• 896
• ৩রা জুন ২০২২ ইং
• Share on:

চনা লুখোইনা ইবা ‘তাইবঙ ঈপাক লাল্লমদাই’ ফোঙখ্রে

ইম্ফাল, মে ৩০ : সাহিত্য থৌপাং লূপ (সাথৌলূপ) না শীন্দুনা ঙসি লাইনিংথৌ সনামহি তেম্পল বোর্দকী কমপ্লেক্সতা শক্নাইরবা অইবা চনা লুখোইনা ইবা ‘তাইবঙ ঈপাক লাল্লমদাই’ হায়না মিংথোনবা লাইরিক অমা সাথৌলূপনা চহী অনী অনী লৈরগা পীবা থিয়াম ইবোচৌবী নেসনেল এৱার্দকী মিংথোন ওইরিবা থিয়াম ইবোচৌবীনা লৈখিদবা ১১ শুবা কুমওনগা মরী লৈননা ফোঙখ্রে।

ঙসিগী লাইরিক ফোঙবগী থৌরম অসিদা লাইনিংথৌ সনামহি টেম্পল বোর্দকী ভাইস প্রেসিডেন্ট ওইরিবা বিদ্যাপতি সেঞ্জম অমসুং সেক্রেটারি ওইরিবা মাইস্নাম শিবদত্ত লুৱাং লোয়ননা সথৌলূপকী এদভাইজর ওইরিবা সরতচান্দ থিয়ামনা প্রেসিদিয়াম মেম্বারশিং ওইনা শরুক য়াখি।

তাইবঙ থৱায় পানবশিং নোংমদি শোইদনা তাইবঙপানসি থাদোক্লগা হনখিগদবা ঙাক্তনি হায়বা ৱাফমসিগা লোয়ননা হৌজিক্কী মীরোলনা খঙবা ঙম্ননবা নৌনা ইথোক্তুনা লাইরিক অমা ওইনা পুথোক্লিবা চনা লুখোইনা হায়, তাইবঙ পানবসি থাদোক্তুনা চৎলগদবা ঐখোয় পূম্নমক্না থেংনগদৌরিবাশিংদা শাগৎচরগা লাইরিক ওইনা লান্থোকচবনি।

থৌরম অসিদা শরুক য়াখিবা শিবদত্তনা হায়, ঙসিগী থৌরম অসি ইনাৎ লাইনিংগী ওইনদি য়াম্না মরু ওইবা অমসুং অসিগুম্বা লাইরিক ফোঙবসি অহানবসু ওইরবা অদুগা লৈবাক্না শখঙনরবা ওজাগী লাইরিক অমসু ওইরি। মসিনা ঐখোয়গী তুংগী লম্বীদসু হেন্না মায় পাকপা অমা ওইরগনি।

ফোঙলিবা লাইরিক অসিগী মতাঙদা অচৌবা থৌদাং লৌরিবা বিদ্যাপতি সেঞ্জমনা হায়, ঐখোয় খুদীংমক নোংমদি তাইবঙপান অসি থাদোক্তুনা চৎলগদবা ঙাক্তনি। অদুবু হিংলিঙৈ মতমসিদা নুংশিনবা চান্নবা অসিদি য়াম্না মরু ওই। মরম অসিনা ঙসি ফোঙলিবা লাইরিক অসিগী পাউজেলসু নুংশিনবা অসিনা ওইগনি হায়না খল্লি।

থৌরম অদুদা সাথৌলূপকী প্রেসিডেন্ট তোংব্রম অমরজিৎনা হায়, ঐখোয়গী তুংগী মীরোলগীদমক মমল য়াম্লবা লাইরিক অমা ওইনাম ওংবী লেম্বীনা প্রডিউসার ওইদুনা পুথোরকপসি য়াম্না থাগৎনিংঙাইনি। ঐখোয়না চহী অমা অনী লৈরগা পীরিবা থিয়াম ইবোচৌবী নেসনেল এৱার্দকী মিংথোং ওইরিবা ইবোচৌবীগী লৈখিদবা কুমওনগী থৌরমগা য়াম্না চুননা থোক্লে। হৌজিক ফাওবদা এৱার্দ অসি ত্রিপুরাগী আর কে জিতেন্দ্র, এল বীরমঙ্গল, এন দিলিপ, ডব্লিউ বীরমঙ্গল অমসুং আসামগী কে ইবুংঙোহলদা পীখ্রবনি।

সোর্স: পোক্নফম