• 8
• ২৫শে জুলাই ২০২৪ ইং
• Share on:

ইবোসনা য়াম্বেমগী লাইরিকঃ মণিপুরী সাহিত্যদা সমালোচনা অমসুং অতৈ ৱারেংশিং

কোকু ( ১৪ জানুয়ারি ২০২৪ ) পোক্নফম

‘মণিপুরী সাহিত্যদা সমালোচনা অমসুং অতৈ ৱারেংশিং’ মিংথোনবা লাইরিক অসিবু ইবা ইবোসনা য়াম্বেম তেন্থাদগীনি। পোক্নফম পাউ চেগী কলমনিস্ত ওইরম্মী। মহাক্কী হান্না ফোঙখ্রবা লাইরিক্তি ‘কংফালগী অরোইবা লমদমদৈ’ (লমকোয় ৱারী, ২০০৭) হায়বসিনি।

লাইরিক অসি য়াম্বেম কমলকিশ্বর অমসুং য়াম্বেম কমলজিৎনা য়াম্বেম ব্রোসকী মহুৎ শিন্দুনা ইং ২০১৬ তা ফোঙবনি। লামায় ২৩৪ পাল্লি, মমল লুপা ২০০ পী। নৈন-ৱারেং ১৪ য়াওবা লাইরিক অসিদা ইবোসননা মনিপুরী খোরিরোলবু কূপ্না নৈনদনু ইরি। মণিপুরী খোরিরোলদা অঙাংশিংনা পাননবা লাইরিক কয়া য়াম্না লৈরবগে, কনা কনানা অঙাংগী লাইরিকশিং ইবগে হায়বগী মতাঙদা নৈনরি। মণিপুরী খোরিরোলদা করম্বা মতমদগী নৈন-ৱারেং ইবা হৌরকখিবগে হায়বগী মতাঙদসু শুগায়না ইরি।

এলাংবম নীলকান্তনা ইরম্বা ৱারেংশিংগী মতাঙদসু ইবোসনানা কূপ্না নৈনরি। মীনকেতননা ইরম্বা শৈরেংশিংনা মণিপুরী খোরিরোলগী তাইবঙদা কয়া য়াম্না মফম কল্লম্বগে হায়বগী মতাঙদসু নৈনরি। রাজকুমার শীতলজিৎ সিংহগী পুন্সি অমসুং থবক্কী মরমদমসু কূপ্না ইরি। বাংলাদেশকী মণিপুরী খোরিরোলদা মীৎয়েং থমদুনা বাংলাদেশতা ফোঙবা ‘মৈরা’ অমসুং ‘শজিবু’না মণিপুরী খোরিরোল চাওখৎনবা হোৎনবগী মতাঙদসু ইরি। লময়ানবা ইরাবতনা ইরম্বা শৈরেংশিংদা নুপীগী মশক কয়া য়াম্না য়াওবগে হায়বগী মরমদসু নৈনরি। দা. কমলগী শৈরেংদা হ্যুমেনিজমগী মশক কয়া য়াম্না য়াওবগে হায়বসু নৈনরি। তশেংনা লাইরিক অসি মণিপুরী খোরিরোলগী মহৈরোয়শিংদা কান্নবা লাইরিক অমা ওইরগনি।

অঙাংগী লাইরিক নৈনবাঃ

আকাশবানী ইম্ফালদা পাঙথোকখ্রবা ইবোসনাগী ৱারেং ‘মণিপুরী সাহিত্যদা অঙাংগী লাইরিক’ অসি লাইরিক অসিগী লামায় ১৫৪ দা হাপ্পি। অঙাংগী লাইরিকশিং থোরক্ত্রিঙৈগী মমাঙদা মমাঙগী মীরোলশিংনা অঙাংশিংগীদমক্তা অঙাংগী সাহিত্যগী পূক্কৈ থম্বিরম্মী। মীরোল মীরোল চীন্থাং য়ৈনা শক্নদুনা লীনদুনা লাক্লবা নাউশুম ঈশৈ, পাঙখোঙ, ফুঙ্গাৱারী, হেলোয়গী ৱারী, লৈশেমলোন অমসুং লাই তীনগী ৱারী কয়া অসিনা অঙাংগী লমচৎ শাজৎ শেমগৎপা অমসুং পূক্নিংগী লমচৎ শাগৎলকপদা খ্বাইদগী মরু ওইখ্রবা, ঐখোয়গী অহল লমনশিংনা অঙাংশিংগীদমক্তা থম্বিরম্লবা অঙাংগী সাহিত্যগী পূক্কৈনি হায়না লাইরিক অসিগী লামায় ১৫৫ দা ইরি। পূক্কৈ অসিদা শৈরৈংগী শরুক, ৱারেংগী শরুক, ঈশৈগী শরুক, পাউতাক্কী শরুক, লাইনীং লাইশোনগী শরুক, লমচৎ শাজৎ শেমগৎপগী শরুক, পূক্নিং লমচৎ শেমগৎপগী শরুক, পূক্নিং লৌশিংগী শরুক, পুন্সি অমদি জ্ঞানগী শরুক কয়া মরাঙ কয়না য়াওরি হায়না ইবোসনানা ইরি। মালেমগী লৈবাক কয়াদা অঙনবা মতমদগী ইনরকখিবা অঙাংগী লাইরিকশিং নৈনরুরবা মতুংদা ইবোসনানা মণিপুরী খোরিরোলদা মীৎয়েং তারকই।

মণিপুরী খোরিরোলদা অঙাংগী লাইরিক ফোঙবা হৌনরকপসি ১৯৬০ গী মতুংদগীনি হায়না ইরি। লাইরিক অসিগী লামায় ১৬৯ দা ইরি, ‘১৯৬০ গী অদুৱাইদা ফুঙ্গাৱারীশিংদা য়ূম্ফম ওইরগা অঙাংগী লাইরিক খরা য়াম্না তাঙনা থোরকই। হীরম অসোমদা খূৎমাবা অইবশিংদি-শরাংথেম বরমনি, রাজকুমার সনাহল সিংহ, লাইশ্রম থানিল সিংহ.. শগোলশেম ইন্দ্রকুমার সিংহনি।” ঙসিদি মণিপুরী খোরিরোলদা অঙাংগী লাইরিক্কী মশীং ফনা য়াম্না লৈরে।

মণিপুরী খোরিরোলদা নৈন-ৱারেংঃ

লাইরিক অসিগী ইহান হানবা ৱারেং নি ‘মণিপুরী সাহিত্যদা সমালোচনা’। মণিপুরী খোরিরোলগী তাইবঙদা নৈন-ৱারেংগী ঈহৈৗ লাকখিবা মতম অসি হিজম ইরাবত অমসুং খ্বাইরাকপম চাউবগী মতমদগীনি হায়না লাইরিক অসিগী লামায় ৬ তা ইরি। চাউবনা করি করি ৱারেং ইরম্বগে হায়বগী মতাঙদা ইবোসনানা ইরি, “মণিপুরী সাহিত্যদা চাউবগী সমালোচনা নৈনবা তারবদি শোয়দনা থাদোক্নবা য়াদবা মশামক্কী ৱারেং খরা লৈরি। মখোয় অদুদি মণিপুরী সাহিত্যগী সমালোচনা অমা, মাণিপুরী সাহিত্যগী মরমদা খরদং, মৈতৈ সাহিত্যদা বৈষ্ণব ধর্ম, স্বাধিন মণিপুরী সাহিত্য, কবি অমসুং কাব্য, কবি, মতমগী ৱাখল (খম্বা থোইবী ৱারী মহাকাব্য), মীতৈ সাহিত্যগী ইতিহাসকী মরমদা খরা হায়রিবা ৱারেংশিং অসিদা অঙনবা মতমদা মণিপুরী সাহিত্যগী সমালোচনাগী মশকশিং য়াম্না ময়েক শেংনা ঊৎনবা হোৎনরি।” (লামায় ৭) কনা কনানা নৈন-ৱারেংগী লমদা খূৎ থারম্বগে হায়বদু লাইরিক অসি পাবদগী খঙবা ঙমগনি। হীরম অসিদা খূৎ থারম্বা অইবশিংদি-চীংঙাখম পীশক, সিনাম কৃষ্ণমোহন, দ্বিজমনি দেব শর্ম্মা, হাওবম গৌরদাস, থোকচোম যোগেন্দ্র, অরিবম কুমার শর্ম্মা, সুরেন্দ্রজিৎ সিংহ, হৱাইবম রনবীর সিংহ, লোংজম জয়চন্দ্র, শ্রীবীরেন, অয়েকপম চন্দ্রমনি অসিনচিংবনি।
লাইরিক ওইনা শাগৎতুনা অকক্নবা হীরমদা পীবা সমালোচনাগী মশক পুথোক্লম্বসি শ্রীমীনকেতননা ইহান হাল্লি হায়না লাইরি অসিগী লামায় ১৫ দা ইরি। নীলকান্তগী ৱারেংগী লাইরিক খরদা সমালোচনাগী ৱারেং খরদি য়াওরে। মহাক্কী অচাইবা লৈদগী হৌদুনা শীতলজিৎ, চাউবা, কমল, নবদ্বিপচন্দ্র, অঙাংহল অমদি অতৈ অইবা কয়াগী মরমদা শৈরেং, উপন্যাস অতৈ হীরম কয়াদা সমালোচনাগী মীৎয়েং কয়া ইদুনা থম্লম্মী হায়না ইবোসননা ফোঙদোক্লি।

মণিপুরী ৱারী লীশাংগী খোঙচৎঃ

মনিপুরী উপন্যাস (ৱারী লীশাং) গী খোঙচৎ অসি ২০ শুবা চহীচাগী অঙনবা মতম (অনীশুবা মালেমগী লাঞ্জাও মমাঙ) দগী হৌরকখি। মতমদুগী ৱারী লীশাং ইবশিংদি চাউবা, কমল অমসুং অঙাংহলনি। শীতলজিৎসুনি। মখোয়না ইরম্বা ৱারী লীশাংগী খূৎইগী মওং অসি লান মতুং ফাওবা চৎথরকখি। শীতলজিৎনা লান মতুং ফাওবা মখা চৎথরক্তুনা ৱারী লীশাং ইবা কয়া অমা লেপ্পা লৈতনা রজনীকান্ত, ইবোহল, বীরচান্দ, চিত্রেশ্বর, তি ইবোমচা, ইন্দ্রকুমার, রামসিং, সোনামনি, বী এম মাইস্নাম্বা, থোইবী দেবী, বিনোদিনী, পাচা মীতৈ থোরকখি। লাইরিক অসিগী লামায় ২৮ দা পাচা মীতৈনা করম্না ৱারী লীশাং (মণিপুরী খোরিরোলদা) গী খোঙচৎতা অহোংবা পুরকখিবগে হায়বগী মতাঙদা ইরি “ পাচাগী ১৯৬৯ দা ‘না তাথীবা অহল অমা’ পুথোরকপদগীদি মণিপুরী উপন্যাসকী খোঙচৎতা পূমওন ওনবা, পূমনৌ নৌবা অচৌবা অওনবা অমা পুরকখি। উপন্যাসকী লমদা লোইতোংবম পাচানা মপান লমগী ওইবা অকনবা অহোংবগী নোংলৈ নুংশিৎকী ইপোমদা তোংদুনা মণিপুরী সাহিত্যধা অহানবা চাংয়েং তৌখি, চাংয়েং অদুদা মায় পাকখি।”

পাচাগী মতুংদা থোরকখিবা ৱারী লীশাং ইবশিংদি-অরিবম চিত্রেশ্বর শর্ম্মা, এলাংবম সোনামনি সিংহ, অরাম্বম বীরেন সিংহ, বী এম মাইস্নাম্বা, হিজম গুণ সিংহ অমদি এম বরকন্যা দেবীনি। মথক্তা পঞ্জরিবা মমিংশিং অসি অঙাং অহল নাইবগী পরীংদা ইজবা নত্তে, মখোয়না ফোঙলকখিবা লাইরিকশিংগী চহীগী মতুং ইন্ননি। হৌজিক য়ঙ য়ঙ লাউনা ইরিবা ৱারী লীশাং ইবা অমসু হাপচিন্নীংঙি-চা খোম্মৈ। মহাক্কী ইবগী স্তাইল অমসুং তেক্নিক পাচা মীতৈগা য়াম্না নকশীন্নৈ। মণিপুরী ৱারী লীশাংনা তাংবঙদা অনৌবা খূৎপুথোক অমসু লাকখিগনি, ঙাইখিসি। য়েংসি ঐখৈায়।
 সোর্স: পোক্নফম