• 248
• ১৫ই সেপ্টেম্বর ২০২৫ ইং
• Share on:

কবি নাওরেম লোকেশ্বরগী ‘কোন্থোং লোন্দ্রবা ইরানয়াই’ লাইরিক অসিদা মিৎয়েং অমা --- তোংব্রম অমরজিৎ

পুন্সিদা তৌগদবা থবক, পাংথোক্কদবা শিন্থা, চৎকদবা লম্বেল মপুং ফাদ্রিঙৈদা কনাগুম্বশিংনা মনুং মতম চাদনা মপুগী লৈকোলদা লৈরাং লৈনম ওইনা, মালেম লৈশা ওইনা তিনখিবসু য়াওদবা নত্তে। শিন্থা অমত্তসু পাংদনা মালেম অসি লূম্নবা পোকপা তাইবঙ মীওইবসু লৈতবা নত্তে। মাগী মাগী মপোক্কী শেমদোকপা চুম্থোকপা য়াদবা মী মখল মখলনি লৈরিবসি। পুম্নমক অসিগী মরক্তা কবিশিংদি খরা হেন্না সেন্সিতিব ওইবনা পুন্সিবু নুংশিনা লূনা খল্লি। করি করম্বা থবক তৌরগা মালেমসিদা হিংলিবা মীওইবনা মহাকপু নুংশিনা শোন্নহৌগনি অমদি নিংশিংদুনা লৈহৌগনি হায়বসিদা পুকনিং লুপচৈ। অদুননি অইবশিং কবিশিংনা লাইরিক ইরক্লিবা, পাউজেল চেল্লক্লিবা মীওইবা খুনাইদা ইতৎ তত্তনা। অপেন পেন্দা, নুংঙাইবা নুংঙাইতবা, অফবা ফত্তবা, অচুম অরান, ফজবা অথিবা অসিনচিংবা পুম্নমক পুকনিং অমদি থম্মোয়না খল ওন্দুনা পুথোক্লকই শৈরেং ওইনা ৱারেং ওইনা। অসিগুম্বা ময়াম মরক্তা কবি লোকেস্বরসু ইরক্লি ‘অশিবা’ মিংথোনবা শৈরেং অমা।

লাইরিক্কী মমিং -কোন্থোং লোন্দ্রবা ইরানয়াই 
অইবা- নাওরেম লোকেশ্বর সিংহ
অফোঙবা- মণিপুরী লিটরেরী সোসাইটি, ইম্ফাল
লাইরিক্কী মখল- শৈরেং
লাইরিক্কী মমল- লুপা ৩০০
লমায় মশিং- ১০৫

নাওরেম লোকেশ্বর (সনায়াইমা) সিংহ উরিপোক অহন্থেম লৈকাই, ইম্ফালদা মার্চকি ১, ১৯৫৮ তা পোকই। অপোকপগী মিংনা নাওরেম রাজমনি সিংহ অদুগা অপোকপীগীনা নাওরেম ওংবী প্রমোদিনী কৌই। অপোকপা অমদি অপোকপী অনীমক লাইরম্লেন্দা তিনখ্রে। অইবগী মহৈগী থাক বি ই (সিভিল) নি। মোংজম নিংঙোল নাওরেম ওংবী থবা দেবীগা পূন্সি খোঙলোই ওইদুনা মচা নিংঙোল সিলভিনাগী অপোকপা ওইবা ফংজখি। অইবসি মণিপুরী লিটরেরী সোসাইটি, ইম্ফালগী পেট্রোন মেম্বর ওইবতা নত্তনা সোর্ত স্তোরি সোসাইতি, ইন্দিয়াগী দোনর মেম্বর অমসুনি। অইবগী ‘নিংঙাইগী মমল’ (ৱারীমচা) লাইরিক অসি ২০০৯দা ফোংখি। মথংদা অনীশুবা লাইরিক ‘হিদেন মচা মচা’ (ৱারীমচা) অসিনা ২০১৫তা ফোংখি। মসিগী মতুংদা অঙাংগী ৱারী লাইরিক অনীঃ ‘তোমথিন অমসুং খুজি’ (২০২০) অদুগা ‘মচাথোই অমসুং লাইচনুরা’ (২০২৪) খুদোল তমলকখি। পুকনিং থৌগৎনিংঙাই ওইরিবদি মহাক্কী অহানবা অঙাংগী ৱারীমচাগী লাইরিক ‘তোমথিন অমসুং খুজি’ দা লেমজনিংঙাই ওইরবা সাহিত্য একাদেমি, নিউ দেল্লিনা পীবা বাল সাহিত্য পুরুস্কার ২০২২ ফংখি। অইবনা মনিপুরী খোরিলোলদা তৌজরিবা অমদি হোৎনজরিবা অসিবু শকখঙবা ওইনা ‘মাইবম কেবোল অমসুং সুয্যমুখি নীংশিং ৱারীমচাগী মনা’- ২০২১দা পীখি অমসুং ‘তেলেম নিংঙোল অতোইবেম্মা এৱার্দ- ২০২১ সু অমুক পীদুনা ইকায়খুম্নবা উৎখি। ইবগী খোঙচৎ অসিদা পোত্থাবা হায়বদু লৈতনা চংশিল্লি। কুমসি চহী ২০২৫তসু অমুক খুদোল তমলকখি শৈরেংগী লাইরিক ‘কোন্থোং লোন্দ্রবা ইরানয়াই’। লাইরিক অসিদা পুন্না শৈরেং ৬০ য়াওরি। কন্তেম্পররি ওইবা থিম, রোমান্তিক স্তাইল্গী খূৎই, শেল্ফ এক্সপ্লোরেসনগী চাংয়েং তৌবা খূৎইশিং য়াওরি ।

পুন্সিদা তৌগদবা থবক, পাংথোক্কদবা শিন্থা, চৎকদবা লম্বেল মপুং ফাদ্রিঙৈদা কনাগুম্বশিংনা মনুং মতম চাদনা মপুগী লৈকোলদা লৈরাং লৈনম ওইনা, মালেম লৈশা ওইনা তিনখিবসু য়াওদবা নত্তে। শিন্থা অমত্তসু পাংদনা মালেম অসি লূম্নবা পোকপা তাইবঙ মীওইবসু লৈতবা নত্তে। মাগী মাগী মপোক্কী শেমদোকপা চুম্থোকপা য়াদবা মী মখল মখলনি লৈরিবসি। পুম্নমক অসিগী মরক্তা কবিশিংদি খরা হেন্না সেন্সিতিব ওইবনা পুন্সিবু নুংশিনা লূনা খল্লি। করি করম্বা থবক তৌরগা মালেমসিদা হিংলিবা মীওইবনা মহাকপু নুংশিনা শোন্নহৌগনি অমদি নিংশিংদুনা লৈহৌগনি হায়বসিদা পুকনিং লুপচৈ। অদুননি অইবশিং কবিশিংনা লাইরিক ইরক্লিবা, পাউজেল চেল্লক্লিবা মীওইবা খুনাইদা ইতৎ তত্তনা। অপেন পেন্দা, নুংঙাইবা নুংঙাইতবা, অফবা ফত্তবা, অচুম অরান, ফজবা অথিবা অসিনচিংবা পুম্নমক পুকনিং অমদি থম্মোয়না খল ওন্দুনা পুথোক্লকই শৈরেং ওইনা ৱারেং ওইনা। অসিগুম্বা ময়াম মরক্তা কবি লোকেস্বরসু ইরক্লি ‘অশিবা’ মিংথোনবা শৈরেং অমা। কবিনা মসিদা ফোংদোক্লিবসি পুন্সি হায়বসি পোক্লবনিনা নোংমদি চৎখিগদবা লৈরবনি অদুবু অশিবা হায়বদু হাথু হাথু লাকখিনু হায়বনি। মরমদি তাইবঙ শিন্থা মপুং ফনা পাংবা লোইদ্রি অমদি পালেম অপোকপী মহাক্কী খোম্লাং লমন শিংলমদ্রি হায়না পাউমেল্লকলি। কবিনা হায়রক্লি, “ হে অশিবা!/ ঐবু লৌবা লাক্লবা হায়বদুরা?/ নঙ লাকপগীরা/ ঐগী ইমানা ঐবু কৌদুনা ৱান্থ- ৱান্থ কপ্লিবসে? …পলেম ইমাগী খোম্লাং লমন শিংঙমদনা/ নঙ লাক্লে হায়দুনসু/ ঐনা করম তহা তহা চৎকনি…” (লাঃ ৩) কবিনা হিংলিঙৈ মতমসিদা পোকনফম লমদম অসিগী থৌগল মপূং ফানা তৌজনিংবগী মমি চাওনা তারি শৈরেং অসিদা। 

পু পাং শুদ্রবা মচাশিংনা হেন্না খঙই পামেল পন্থৌনা মচাশিং মশুশিংবু কয়া য়াম্না নুংশিবা। লমজা ওইহৌরবা থম্মোয়না মসিগী মৈচাক অসি খঙদবা লৈতে। পালেম ইমাগী খোম্লাং লমনদি তাইবঙনা মপোক তরেৎ পোক্লবসু শিংবা ঙমদে হায়নরিবনি। ইমাগী মীনুংশি, ইমাগী য়াৱা খোঞ্জেল, ইমাগী কত্থোকপা হৈবী, থৌজাল হৈবী, মীনুংশি চাওবী থম্মোয়গী মহুৎ শিনবা য়াবা নুংশিবা অমত্তা লৈতে মালেমদা। ইমা হায়বসি লৈরম্বনা তাইবঙ অসি উবনি। ইমা মহাক লৈরম্বনা ঙসি তাইবঙনা হিংলিবনি। অদুনা কবিগী পুন্সিগী মিকুপ খুদিং অপোকপী ইমাবু কাওদনা লৈরিবা অদুগী শৈরোল অমা কবিনা ইরক্লি। মসি য়ুনিভর্সেল ফিলিং অমদি পুকনিংদা ফাওবা ইমোসন অমসুনি। কবিনা তেংথারক্লি, “ ইমা!/ শীয়োম্নুংদা লৈরিঙৈ ইমাগী/ খঙলমদে করিনো মালেমসে/ ফাওরমদে তাইবংগী মৈশাসু।/…ইমা!/ ইমানা ইনাক্তা লৈরিঙৈ/ লৈরমদে পুন্সিগী অৱাৎপা/ ফাওরমদে অকিবসু কনামত্তগী/ য়াওরমদে মিপাইবসু।/ ইমা!/ ইমানা ইনাক্তা লৈত্রবা মতমসিদদি/ অৱাৎপগী অৱাৎপা ঙাক/ অকিবগী অকিবা ঙাক/ মিপাইবগী মিপাইবা ঙাক…”(লাঃ ৫) মচা ওইবশিংগা পামেল মমা ওইবশিংগা লৈনরিবা নুংশিরবা তাইবঙগী তৎফদ্রবা মরি অদুগী মশক অমা কবিনা শৈথারকপনি। 

খরা তেনবা ৱাহন্থোক লৈবা শৈরেংশিংগী মরক্তা লাইরিক অসিদা য়াওরিবশিংগী মরক্তা ‘নাপল’ হায়না মিংথোনবা শৈরেং অসিসু নৈনবা য়াই। মীওইবগী নাপল হায়বসি লায়না মখল অমনি। নাপল কাদবা মীওইবসু লৈরম্লোই। নাপলনা মাং থাবদা পুন্সিনা মায়থিবগী লম্বেলদা হেক হেক মনিং হল্লি হায়বসি নীংশিংবা ঙমদে মীওইবনা। অইবা মহাক্কী শৈরেং অসিদা মীওইবগী পুন্সিবু তুরেলগা চাংদম্নরি অমদি পুন্সি অসিবু ঙাকপী শেনবীরিবা মখোয়বুনা তুরেল্গী তোর্ব্বানগা চাংদম্নরি। কবি ইরক্লি, “ তুরেল!/ নঙবু খঙদবরা/ নীংখায়রক্লিবা তোর্ব্বানগী অৱাবা?/ তোর্ব্বান্না নীংখায়-নীংখায়ক্লগা/ নঙনা নোকনা খেনা/ নাপল তৌর-তৌরদুনা/ কনাগীসু অৱাবা উবীদনা/ ঈরৈগা লোয়ননা/ মায়থোঙ মকা লাম্না/ লাউনা খোংনা চেল্লক্লি।/ মসিবু/ তুরেল নঙগী নচৎলা?” (লাঃ ১১) শৈরেং অসি মতম অসিগী রাজনিতিগী লুচিংবশিংগা চাংদম্নবসু য়াই। মীয়াম্না তোর্ব্বাননি অদুগা চেন্থরিবা তুরেল অসিনা লৈঙাক অসিবু মমায় চুম্লিবা লুচিংবশিং অসিবু ওইহনবসু য়াই। মখোয়না হে তোংবা অমদি নাপল তৌবনা পুম্নম্মকি মাংজবা ওই হায়বসিসু শৈরেং অসিদগী লৌশিনবা য়াবা এনালোজি অমনি হায়না লৌবসু য়াই। 

‘নীংশিংবা’ হায়না মিংথোনবা শৈরেং অসিদা কবিনা ইরক্লিবসি ঙসিগী মনিপুরগী নেস্নেলিজমগী ওইরক্লিবা মশক অমনি। লৈবাক নীংবা, ইরমদম নুংশিবা অমদি পোকনফম ইমা মহাক্কীদমক ৱাজবা, ইমা লৈবাক মহাক্কীদমক নিংদোল পোমজবা পুম্নমক ফোংদোক্লি। মনিপুর ইন্দিয়াদা তিল্লুরে। লৈবাক অসিগী স্তেট অমনি। মনিপুরদি মনিং মখা তম্না পাল্লম্মি। নিংতম লানফমসু মায়োকনখি অদুগা আগস্ট থাদা অথৌবশিংবুসু ফা৺সি থৌরি কোঙ্গোই হুকখি। থা অসিদা ইন্দিয়াসু মনিং মখা তমখি। ঙসিদি চম্মনবা কয়া পোকহল্লকলি। মরমদি ইন্দিয়া লৈঙাক্কী থৌওংশিংনা মনিপুরদা ওইহল্লক্লিবা থৌদোকশিং অসি নৈনবদা। অসিগুম্বা ফিভম অসিদা কবিনা ইরক্লি, “ আগস্ট থা/ নঙ য়ৌরক্লে।/ নঙ  য়ৌরক্তনা/ করম্না শিন্থগনি/ মমা লৈবাকপু নুংশিজবা/ মচাশিংগী মায়থোঙদা/ মীৎকী পি।/ ঐ খঙই/ আগস্ট থা/ নঙ য়ৌরক্লে হায়বা।/ নঙ য়ৌরক্তনা/ করম্না পাইগনি/ অতিয়া শীনবা থুংনা/ মরৌ লৈবা/ অমুবা লৈচিলগী মপৈ।/…আগস্ট থা/ য়েংঙু/ ফৈদাপূংদনা য়ান্থরি/ লৌনমগী থৌরী কোঙ্গোয়/ মমা নুংশিবা মচাশিংগী/ ঙকশমদা হুকনবা।/ অদুগা অমুকসু য়েংঙু/ আগস্ট থা/ কংলাদনা পাইরি/ লোইলম শন্দোকপগী/ মায় পাকপগী ফিরাল।/ অদুগা/ মায়থীরবা মচাশিংগী কায়রবা থম্মোয়গী লাইয়ুমদনা/ লমন খুম্নীংবগা লোয়ননা চিংখৎনবা হোৎনরি/ মরৈবাক নুংশিবগী ফিরাল/ নীংঙমদবগী চৈখোক্তা…” (লাঃ ১৬) ফিরালদি ঙসিসু ময়েক শেংবা ইঙমদবগুম তৌরি। থৌনাসু ফুদোকপা ইঙম ঙমদ্রি। লম্মুকনরি হিংবগা নিংতম্বগা। 

লাইরিক অসিগী মিংথোল ওইরিবা শৈরেং, ‘কোন্থোং লোন্দ্রবা ইরানয়াই’দা কবিনা তেংথারী কনাগুম্বী নুজা অমগী নুংশি ৱাইথুংনখিদ্রবা পুন্সি অমনা পুন্সি চেংজেল লোইদুনা খমনুং লমদম পাংখ্রবা মতুংগী মশক অমা। মসিদা কবিনা অদুগুম্বী নুজা অদুনা তাইবঙদা অমুক লাকপা থোক্লবদি মহাক্কীদমক্তা শাবী মাঞ্জ মহাকনা নুরা ইবেম্মা মশুংলাংগীদমক লেপ্লি অমদি থম্মোয়গী কোন্থোংসু মকা লাম্না লাওনা হাংদুনা লৈরি হায়না নুংশিনা পাউমেল্লকই। হায়রিবা থম্মোয়গী কোন্থোং অসিমক নুজা মহাক্কীদমক মতম লৈবা খীবিক্তা অদুমক হাংদোক্তুনা থম্লি হায়না তেংথারি। কবিনা ইরক্লি, “ পুন্সি চেঙজেল লোইরদুনা/ মনুং মতম চাদনা/ অরোইবা য়াহীপ তানখ্রবী/ নঙবু/ করিগুম্বা/ নঙগী পূন্সিগী শিন্থা লোইদ্রি হায়দুনা/ চঙহল্লক্ত্রবা অশি লৈবাক্তা/ নত্রগা/ মনুং মতম চাদ্রি হায়দুনা / হনখ্রো হায়রক্লবা/ অশি লৈবাক্তগী/ লাকউকো/ নঙগী থৱায়না/ ঐগী কোন্থোং লোন্দ্রবা ইরানয়াইসিদা।/…” (লাঃ ১০১) কবিনা পুন্সিদা থেংনবা এক্সপরিয়েন্স অমদি অৱাবা নুংঙাইবা কয়াগী মরক্তা ফাওরকপা পুকনিং ইহুলশিংদু শৈরেং ওইনা লাচল্লকপনি হায়না লৌই। লাইরিক অসিদা অতোপ্পা পাউজেল পীবা শৈরেংশিংসু য়াওরি। শৈরেংবু নুংশিজবশিংনা পাহন্নিংই। 

লেপ্তনা থাংজিল্লক্লিবা খোরিলোলগী খোংচৎ অসিদা মথং মথং চোকথবা লৈতনা লাইরিক কয়াসু মনিপুরী খোরিলোলদা খুদোল তম্লকখিগনি হায়না থাজবা থমজরি।