খুরাইজম নিমাইচরনগী খোর্জেগী খুদোলশিং নৈনবা সিম্পোজিয়াম পাঙথোকখ্রে
ইম্ফাল, জানুয়ারি ০৮
ইরমদম মীয়ামগী অপূনবা খোর্জৈ লূপ (ইমাখোল) অৱাং পোৎশংবম মণিপুর অমসুং লৈখিদ্রবা অইবা খুরাইজম নিমাইচরনগী ইমুং-মনুং, খুরাই লম্লোং এ পি রোদ অনীনা পুন্না খুৎশম্নদুনা খুরাইজম নিমাইচরনগী খোর্জৈগী খুদোলশিং নৈনবা হায়বা হীরমদা নোংমগী ওইবা সিম্পোজিয়ামগী থৌরম অমা মণিপুর প্রেস ক্লাবত পাঙথোকখ্রে হায়না ইমাখোলগী থৌবুরেল ৱাহেংবম রোমেননা থাদোরকপা চেরোল অমনা ফোঙদোরক্লি।
ঙসি অয়ুক পুং ১০ চপ চানা হৌদোকখিবা থৌরম অদুদা মণিপুরী সাহিত্য পরিষদ ইম্ফালগী প্রেসিদেন্ট লোংজম জয়চন্দ্রনা অথোইবা মীথুং, ইমাখোলগী প্রেসিদেন্ট ডা. চিঙ্গাংবম চন্দ্রকলানা থৌরম মপু ওইন শরকু য়াখি। লোয়ননা থৌরম অদু ইমাখোলগী এসিষ্টেন্ট সেক্রেটারি রিশিকান্ত লাইরেনলাকপমদা তরাম্না ওকপগী ৱারোল পীখিবগা লোয়ননা থৌরমগী নুংগী ওইবা ৱারোল লূপ অসিগী থৌবুরেল ৱাহেংবম রোমেননা মরিক চুম্না ফোঙদোকখি হায়রি।
লৈখিদ্রবা খুরাইজম নিমাইচরনগী মচা ইবুংঙো খুরাইজম রতনকুমারনা লৈখিদ্রবা ওজা অসিগী মরমদা মরিক চুম্বা ৱাফম কয়া ফোঙদোকখি। থৌরম অদুগী শরুক অমা ওইনা অথোইবা মীথুং অমদি থৌরম মপুনা লুচিংদুনা লৈখিদ্রবগী মীতমদা লৈশু কৎতুনা ঈকায় খুম্নবসু উৎখি।
তাঙ্কক অনী থোক্না পাঙথোকখিবা সিম্পোজিয়াম অসিগী অহানবা তাঙ্কক্তা দিন স্কুল ওব হ্যুমেনিটিগী প্রোফেসর নহাকপম অরুনানা মোদরেটর ওইদুনা খুরাইজম নিমাইচরনগী উনবী ৱারী পারুবদা হায়বা হীরমদা এন জি কোলেজ ইম্ফালগী হান্নগী লেকচারার চিঙ্গাংবম সঙ্গাইজাওবীনা ৱা ঙাংখি। লোয়ননা শৈরেংদা খুরাইজম নিমাইচরন হায়বা হীরমদা মণিপুর য়ুনিভার্সিটিগী মণিপুরী দিপার্টমেন্টকী এসোসিয়েট প্রোফেসর ডা. কোইজম শান্তিবালানা ৱা ঙাংখি। খোমজিনবা অতেনবা নুংশি ৱারীদা খুরাইজম নিমাইচরন হায়বা হীরমদনা মণিপুর য়ুনিভার্সিটিগী মণিপুরী দিপার্টমেন্টকী এসোসিয়েট প্রোফেসর ৱাহেংবম কুমারী চনুনা ৱা ঙাংখি।
ঙসিগী সিম্পোজিয়ামগী অনীশুবা তাঙ্কক্তনা সাহিত্য একাদেমী ত্রান্সলেসন এৱার্দী লাইময়ুম বিরেন্দ্রকুমার শর্ম্মানা মোদরেটর ওইদুনা তোঙান তোঙানবা হীরমশিংদা ক্বাদ রাইটার্স মোইরাংগী প্রেসিদেন্ট সালাম তোম্বা, আসাম য়ুনিভার্সিটিগী মণিপুরী দিপার্টমেন্টকী হেদ প্রোফেসর হাওবম ননিকুমার অমদি ময়াই লম্বী কোলেজগী এসিষ্টেন্ট প্রোফেসর ডা. ময়া নেপ্রমনা পেপার পাথোকখি হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু