদি মহৈরোয়শিংদা খঙহনবা মথৌ তারে।

নহাশিংনা পোলিতিক্সতা য়াওশিন্দুনা অফবা মীহুৎ খনবা, অফবা লৈঙাক থম্বা মথৌ তায়। লোয়ননা লাইরিক্তা হেন্না থৱায় য়াওনা হোৎনদুনা খুন্নাইদা অচঙবা মী ওইনবা হোৎনবসু য়াম্নমক তঙায়ফদে। দ্রগতগী লাপথোকপা অমদি লমদমসিগী শেম্মীৎলোন ফগৎনবা থবক-থৌরমশিংদা হেন্না খূমাঙ য়াঙশিন্না চঙশিনগদবনি। ঐখোয়গী পুৱারী, কলচর, চৎনবী, লৈমিন্নরিবা ফুরূপশিংগী হৌরকফম খঙমিন্নদুনা য়েক্নবা মশক খঙদোকসি।

ঐখোয়গী ইরোল-ইয়েক অসি মতম শাংনা মিরাইদুনা লৈরুরে। লৈখিদ্রবা লুচিংবা চিংশুবম অকাবনা মীৎয়েং শান্না উরগা ইরোল-ইয়েক অসিবু চাওখৎনবা হোৎনরম্বনি। লুচিংবা অসিনা মিলাল শেমদুনা লৈবাক মীয়ামগী মতেঙগা লোয়ননা হোৎনরম্বনা ঐখোয়গী ইরোল-ইয়েক্না ঙসিগী থাক অসিদা লৈরম্বনি। লুচিংবা অসিগী অশানবা মীৎয়েংদগী এদজুকেসনগী সিলেবাসতা হাপ্তুনা হৌজিক্তি ঐখোয়গী ইরোক-ইয়েক অসি মাস্তর থাক য়ৌরে। মসি ফাওবা য়ৌরক্নবা হোৎনবদা লুচিংবা অসিনা হোৎনরম্বা অদু হৌরক্লিবা মীরোলদা খঙহনবা চঙই। ঙসিগী থৌরম অসিগী মরু ওইবসু মদু খঙহনবনি হায়না লৌই। ঐখোয়গী ইরোল-ইয়েক অসি হেন্না চাওখৎনবা হোৎনমিন্নসি হায়নসু রতন্না মখা তানা ফোঙদোকখি।

মিলালগী প্রেসিদেন্ত খাইদেম ইঙোচা মীতৈনা হায়, ইরোল-ইয়েক য়োকখৎনবা হোৎনবদা অচৌবা থৌদাং লৌরম্বা চিংশুবম অকাবা লৈখিদবগী নীংশিং থৌরম অসি মিলালনা লেপ্তনা পাঙথোক্তুনা লাক্লি। লোল অসিবু ইন্দিয়াগী ক্লাসিকেল লেঙ্গুয়েজ ওইনা শকখঙনবসু হোৎনরি। ময়েক অসি সিলেবাসতা হাপ্তুনা মাস্তর ফাওবা মহৈরোয়শিংনা তম্লবসু মপূং ইফা ফাদবগুম তৌরি। মসিবু মমূৎ তানা মীপূম খুদীংমক্তা খঙহন্নবা মিলালনা মখা তানা থবক-থৌরম লৌখৎখিগনি হায়খি।

ঙসিগী থৌরম অদুদা মিলালনা শীন্দুনা ক্লাস ৱান্দগী তেন ফাওবা তোঙান-তোঙানবা কেতেগোরী খায়দোক্তুনা পাঙথোকখিবা ১৭শুবা মীতৈ ময়েক চাংদম্নবদা মকোক মথং অমসুং অহুমসুবা অমদি কন্সোলেসন প্রাইজ ফংলবা মহৈরোয়শিংদা মনা-মথুম পীদুনা মখোয়বু পুক্নীং থৌগৎখি। থৌরমগী শরুক অমা ৱাখা লৈমা চীংদা লৈবা চিংশুবম অকাবগী অরোইবা য়াতাখিবা মফমদা লৈবা লুচিংবা অসিগী খুবমদা মীয়াম্না হৈকৎ-লৈকৎ তমদুনা ইকায় খুম্নখি। লোয়ননা ঈরাং অসিদা ইরৈবাক ইফুরূপকী থৱায়না পোন্থা পীখ্রবা অথৌবশিংগী মফম মিনীৎ ১ তুমীন্না লেপ্তুনা ইকায় খুম্নবসু উৎখি।

সোর্স: পোক্নফম