গৌরনগরদা ৮৪ শুবা নুপীলাল থৌরম পাঙথোক্কদৌরি
আগরতলা, ডিসেম্বর ৮ : মণিপুরগী অমুকোগা খুৎশম্নরগা ত্রিপুরাদা হন্দক চহীসু মণিপুরী লিটরেরী এন্ড কালচারেল ফোরাম ত্রিপুরানা শীন্দুনা লাক্লিবা ডিসেম্বর তাং ১২, ঐতিহাসিক নুপী লাল নুমিৎ থৌরম পাঙথোক্কদৌরি। খোয়াই ডিষ্ট্রিক্ট মনুং চন্না আগরতলাদগী কিমিঃ ৫০ রোম লাপ্পা মৈতৈ খুঙ্গং গৌরনগরদা লৈবা নুপীলাল নীংশিং কমপ্লেক্সতা হন্দক চহীগী ৮৪ শুবা নুপী লাল থৌরম অসি পাঙথোক্কনি হায়রি। নুংথিল ফোরামগী প্রেসিডেন্ট এন বীর সিংহনা লুচিংদুনা কমপ্লেক্সতা খিন্না লৈবা নুপীলাল মীতমদা হৈকৎ-লৈকৎ তমদুনা শ্রদ্ধাঞ্জলি কৎকনি।
মথংদা অফোঙবা মীফমদা থৌরম অদুগী নুংগী ওইবা ৱারোল ফোঙবগা লোয়ননা থৌরম অসিগা মরী লৈননা গৌরনগরগী শক্নাইরবী লোংজম ওংবী মাঙনঙানবী, কল্যাণপুরগী য়ূম্নাম শকুন্তলা সিংহ অমসুং ওল আসাম মণিপুরী উইমেন্স লিটরেরী এন্ড কালচারেল ওর্গাগী প্রেসিডেন্ট সোসেল এক্টিভিষ্ট য়ুম্নাম রেনুকাবু লিটরেরী এন্ড কালচারেল ফোরাম মাইকৈদগী ইকাইখুম্নগনি হায়রি।
থৌরম অদুদা চীফ গেষ্ট ওইনা ত্রিপুরাগী য়ুথ স্পোর্টস অমসুং লেবার মন্ত্রী টিঙ্কু রায়, স্পেশাল গেষ্ট ওইনা মণিপুরগী য়ুথ স্পোর্টস মন্ত্রী কোন্থৌজম গোবিন্দদাস, এম.এল.এ পীনাকি দাস চৌধুরী, জিলা সভাপতি জয়দেব দেববর্মা অদুগা গেষ্ট অব অনার অমুকোগী ভাইস প্রেসিডেন্ট কোইজম হেলেন মৈতৈ, মণিপুরী উইমেন্স লিটরেরী কালচারেল ওর্গানাইজেশনগী প্রেসিডেন্ট রেনুকা য়ুম্নাম, লিটরেরী ফোরামগী প্রেসিডেন্ট এন বিরো সিংহ শরুক য়াগনি হায়রি। ৮৪ শুবা নুপীলাল ওবজার্ভেশন ডে’গী কনভেনর খোইস্নাম বীরলানা থৌরম মপু ওইরগা থৌরম অদুদা স্পোশাল ইনভাইটি ওইনা অমুকোগী জেনারেল সেক্রেটারী ড. নোরেন্দ্র থোকচোমসু শরুক য়াগনি হায়না ফোরামগী সেক্রেটারী খোইস্নাম মংগলনা হায়রি। পনবা য়াবদি চৎখিবা এপ্রিল, ইং ২০২৩ দা অমুকোগী মতেং লৌরগা গৌরনগর মৈতৈ খুঙ্গং অসিদা নুপীলাল মীতম অসি খিনখিবনি।
সোর্স : মরূপ
0 কমেন্ট:
কমেন্ট তৌবিয়ু