• 18
• ২৫শে অক্টোবর ২০২৫ ইং
• Share on:

মচল-মৌপাগী নুংশি খূদম ‘নিঙোল চাক্কৌবা’

ত্রিপুরাদা চিং-তম অনীগী অপুনবগী গ্রেট ফেষ্টিভেলনি ‘দুর্গা পূজা’। মণিপুরদনা চিং-তম অনীগী নুংশি খুদম ওইরিবা ‘মেরা হৌ চোংবা’ পাঙথোকপা গুম্না মবুং-মৌপা-নিঙোল চাক্কৌবা’। হিয়াঙৈ থাগী নিনি পানবদা মপাম য়ুমদা লাক্লগা ‘নিঙোল চাকৌবা’ অসিনা নিঙোল অমগী থম্মোয়দা অসুক্কী মতিক হরাওহল্লি। নিঙোল চাক্কৌবা হন্দকসু পাক চাওনা পাঙথোক্নখ্রে। ‘নিঙোল চাক্কৌবা’ অসি মবুং মৌপাশিংনা মখোয়গী মচল নিঙোলশিংবু নুংশিনা খুদোল পোৎ পীনবগী নুমিৎ অদু নত্তে, নুমিৎ অসিনা ময়ুম পানখ্রবী শাগৈ হোংখ্রবী নিঙোলশিংগী মফমদদি য়াম্না মরু ওইনা লৌবতা নত্তনা মবুং মৌপা ওইবশিংনসু মরু ওইবা খঞ্জবা নুমিৎনি। মবুং মৌপা খক্তা নত্তনা মমা মপা ওইবশিংনা মখোয়গী থাজখ্রবী শাগৈ ওনখ্রবী মচা নিঙোল শিংবু অমুক হন্না উন্নদুনা পুন্না চামিন্নবা থকমিন্নবা অমদি হরাও তয়াম্নদুনা অৱা নুঙাইদা পুন্না শরুক য়ামিন্নবগী তাঞ্জা অমসু ওইহল্লিবনি নিঙোল চাক্কৌবনা।

নুংশিখ্রবা থৌরম অসিগী মৈহৌরোলদি খৃষ্ট ৩৩ শুবদা কংলাদা ফম্বাল কাখিবা নিংথৌ নোংদা লাইরেন পাখংবনা পোইরৈতোনগী মচন নুপী লাইস্না লুহোংই। লুহোংলবা মতুং চহী কয়ারোম মতুং লাইস্নানা উহৈ-মহৈ মরোং কয়া পুদুনা মবুং পোইরৈতোন উন্নবা চৎলি। মতম কুইনগী মতুং মচন উন্নবা চৎলি। মতম কুইনগী মতুং মচন উন্নবা ফংবা অদুদা য়াম্না হরাওখি। মচলনা হনখিবদা পোইরৈতোন্না চেঙ অমুবা খরগা লফোই লাফাং খরগা  হাপ্পীরকখি। ময়ুমদা হল্লক্রগা লাইস্নানা চেঙ অদু থোংই। অখন্নবা মহাও অমা ফংবা অদুদা পাখংবসু য়াম্না হরাওরে। লাইস্নানা মবুং পোইরৈতোন গী তৌবিমলবু খঙবা উৎপা ওইনা চাক চরা অমত্তং চামিন্নসি হায়না মপুরোইবা পাখংবগী য়াথং লৌরগা চাক্কৌখি। মশেন মবাই পুন্না চামিন্নখি। অসুম্না কুম কয়া হৌনা নিঙোলনা মবুংবু চাক্কৌবসি চৎনদুনা লাকখিবনি।

ঙল্লিঙৈ মতমদগী হৌনা মীতৈ ইনাৎ লাইনিং লাইশোল হরাও কুম্মৈ হৌনা লোনচৎ কয়াদা লাকখিবা অহোংবা লাকখি। নিঙোলনা মবুং মৌপাশিংবু চাক্কৌবসি মৈদিংঙু চন্দ্রকীর্তি মহারাজগী মতমদদি মবুং মৌপানা নিঙোলশিংবু চাক্কৌবা চৎনবা হৌরে। হায়বদি মবুং মৌপানা মচে নিঙোলশিংগী ময়ুমদা চৎপগী মহুত্তা শাগৈ ওনখ্রবী মচল মচে নিঙোলশিংবু মবুং মৌপানা কৌরগা চাক্কৌবা অদুনি ঙসিগী ‘নিঙোল চাক্কৌবা’। হিন্দুগী ‘ভাই ফোটা’ নত্রগা ‘ভ্রাতৃ দ্বিতীয়া’ ‘রক্সা বন্ধন’ হায়নসু খঙনরিবা মচিল মৌপা, মচন মচে গী নুংশী মরী ইমুং মনুং পুন্না চামিন্নবা থকমিন্নবা হরাওমিন্নবা অদুনি।

ঙসিগী মীতৈ খুন্নাইগী পুন্সিরোল অসিদা নোং-নোংমগী মশীং হন্থরক্লিবা পুন্সি মহিংদা তংদু লৈতারক্তবা কয়াগী মরক্তসু হরাও নুংঙাই পামজবা জাতি অসিনা মবুং মৌপা নিঙোলগী অচেৎপা নুংশি মরীবু অতৈসু হেন্না হেন্না চেৎনা পুনশিন্না থম্বগী পান্দমদা ‘নিঙোল চাক্কৌবা’ থৌরমসি মণিপুরগী ৱাংমদা অতৈ অতৈ লমদসু পাক চাওনা পাঙথোক্নবা হৌখ্রে। আসাম, ত্রিপুরাতা নত্তনা দিল্লী, মুম্বাই, ব্যাঙ্গালুর, শিল্লোং, বাংলাদেশ কানাডা, ইউরোপ, আমেরিকা নচিংবা মফমদসু ‘নিঙোল চাক্কৌবা’ মফম অদুদা লৈবা মৈতৈশিংনা হরাও কুম্মৈ কয়াগা য়াওনা পাঙথোক্নরি। মমাংঙৈ ইমুং মনুং খক্তা ওইনা পাঙথোক্লম্বা নিঙোল চাক্কৌবা ঙসিদি লুপ সংস্থা ক্লাবনা শীন্দুনা লৈকাই লৈকাইগী ইমা ইবেল ইচল ইচেশিং য়াওহন্দুনা পাক চাওবা থৌরম অমগী খুত্থাংদা নুংশি মরীগী খূদম ওইরিবা ‘নিঙোল চাক্কৌবা’ পাঙথোক্নরক্লে।

মণিপুরগী মপান্দা খুন্দানা লৈখ্রবা ত্রিপুরাদা ঙসিগী মৈতৈ খুন্নাই অসিনা মশীং লিকচরবুস মশাগী লোল, নাৎ হৌনা লোনচৎ কয়াবু ঙাক্তুনা চৎলি। মমাংঙৈ খুৎকন পাঙ্গলবা ইমুং মনুংনা লৈকাইগী নুপী অঙাং নৱাশিং কৌরগা পুন্না পীজ পীথক (ভান্দ্রা) তৌবা নত্তনা ‘নিঙোল চাক্কৌবা’ হায়না ত্রিপুরাদা পাঙথোক্লমদে। মণিপুরগী মতৌগুম্না ত্রিপুরাদা ‘নিঙোল চাক্কৌবা’ হায়বা মিংথোনদা চাক্কৌবগী থৌরম পাঙথোকপসি পংকুই কুইদ্রি। মণিপুর গুম্না খুদোল পোৎ পীনবুস হৌরে। খূদোলপোৎ পীনবদা হৌজিক ফাওবা হিদান্নবা, মন্তিক্নবা অদুম্মক লৈত্রবসু মণিপুর গুম্না তোঙান  তোঙানবা লুপ সংস্থানা শীন্দুনা ইমা ইবেল মচল মচে নিঙোল ময়াম্বু কৌদুনা ‘নিঙোল চাক্কৌবা’ থৌরম ঙসিদি পাক চাওনা পাঙথোক্নরকপা হৌরে। লুপ সংস্থানা শীন্দুনা নিঙোল চাক্কৌবা পাক চাওন পাঙথোকপা হৌদোকখিবসি সদর খা সিপাহীজলা ডিষ্ট্রিক্টকী লালসিং মুড়া হায়বা মৈতৈ খুলদনি। অসুম্না থৌরম অসি আগরতলাদুস পাঙথোকখি। হিয়াঙৈগী মরিনী পানবা হয়েং অক্টোবর তাং ২৫ থাংজা নুমিৎ আগরতলা অভয়নগার মণিপুরী কো-কালচারেল ফোরাম, আগরতলা, পুথিবা ওয়েলফেয়ার এ্যন্ড কালচারেল সোসাইটি, অভয়নগর অমসুং তখেল লৈমা তেঙবাং লুপ, ত্রিপুরা হায়রিবা লুপ অহুম অসিদা খুৎশম্নরগা নিঙোল চামরোম কৌদুনা হন্দক চহীগী নিঙোল চাক্কৌবা থৌরম পাঙথোক্কনি হায়রি। থৌরমদা অতোপ্পা শাগৈগী মীওইসু শরুক য়াগনি হায়রি।

সোর্স: মরূপ পাউচে, ২৪ অক্টোবর ২০২৫