কাইয়েনপাইবম বৃন্দাগী শৈরেং লাইরিক 'ঐগী খোংচৎ' ফোঙখ্রে
সিলেট, মার্চ ২৩ : বাংলাদেশতা মীতৈ ময়েক তম্বি তাকপিবা `মণিপুরী ভাষা প্রশিক্ষন কেন্দ্র' অমগী ওজা ওইরিবা কাইয়েনপাইবম বৃন্দাগী অহানবা শৈরেং লাইরিক 'ঐগী খোংচৎ' ঙরাং ২২ মার্চ ২০২৩ নোংমাইজিং নুমিৎতা ভানুগাছতা পাংথোকখিবা ইন্দো-বাংলা মণিপুরী চৈরাওবা ফেস্টিভেলদা হৌনবা মতুং ইন্না মায়খুম হাংদুনা ফোংখ্রে।
শজিবু চৈরাওবগী হরাও-নুঙাইবা থৌরম কয়াগা লোয়ননা পাংথোকখিবা ইন্দো-বাংলা মণিপুরী চৈরাওবা ফেস্টিভেলগী নৈন-মিফমদা কবি কাইয়েনপাইবম বৃন্দাগী লাইরিক অসিসু ফোংদোকপগি নুঙাইরবা থৌরম অমসু পাংথোকখি। থৌরম অদুদা মিফম মপু ওইনা ইন্দো-বাংলা মণিপুরী চৈরাওবা ফেস্টিভেল কমিগী প্রেসিডেন্ট থৌনাওজম নিরঞ্জন সিংহ, চিফ গেষ্ট ড,খলীকুজ্জমান আহমেদ, চেয়ারম্যান, পল্লী কর্ম সহায়ক ফাউন্ডেশন অমসুং স্পিশিয়েল গেষ্ট ওইনা শরুক য়াখি মণিপুরদগী লেংবিরকপা ওজা ড. নাওরেম সনাতোম্বা, এসিস্টেন্ট প্রফেসর, মণিপুর ইউনিভার্সিটি, সাপম হেমন্ত সিংহ, এসিস্টেন্ট প্রফেসর, ওয়াইখোম মনি গার্লস কলেজ, সানাসম সেঙ্গোই সিংহ, এসিস্টেন্ট প্রফেসর, ওয়াইখোম মনি গার্লস কলেজ, ড. কোন্থৌজম বিমলা দেবী এসিস্টেন্ট প্রফেসর, সি আই কলেজ, মিস্টার আবদাল হোসেন, চেয়ারম্যান, আদমপুর ইউপি, সন্ঞ্জয় চক্রবর্তী, অফিসার ইনচার্জ, কমলগঞ্জ থানা।
ঢাকাগী তিউরি প্রকাশন কৌবা পাবলিশিং হাউসনা পুথোকপা শৈরেং লাইরিক অসিদা মীতৈ ময়েক অমসুং বাংলা ময়েক অনিমক য়াওরি। লাইরিক অসি ওনলাইনদাসু (https://www.rokomari.com/book/294969/eigi-khongchat) ফংগনি হাইদুনা তিউরি প্রকাশনগী প্রোপাইটর মাইবম সাধননা খংহনলকখি।
ওজা কাইয়েনপাইবম বৃন্দা হৌজিক হৌজিক প্রাইমারি স্কুল অমগী ওজা ওইরি অমসুং `মণিপুরী ভাষা প্রশিক্ষন কেন্দ্র' কৌবা মীতৈ ময়েক তম্বি তাকপিবা সেন্টার অমা লিংখৎতুনা বাংলাদেশতা মহৈরোয়শিংদা মীতৈ ময়েক শন্দোক্নবা কন্না হোৎনরিবা ইমা অমসুনি। ঙরাং ফোংলিবা 'ঐগী খোংচৎ' শৈরেং লাইরিক অসিনা অইবিগী অহান্বা শৈরেং লাইরিকনি।
0 কমেন্ট:
কমেন্ট তৌবিয়ু