অঙনবা মতমদা অৱা লৈপাক্কা লৈনবা মরি
লোংজম সোমরেন্দ্র অরুন
লৈখিদ্রবা ভারতকী প্রাইম মিনিস্টার জহরলাল নেহেরুনা পাল্লিঙৈ মতম, মার্চ ২৮, ১৯৫৩, থাংজ নুমিত্তা মণিপুরদা লাক্লম্মী। নোংঙাল্লগা বর্ম্মাগী প্রাইম মিনিস্টার উ-নু অমুক লাকই। মখোয় অনিগী খুজিন থৌরাংদগী কবো তম্পাক্কী খোঙ্গুল মণিপুরগী লৈমায়দগী মুৎখি। অন্দমান নিকোবরগী ঈথৎশিংসি ভারতকী অপূনবা লমগী মনুংদা খোপচিন্নবা হোৎনবদা মণিপুরগী কবো তম্পাক উশিন ওইখিবনি হায়নবা লৈরি। বর্ম্মাগী মনুংদা লৈবা অন্দমান নিকোবরবুনা ভারত্তা, ভারত্তা লৈবা ঐখোয়গী কবো তম্পাক্না বর্ম্মাদা ওন্থোক-ওনশিন তৌজবতনি। ভারতকীসু বর্ম্মাগীসু অমাংবা করিসু লৈতৈ। মাঙজরিবদি মণিপুরখক্তগীনি।
কংলৈপাক মণিপুর হায়রগা খঙনবা মফম অসিদা চংলক্তুনা খুন্দারিবশিংগী মনুংদা নোংপোক হারমগী মীওই কয়া অমনি। নোংপোক হারমদগী মণিপুরদা মীওই কয়া ঙল্লিঙৈগী মতমদগী হৌনা মথং-মথং নিংথৌরোল কয়াগী হাক্তক্তা লাক্তুনা য়ুম্নাম শাগৈ লিংদুনা/পীদুনা মীতৈ ওন্দুনা খুন্দা লৈতাহনখি। অসুম্না মফম অমদগী মফম অমদা য়ূমহোং-কৈহোং তৌরকপা মীওই কয়া অসিনা মরুওইনা মণিপুরগী অৱাং-নোংপোক অমসুং খা-নোংপোক্কী লমদমশিং ফাওজিল্লক্তুনা মণিপুরগী লৈঙাক্লোন্দা অকনবা শাফু পীরকখি। অসিনা মরম ওইরগা হান্না লৈরম্বা কাঙলূপশিংদা পূনশিনখি/তিনশিনখি। অসুম্না পুৱারীগী তাঙ্কক কয়াদসু মাইকৈ কয়াদগী কাঙলূপ কয়া খুল থোরকপগী মতাংদা লংদাই কৌবা লাইরিক্তা অসুম্না পল্লিবা, ‘নয়ুম মৈরম পাংবদা খুন্থোক্লকপা নবুধৌদি অৱা মরোল লোন্না খুন্থোক্লকএ। নয়ুম নোংপোক মায়কৈদা খুন্থোক্লকপা নবুধৌশিংদি পোইরৈ লোল লোন্দুল খুন্থোক্লকএ” হায়বা অসিনা নোংপোক মাইকৈরোমদগীসু লাক্তুনা খুন্দারৈ হায়না তাকই।
মসিদা নত্তনা অরিবা ৱারী লাইরিকশিং কয়া অমদসু মণিপুরগী ঙমখৈ পরিং অসি মণিপুর তুরেল অমসুং নিংথি (চিন্দউন) তুরেল ইতিন্নফম ওইরিবা ম্যানমারগী মনুংদা লৈরিবা কালেগী লমদম অসি য়ৌরম্মী হায়না নিংথৌ লম্বুবা কৌবা লাইরিক্তা ইরিবা, “হাওরৈ নোংপোকলা পাংবারম য়িংথি লাইজ ঈরম য়িন্না অয়ুম পোইরৈ মৈতৈ-ঈ চীংঙু নোংথৌ সোরোরেলনা মমোন নোংবাল্লোন নোংমোইনু অহোঙবী তুসাকোল তুরেল লেপা চা থাংৱাই সারেন তংলোন য়িগা চকপা অংগ, ঈ য়িংথি য়িয়াচাও চোইনৌ সনা পোকপা য়িগা লাইজ য়িরম অনিমকপু..” (১৯৪২:২) হায়বা অসিনা লমদম অসি খৃষ্টগী অহানবা চহীচাগী মতম অসি ৱIইদা অঙোম নিংথৌ পুলৈরোম্বগী লমখৈ ওইরম্বা লমদমনি হায়বসি তাকই। পুৱারীগী ঙল্লিঙৈ মতমদগী লমখৈ মনুং চল্লম্মী হায়বগী মতাংদা য়াংবী থিরেল কৌবা পুয়াদা অসুম্না ইরি, ‘..অংগো চীংজাও পোকপা কুপত্রেং সনামহিনা অঙোম পোকএ” অমরোমদনা সনামহিগী মিংখৈরোন চাম্মা হম্ফুনীপালগী মনুংদা অংকো নৎত্রগা অঙ্গো হৌজিক্তি ম্যানমারগী নিংথি তুরেলগা থংনরিবা চীংশাং হায়বসিসু অমা ওইবনা অঙোগচীং অসি মীতৈশিংগী থাদোক্নবা য়াদ্রবা মফম অমা ওইনা লৈরকই হায়বসি তাকই। মতাং অসিদা পনবা য়াবা অমনা হৌজিক হৌজিক ম্যানমারগী মনুং চন্দুনা লৈখ্রবা অঙ্গোচীংগী মমিং অসি ফাওবা মীতৈশিংনা কৌখিবনি হায়বগী মতাংদা Burma Gazetter, Upper Chinwin District (Vol.A)দা অসুম্না ইরি, “The Shans and Burmese are plain dwellers, and rarely give names even to the mountains which they see everyday. Accordingly there is no nem in Burma for this range, but the Manipuris call it the Angaw ching or Angaw Maountains” (Grant, 1960, 830-84)হায়রিবা ৱাহৈশিং অসিনা ম্যানমারদা লৈরিবা অঙ্গোচীংগী মমিং অসি অঙোগম নৎত্রগা অঙৌ হায়বা অসিদগী লৌদুনা কৌখিবা/থোনখিবা ওইরম্বা য়াই। মরমদি অঙোম নিংথৌশিংবু অঙৌ নৎত্রগা অঙৌপানবা হায়না খঙনৈ।
মণিপুরগী ঙমখৈগী মতাংদা, মণিপুরদা বৃটিশনা পাল্লিঙৈ মতমদ জোইন্ট কমিশনার ওইরম্বা কেপ্টেন পেম্বরটন্না মাগী লাইরিক Report on the Eastern Frontier of British India দা অসুম্না ইরি,
“The territories of Munneepoor have fluctuated at various times with the furtunes of their princes, frequently extending for ther or four days journey east beyond the Ningthee or Khyendween river and west to the plains of Chachar.” (Pemberton, 1991:22-23)”
কবো তম্বাক
অসুম্না মথক্তা পঞ্জখ্রিবা ঙমখৈগী মতাং অমদসু মুতুৱা বাহারদুনা ইবা মহাক্কী লাইরিক মণিপুরী আর্টকী ৱারী শীংবুল দা অসুম্না ইরি, “নিংথি তুরেল অমসুং অঙ্গো চীংশাংনা কোনবা তম্পাক অসিদা হৌজিক ফাওবা মীতৈশিং খুন্দারি, অৱাংলোমদা সোম্রা লমশাংনা কোনখ্রিবা অঙ্গো চীংশাং ফাওবদা তাখ্রিবা সেস্রো, ফুদ্রেৎ, লৈয়ুম, পনশাং, মৈহোং, কোনগা, ইরোং কোকি, ঙাচক, হৈনকোক অৱাখোং অমসুং লৈশিন-তাচিংবা খুলশিং অসি মণিপুরী ঙাক্তনি।”
চৈথারোল কুম্বাবা হায়বা লাইরিক অদুগী মতুংইন্নদি খৃ: ৬৬৩-৭৬৩ ফাওবদা পানখিবা মৈদিংঙু নাউথিংখোংগী মতমদসু পোং নিংথৌ সুকানফাগী মনাও সামলুংনা মীতৈ লৈপাক্তা চহী ১০ লৈরম্বগী ৱাফম পল্লি। নাউথিংখোং হাক্তকতগী মতুং তারকপা মীতৈ নিংথৌশিংগী মতমদা চংলকখিবা নোংপোক হায়রমদগী মীওই কয়া অমা য়ুম্নাক শাগৈ পীদুনা তিনখি। অদুবু চহী লিশাং শিৎনা মরুপ মপাং ওইবগী ৱাখল্লোন অসি শাগোন্নদুনা লাকই। মৈদিংঙু ক্যাম্বা (খৃ: ১৪৬৭-১৫০৮) না পানবা মতমদা পোং নিংথৌ চৌফা খিখোম্বগা লম য়েন্নবা পোং নিংথৌগী মনাই লাকৱান পেরে খোংবগা মৈদিংঙু ক্যাম্বগী মনাই শেম্বা পুংয়ৈবগা শিন্নবগী ৱাফম চৈথারোল কুম্বাবা অমসুং পোং লম য়েন্নবা নচিংবা পুয়াদা ইদুনা লৈরি। পোং হায়রিবা অসি অৱা লৈপাক্তা লৈবা লম অমনি, মসিদা লৈবা মীসু পোং হায়রগসু খঙনৈ। পোং নিংথৌ খিগোম্বগী ৱারীদা পোং হৈতোন (পুংদোন) অসিনচিংবা কয়া কবো তম্পাক, অৱা লৈপাক্কী ৱারীশিং অসিনা মরী ইরৈ লৈনৈ হায়বসি তাকই। মদুনা (ম্যানমার) হায়রগসু খঙনৈ। মণিপুরগা য়াম্না নক্নবা পুকচেল খোইজেন তিন্নবা লৈমিন্নরকপা অৱা লৈপাক্নি। মতম মতমগী পুৱারীগী ওইবা তাঙ্কক্তা য়ানদবা অমগী মতুং ইন্নসু মরক মরক্তা য়ুমলোন্নরিবশিংগা য়ানদবা খরদগী লান মতৌনৈ। লান তৌনজরবসু লৈপাক মীয়ামগী ওইবা মরীদি তৎন-থানরমদে, চারৌ মৌরৌনবা, লল্লোন ইতীক তৌবনচিংবা লেপ্তনা চত্থরম্মী। অদুবু পুৱারীগী ঙল্লিঙৈ মতম অসিদদি মালেমগী অতৈ মফমশিংদা ইতৌ তৌনখিদবগুম ঙমখৈ পরিংদা পলনচিংবা খাদুনা নুং য়ুংবনচিংবা অসি কয়া তৌররমদে। খরা তৌরকপা অসিসু অয়াম্বনা অথেঙবা মতমগী ওইনা তৌই। মহৌশা লাইরেম্বীনা শেম্বীরম্বা চীং-পাৎ তুরেলনা অয়াম্বা ঙমখৈগী পরিং ওইনরম্মী। চীংমী-তম্মী খায়দ্রিবা মতম অদুগী শা-তানবগীবু ওইরো, ঙা ফাবগীবু ওইরো, লল্লোন-ইতিক্কীবু ওইরো অসিদা নত্তনা অতৈ মরম অমগীবু ওইরো নোংপোক্লামদা নিংথি (চিন্দউইন) তুরেল ফাওবা মনংতম্না চত্থোক-চৎশিন তৌবা ঙম্লম্মী।
লৈখিদ্রবা ভারতকী প্রাইম মিনিস্টার জহরলাল নেহেরুনা পাল্লিঙৈ মতম, মার্চ ২৮, ১৯৫৩, থাংজ নুমিত্তা মণিপুরদা লাক্লম্মী। নোংঙাল্লগা বর্ম্মাগী প্রাইম মিনিস্টার উ-নু অমুক লাকই। মখোয় অনিগী খুজিন থৌরাংদগী কবো তম্পাক্কী খোঙ্গুল মণিপুরগী লৈমায়দগী মুৎখি। অন্দমান নিকোবরগী ঈথৎশিংসি ভারতকী অপূনবা লমগী মনুংদা খোপচিন্নবা হোৎনবদা মণিপুরগী কবো তম্পাক উশিন ওইখিবনি হায়নবা লৈরি। বর্ম্মাগী মনুংদা লৈবা অন্দমান নিকোবরবুনা ভারত্তা, ভারত্তা লৈবা ঐখোয়গী কবো তম্পাক্না বর্ম্মাদা ওন্থোক-ওনশিন তৌজবতনি। ভারতকীসু বর্ম্মাগীসু অমাংবা করিসু লৈতৈ। মাঙজরিবদি মণিপুরখক্তগীনি।
অৱাগী মীয়োক-মীচনা ফবদি হায়নিংঙাই লৈতৈ, কনাগুম্বা অমনা অৱাগী ইমুং অমদা য়ূমথুংলুবা মতমদা খাউ (পাই) নৎত্রগা ফি অমবু য়াল্লম্লবদি চাক হাপই হায়না অহল লমনশিংনা হায়নরম্মী। অৱাদা মীতৈ নিংঙোলশিং থাজবগী মতাং অমা পনবা তারবদি মৈদিংঙু চরাইরোংবগী মচানুপী চকপা মখাওঙম্বী অৱা নিংথৌদা থাজদুনা লৈমরোন ফমথোন কাহনখি।
মুতুম ঝুলোন্না ইবা মণিপুর ইতিহাস বিজয় পঞ্জালী দা অসুম্না ইরি, ‘মহারাজ গরীবনেৱাজনা অৱাদা অহানবদা লান তাবগী মরমদি চরাইরোং মহারাজগী মচানুপী চকপা মখাওঙম্বী অসি অৱাগী তোংদোই নিংথৌদা থাজৈ। মদুদা তোংদোইনা চকপা মখাওঙম্বীবু চহী অহুম ইন্থোকই, মরম অদুদগী চকপা মখাওঙম্বীনা মবুং চরাইরোংবা মহারাজকী মফমদা চিঠি অমা লোন্না কৎলকই। মহারাজনা নোংগাখিবনা হান্দুনা লাল থারমদ্রে, মচা ইবুংঙো গরীবনেৱাজ পামহৈবগীদা মরম পূম্নমক অসি তাকপীরমই, মরম অদুদগী তেঙ্গোল শেম্লে। তেঙ্গোলগী লুচিংবদি কোরেন সেনাপতি, শাপা কিয়াম্বা, মিয়া পুকচাও অসিনচিংবনা অহানবদা শমজোক কোনং থুগায়রে, মদুদগী মহারাজনা শমজোক (থাংতুত) নিংথৌ ফাদুনা সনা কোনং তানা পুরক্লে। মরম অদুদগী তোংদোইনা শাওরদুনা চকপা মখাওঙম্বীনা পোকপা কেন্দ্রজিৎ যুবরাজনা লাম্মী থারে, লানগী লুচিংবা পঞ্জা হুইদ্রুহনবা লাইফম ৱাঙ্গোল শংলাকপা অসিনচিংবগা লান য়াম্না কন্না শোক্নরে মদুদা খাঙবা ঙমদ্রদুনা অৱা তেঙ্গোল কায়দুনা কেন্দ্রজিৎ যুবরাজসু অহিংদা চেনখ্রে। লেমহৌবা তেঙ্গোল অদু ফাদুনা মহারাজনা কৎলে”
মৈদিঙু উরাকোন্থৌবগী হাক্তক্তসু মীতৈনা কলে (ম্যানমারগী কলেৱা/ কলে হায়না খঙনরিবা) কোনুং লোই চল্লম্বগী ৱারী কলেগী নিংথৌরোলদা য়াওরি। মৈদিংঙু উরাকোন্থৌবগী মতুংদা চহী মঙা নিংথৌ পানখিদে। মতুংদা খৃ; ৬৬৩দা নাওথিংখোংনা নিংথৌ ওই। মহাক্না নোংপোক ইঙ্খোলদা চহী ১০ লৈরমই। মহাক ইরিল তুরেল মরিললোমদা চৎখি। পোংদা লৈরমই হায়বগী ৱারী লাইরিক কয়াদা ইরি। নোংপোক ইঙ্খোলবু অপোং ইঙ্খোল হানসু খঙনরি। কংলাগী অৱাং থংবা মাইকৈদা লৈরিবা লম অসিসু কবো লৈকাই হায়না খঙনৈ। মসিদা নত্তনা মতম অমগী বর্ম্মা, হৌজিক্কী ম্যানমার অৱা লৈপাক কৌরিবসিনি। অৱা লৈপাকপু মীতৈশিংনা কবো হায়নসু খঙনৈ। অৱা লৈপাক্তা হৌজিক মীতৈ খুল য়াম্না লৈরি। অসুম্না অৱাবা ৱারীনা শংবাই, শংবাইনা ফৈদোমশা, ঙাঙলিংবা ৱানা লেমলৈ ঙারু পনবগুম হায়ঙমদা লোনবা তারি কংলৈপাক মণিপুর।
0 কমেন্ট:
কমেন্ট তৌবিয়ু