ইপা ইপু নিংশিংবনা ঐখোয় হিংবনিঃ শরতচান্দ
ইম্ফাল, সেপ্টেম্বর ১৬
ইম্ফাল ওয়েষ্ট ডিষ্ট্রিক্টকী মনুং চন্না লৈবা লমদেং মখা লৈকাই পাইওনিয়ার ক্লাবকী শঙলেন্দা মণিপুরী অরাংফম ডিবলমেন্ট এন্দ কালচারেল ইন্সটিট্যুসন্না শীন্দুনা ঙসি লাইওইখ্রবা অরাংফম পুরেলশিংনা হৈকৎ লৈকৎ তম্বগী থৌরম অমা পাঙথোকখ্রে।
ঙসিগী থৌরম অসিদা নোর্থ ইষ্ট জোন কালচারেল সেন্টর দিমপুরগী মেম্বার শরতচান্দ থিয়ামনা চীফ গেষ্ট ওইখি। লোয়ননা ইন্সটিট্যুট অসিগী প্রেসিদেন্ট এল অপাবিনা প্রিসাইদ তৌদুনা পাঙথোকখিবা থৌরম অসিদা ময়াং লাংজিং জিপিগী প্রধান তি তোম্পোক, মাক্লং জিপিগী প্রধান লৈমহল দেবী, এক্স কাউন্সিল্লর এল অশোককুমার অমসুং সোসিয়েল ৱার্কর লাইশ্রম নবকুমারনা গেষ্ট ওফ ওনার ওইনা শরুক য়াখি।
হৌদোকপা থৌরমগী মৈরা চুখৎপগা লোয়ননা লাইওইখ্রবা অরাংফম পুরেলশিংগী মফমদা হৈকৎ লৈকৎ তমখি। করিগীদমক অসিগুম্বা থৌরম অসি পাঙথোক্লিবনো হায়বগী মতাংদা ইন্সটিট্যুট অসিগী সেক্রেটারি খুরাইজম গিরানি মীতৈনা হায়, হৌজিক্কী মতম অসিদা অলাংফমগী য়াম্না মরুওইবশিংদু পাক শন্না খঙহন্নিংবদগী অসিগুম্বা থৌরম অসি শিনবনি। লোয়ননা শিনফম অসিদা কত্থোকখ্রবশিংবু ইকায়খুম্নবা উৎচবনি।
ঙসিগী থৌরম অসিগা মরী লৈননা খংজ্রাকপম গিরানিদা এমএদিসিআই এৱার্দ ফোর অরাংফম পীখি। লোয়ননা মৈতৈ অমায়বা হায়বা শিনফম অসিদা কত্থোক্তুনা লাক্লিবা কৈশাম খোইবা সিংহদা খুরাইজম ইবোবী এৱার্দস খুৎশিন্নখি। লোয়ননা অখন্নবা হিরমদা অবুজম জাতিশোরনা লুহোংবগী নুংগী ৱারোল, তোঞ্জম অমুবীনা খমুং মাইবরোল চৈত্য, অনৌবম তোম্বী শর্ম্মানা করিগীদমক শ্রাদ্ধ কর্ম্ম শোল্লিবনো অমসুং ময়াংলম্বম কিরনকুমারনা থৱায়না নোঙ্গাখিবগী মরমদা ৱা ঙাঙখি।
ঙসিগী থৌরম অসিদা চীফ গেষ্ট ওইখিবা শরতচান্দ থিয়ামনা হায়, ঐখোয়গী ইপা ইপুশিংবু নিংশিংবসিনা ঐখোয় হিংলিবনি। মময় য়াম্লবা ইপা ইপুশিংনা থম্বীরম্বা কালচার অসিনা ঙসি ফাওবা ঐখোয়বু নাওকোন্দুনা থম্বীরি। অসিগুম্বা মতিক মগুন লৈরবা ইপা ইপুশিংবু নিংশিংদুনা ঙসি ঐখোয়না মখোয়গী মফমদা লৈ মনা অমত্তং ওইরবসু কৎচবা ফংলিবসি য়াম্না চাওথোকচনিংঙাইনি। মখোয় লৈরম্বনা ঐখোয় লৈবনি।
হৌজিক্তি ঐখোয়না অমুক তুংগী মীরোলদা মখোয়বু অমুক তুংগী মীরোলদা মখোয়বু শক্তাকপা য়াম্না মথৌ তারে। থৌরমগী প্রিসাইদ ওইখিবা অপাবীনা ঐখোয়গী ইথৌদি ইপা ইপুশিংবু নিংশিংবনি হায়না ফোঙদোকখি। লোয়ননা সেক্রেটারি গিরানি মীতৈনা মতম চাবা অমা য়েংলগা অরাংফমগী মরুওইবশিংগী মরমদা সেমিনা অমা শিন্নবা খন্নরি হায়নসু ফোঙদোকখি।
সোর্স:সঙাই এক্সপ্রেস
0 কমেন্ট:
কমেন্ট তৌবিয়ু