• 188
• ৬ই সেপ্টেম্বর ২০২৫ ইং
• Share on:

ওজা-গুরুশিংনা চৎলম্বা অমদি থম্লম্বা মণিপুরী জগোয়গী লীক্লম অসি কায়হন্দনা থম্বা পাম্মীঃ এল মোনিকা

ইম্ফাল, আগস্ট ৩০ : থোইদোক্না মণিপুরী জগোয়গী লমসিদা ঙসিগী মীরোলসিদা অনৌবা নহা কয়া লেপ্পা লৈতনা অমদি মরাঙ কয়ানা থোরক্লি। মসিমক আর্ত এন্দ কলচরগী পূক্কৈনা চোল্লবা লমদমসিগীদি হেন্না লাইবক ফবনি।

ময়ামসিগী মরক্তা য়াওরকপা নৌনা মচীন তুমখৎলক্লিবী মণিপুরী জগোয়গী আর্তিস্ত অমনি লাইখুরাম মোনিকা। ইম্ফাল ইস্ত দিস্ত্রিক্তকী মনুং চনবা তোপ ময়ায় লৈকায়দগী লাইখুরাম রাজেন অমসুং লাইখুরাম রাশেশ্বরী দেবী অনীনা পোকপা মচীন-মনাও ৫ গী মনুংদা মহাক্না ২ শুবনি। পীক্লিঙৈদগী হৌনা জগোয়দা থৱায় য়াওরকই। মসিদা লাইনীং ওইরকই। অদুবু মখোয়গী ইমুংদা মহাকখক নৎতনা কলাগা মরী লৈনবা অমত্তা য়াওদে। মঙোন্দা জগোয়গী তোপ-তোপ্পা পীথোরকপা অমা য়াওরম্বদুনা মরম ওইরগা ইমুংনসু পীক্লিঙৈদগী হৌনা মহাকপু মপূং ফানা সাপোর্ত তৌদুনা লাকখি।

মহৈগী থাক্না জুলোজি ওনর্স গ্রেজুএতনি। মশাগী এদুকেস্নেল লাইনদসু হোৎন-হোৎননা মশানা পামজবা জগোয়গী শিনফম অসিদুস লেপ্তনা খোঙ থাংজিনখি। ইং ২০১৮-১৯ দা জে এন মণিপুর দান্স একাদেমীদগী খুখু সরকার গোল্ড মেদলগা লোয়ননা দিপ্লোমা পাস তৌরবা মতুং ইং ২০২২-২৩ দা লাই হরাওবদা পোস্ত দিপ্লোমা পাস তৌখি। লোয়ননা ইং ২০২১ দা মণিপুর য়ুনিভার্সিতিদা মণিপুরী জগোয়দা মাস্তরসু লোইশিনখ্রে।

হৌজিক-হৌজিক্না জে এন মণিপুর দান্স একাদেমীগী প্রোদাক্সন য়ুনিত্তা দান্স অমা ওইনা থবক চঙদুনা মহাক্না পামজবা মণিপুরী জগোয়গী লম্বীসিদা লেপ্তনা খোঙ থাংজিল্লি। লোয়ননা দুরদর্শন কেন্দ্র ইম্ফালগী বি-গ্রেদ আর্তিস্ত অমসু ওইরি। অসুম্না মহাক্না জগোয়গী লমসিদা লেপ্তনা চঙশিল্লকপা অসিদা মহাকপু শক খঙবা ওইনা মণিপুর স্তেত কলা একাদেমীনা ইং ২০১৮-২০২০ দা মণিপুরী ক্লসিকেল সোলো দান্সতা স্কোলরসিপ পীখ্রে।

পাউ-চে অসিদা মোনিকানা হায়, মহাক্না হেক খঙলকপদগী জগোয় অসি অদুম পামজদুনা লাকখি। মদুনা মরম ওইরগা লৈকায়গী অমদি স্কুল-কলেজগী ফঙ্কসনা অয়াম্বদা জগোয় অদুম শারকই। জগোয়নিবু হায়রবদি মশাদা অতনবা অমত্তা লৈরক্তে। মহাক্না খ্বাইদগী পামজবসু জগোয়গী আর্তিস্ত ওইবনি। অমরোমদা, মণিপুরী জগোয়সু মতমগী হোংলক্লিবা ঈচেলসিদা হোংদবা য়ারক্তে, য়াওদবা য়ারক্তে। মশামক জগোয়বু পামজবা অমদি আর্তিস্ত ওমা ওইনা মতমগী লক্লিবা কলাগী অওনবা অসিদসু য়াওশিন্দুনা কন্তেম্পরিগী চাংয়েং অসিসু অদুম তৌন-তৌনা লাইওইখ্রবা ওজ-গুরুশিংনা ঐখৈায়গীদমক তাশিন-খোমজিন্দুনা থম্বীরম্বা মণিপুরী জগোয়গী কাঙলোন অমদি লীক্লম অসিসু কায়হন্দনা অদুম থম্বা পামজৈ হায়খি।

মহাক্না হেক ঙম্লিবমখৈ জগোয়গী আর্তিস্ত অমা অদুম ওইনীংই। লোয়ননা ঙসিগী হৌরক্লিবা মীরোলসিদা গুরু-শিষ্য পরম্পরাগী ঈচেলদা ঙসি ফাওবা চেন্থরক্লিবা মণিপুরী জগোয় অসিসু খঙহনবা পাম্মী। মসিনা ঙসি ঐখোয়গী খুন্নাইসিদা কায়থরক্লিবা থকশি-খাশি, থৌগল্লোন, চৎনবী অমদি থক-খা মশক খঙনরক্ত্রিবা কয়া অসিদগী খরদং ওইরবসু কনবা ঙমগনি হায়না খল্লি। ফনা ইনাক খুল্লবসু, ফনা লাইরিক-লাইশু লৈরবসু থৌগল্লোন-ব্যবহার মশক খঙলক্ত্রবা খুন্নাই অদু চাওখৎপা খুন্নাই অমনি হায়বা খক য়ারোই। ঐখোয়গী খুন্নাইগী মশক অসি ঐখোয়না শেমজগদবনি। ঐখোয়গী আর্ত এন্দ কলচরদা য়াওরিবা ফজরবা চৎন-লোনচৎশিং অসি ঙসিগী মীরোল অসিনা খঙবা তঙায়ফদে হায়নসু মহাক্না মখা তানা ফোঙদোরকখি।
 

গুরু পি ধনজিৎ, অখাম লক্ষ্মী, জি চন্দন দেবীনচিংবা য়াওনা তোঙান-তোঙানবা ওজা-গুরু কয়াদগী গুরু-শিষ্য পরম্পরাদা জগোয় তম্লক্লবা অমদি ৱা ঙাঙবদা ঈংনা-তপ্না মোং হাদনা ঙাঙবা আর্তিস্ত অসিগী মশাদা জগোয়বু থম্মোয় শেংনা পামজবা অমদি কলা অসিবু নুংশিজবগী ঈহুল অমা মশাদা চেল্লি।

মচীন তুমখৎলক্লিবী জগোয়গী আর্তিস্ত অমা ওইনা লাইখুরম মোনিকা-মাউরিসিয়স, মদাগাস্কর, জোহান্সবর্গ, বোতস্বানা অমদি স্বাজিলেন্দদা ইং ২০২২ দা পাঙথোকখিবা ৭৫ শুবা এনিভর্সরি ওব ইন্দিয়াজ ইন্দিপেন্দেন্স দে শরুক য়ারুরে। লোয়ননা রিপব্লিক দে, মহাকুম্ভ মেলা, কোনার্ক ফেস্তিবেলনচিংবা কয়াসি য়াওনা লৈবাক অসিগী তোঙান-তোঙানবা স্তেতশিংদা পাঙথোকখিবা দান্স ফেস্তিবেল কয়াদসু মশীং খঙদনা পারফোর্মেন্স কয়াসু ঊৎলুরে।

থোইদোক্না জে এন মণিপুর দান্স একাদমীগী মমীং লৈরবা ‘কৈবুল লমজাও’, ‘বিদাই অভিশাপ’, ‘অহীং গী লাল’ অমসুং ‘মীরা’ নচিংবা দান্স দ্রামাশিং অসিদা মরুওইবা রোলশিংদা তোঙান-তোঙানবা শক্তম কয়া লাংদুনা পারফোর্মেন্স কয়া ঊৎখ্রবী আর্তিস্ত অসি হৌজিকসু হোৎনবা অমদি তম্বদা মশাদা চোকথবা নাইদ্রি।

তুংগী পুন্সিদা জগোয়গীদমক শিজগে হায়বসি মহাক্কী থম্মোয়দগী মাঙহন্দনা থম্লিবী আর্তিস্ত লাইখুরাম মোনিকা দেবীগুম্বী মচী তুমখৎলক্লিবী কয়ানা মণিপুরী জগোয়গী ফম্বাক্তা চেন-চোংদুনা শান্নরিবমখৈ মণিপুরী জগোয়না মালেমদা তোমথীন অদুম ঙান্দুনা লৈখিগনি। লেন্দ ওব কলচরনি হায়দুনা চাওথোকচরিবা স্তেত অসিদা আর্তিস্তশিংগী অৱাৎপা লৈতে। অদুবু আর্তিস্তশিং অসিগী অৱাবা অমদি খুদোংচাদবা কয়াসিদি মীয়াম অমদি মরী লৈনবশিংনা মশক খঙবিবদি ৱাৎলি। মসিমক্তং মেনশিনবা ঙম্লবদি ইনাক খুল্লবা কলাগী পূক্কৈনা চোল্লবা লমদম অসি সনাগী মথক্তা তম্ফা থিনবা হায়বদু ওইগনি খল্লি।
কোর্টেসি : পোক্নফম