• 14
• ১৬ই সেপ্টেম্বর ২০২৫ ইং
• Share on:

সাহিত্য পরিষদকী উপাধি, শেলগী মনা অমদি লাইরিক্তা পীবা শেলগী মনা লান্থোকখ্রে

ইম্ফাল, আগস্ত ১০

মণিপুরী সাহিত্য পরিষদকী ৯১ শুবা মপোক কুমওন থৌরম অমসুং ৯০ শুবা চহীগী মীফম ঙসি লোইশিনখ্রে। থৌরম অদুদা সাহিত্য অমসুং তোঙান তোঙানবা কলা তৌরিবশিংদা উপাধি, শেলগী মনা অমদি লাইরিক্তা পীবা শেলগী মনা লান্থোকখ্রে।

মণিপুরী সাহিত্য পরিষদ অমসুং জে এন মণিপুর দান্স একাদেমি অনীনা খুৎশম্নদুনা জে এন এম দি এগী ওদিতোরিমদা পাঙথোকখিবা থৌরম অদুদা নোংমাইথেম তোম্বী সিংহ অমদি লমাম্বম বিরমণি সিংহদা সাহিত্য ভূষন উপাধি, রহৈজুদিন শৈখ (শামু) দা সাহিত্য সেবক উপাধি, শামুরাইলাৎপম নিমাই শর্মাদা নট সঙ্কির্ত্তন, মোইরাংথেম তিকেন্দ্রদা মতম ঈশৈ অমদি চাউবা কমসোন্দা কবুই ফোল্ক শোংগী সঙ্গিতভূষন উপাধি, রাজকুমার সনাজাওবদা স্তেজ লীলা, রাজকুমার সনায়াইমদা গৌরা লীলা অমদি ক্ষেত্রিময়ুম বিরজিৎতা শুমাঙ লীলা নটভূষন উপাধি, সগোলশেম য়াসোদাদা রাজত্য নৃত্যভুষন উপাধি, লৌরিয়াম থাবা লৈমদা থাঙ-তা অমদি হজারিময়ুম শ্যামকেশ্বর শর্মাদা ৱারী লীবা কলাভুষন উপাধি, থাংজম দশরত্তা লাইরিক হায়বগী কলারতন উপাধি অমসুং তেকচম রাধেশ্যামদা বিদ্যাভূষন উপাধি পীদুন ইকায়খুম্নবা ঊৎখি। 

থৌরম অদুদা পরিষদকী শেলগী মনা ওইনা কৈশাম প্রিয়োকুমার সিংহদা শ্রিমদ পরমহংস স্বামি যোগেন্দ্রনন্দ গীরি নীংশিং মনা, ব্রহ্মচারিময়ূম ব্রজবিধু সিংহ বিদ্যাভুষন শেলগী মনা, নোংমাইথেম লোকে সিংহদা থাঙ্গ অশাংবী শেলগী মনা, ৱাইরোকপম কামিনী সিংহ (থিএতর দিরেক্তর) দা লামাবম যাদুমণি নীংশিং শেলগী মনা, মোইরাংথেম কুমার সিংহ (ভাইলেন) দা গুরু থোকচোম অঙোবা নীংশিং শেলগী মনা, রাজ কুমার উপেন্দ্র সিংহ (ধুলক) দা উস্তাদ দেবো শেলগী মনা অমদি নাওরোইবম বিনয় সিংহ (মোইবুং) দা খোইরোম ইঙোবা এৱার্দ পীদুনা ইকায়খুম্নখি।

থৌরম অদুদা লাইরিক্তা পীবা শেলগী মনা অসি নহাকপম অরুনাদা মহাক্কী লাইরিক অহিংবা উপন্যাস (নৈন ৱারেং) দা অশাংবম মিনকেতন নীংশিং শেলগী মনা অমসুং দাঃ অথোকপম খোলচন্দ্রদা মহাক্কী লাইরিক মণিপুরী ৱারীমচা নৈনবা (নৈন ৱারেং) দা এলাংবম দিনমণি সাহিত্য মনা পীদুনা ইকায় খুম্নখি।

থৌরম অদুদা চীফ গেস্ত ওইনা শরুক য়াখিবা মণিপুর য়ুনিবর্সিতিগী ভাইস চাঞ্চেল্লর প্রোঃ এন লোকেন্দ্রনা হয়া, লমদম অসিগী কলা সংস্কৃত অমদি সাহিত্যবু শেমগৎনবা অমদি মালেমগী ফম্পাক্তা মণিপুরীগী মফম অমা কন্নবগীদমক্তা লিংখৎখিবনি।

সাহিত্য, কলা অমদি সংস্কৃতি অসি মণিপুরগীদমক্তদি জাতি শেমগৎপদা নত্তনা মণিপুরী খুন্নাইনা য়াম্না হৈনজবা, পামজবা, মণিপুরীশিংগীদমক্তা পীথোরকপা য়াম্না চুনবা মফম অমনি। ১৯২০ গী মতমদগী হৌনা লমদম অসিগী অইবশিংনা ইরগা থম্লম্বশিংনা মণিপুরী জাতিগী মশক, কলচর, নাৎ অসি পীকচরবসু নোর্থ ইস্ত ইন্দিয়াদা অখন্নবা মফম অমা কন্দুনা ঙসি ফাওবা লাক্লি।

মহাক্না হায়, ১৯২৫ অদুৱাইদগী হৌরগা মণিপুরী জাতিগী ওইবা লিতরেরি, কলচর অমদি আর্তিস্তিকগী লমদা অমুক হন্না ময়োল চোংলকখি অমদি মতম অদুদগী ঙসি ফাওবা মখা চত্থরক্তুনা ঙসিদি মণিপুরগী সাহিত্য, কলা অমদি সংস্কৃতিগী মরমদা ইবা, নৈনবা অমদি পাব্লিকেসন ময়াম অসিনা মণিপুরগী লিতরেরি পাব্লিকেসনশিং অসি মালেমগী থাক্তা লৈবা পাব্লিকেসন্নি খল্লি।

মালেমগী থিএতর অমদি লিতরেচরগী ফম্পাক্তা লমদম অসিদগী হৌখিবা শক্নাইরবা আর্তিস্ত অমদি অইবশিংনা অচৌবা খুদোল কয়া তমদুনা লাক্লি। মসিমক্না মণিপুরগী লিতরেরি তেলেন্ত, কলচর তেলেন্ত অমদি পার্ফোমিং আর্তস অসি মালেমগী ক্রিতিক্স, অইবা অমদি য়ুনিবার্সিতিগী  একাদামিশিংনা খঙবা হেল্লক্লি। মণিপুরী সাহিত্য পরিষদনা ঙসি ফাওবদা লৌরক্লিবা থৌদাং অসি কাউফম থোক্তে। পূম্নমক অসি অসিগী রেকোর্দ লৈ।

পরিষদ অসিনা ১৯৩৫ দগী মণিপুরী  জাতি অসি কন্নবা অমদি চাওখৎনবা হোনবদা লৌরক্লিবা থৌদাং, খুন্নাই অসিদা পীরিবা খুদোল অমদি মালেমগী ওইনা পুরক্লিবা অহোংবা অসিদা লৈরিবা মণিপুরগী সোসিও ইকনোমিক অমদি পোলিতিকেলগী লম অসিদা পরিষদনা লৌরিবা থৌদাং অসি লমদম অসিগী রিছার্চরশিংনা থিজিন্দুনা নৈনবগীদমক্তা মীয়ামগী মফমদা পুথোরক্কনি হায়বগী থাজবা থম্লি।

লোকেন্দ্রোনা মখা তানা হায়, স্তেত অসিদা মায় পাক্লবা এন্তরপ্রেনুর ময়াম অমা থোক্লক্লে, শক্নাইরবা সাইন্তিস্ত কয়া অমসু লৈ। মসিদা নত্তনা মালেমগী ফাওবদা য়ুনিবার্সিতিশিং দা মণিপুরীশিংনা অচৌবা কন্ত্রিব্যুসন পীরি। মালেমগী ওইনা লাক্লিবা অহোংবা অসিদা মণিপুরগী শেম্মীৎলোনগী মোর্দনাইজ তৌদুনা মালেমগী ইনভেস্তিরশিং অসি করম হায়না পূক্নিং চিংশিনগনি হায়বা অসি খন্নসি। স্তেত অসি স্পোর্তস, থিএতর, লিতরেচর অমদি পার্ফোমিং আর্ততা মালেমগী থাক্তা লৈরবনি। ঐখোয়না শোত্থরিবা অসি পোলিতিকেল ওর্গানাইজেসন অমদি ইকনোমিক মোর্দনাইজেসন্দনি। হীরম অসিদান চাওখৎপা পুরক্না অখঙ অহৈশিংনা ৱাখল থাদমিন্নসি হায়খি।

মণিপুরী সাহিত্য পরিষদ ইম্ফালগী