ইম্ফাল, জুন ১৭ : আসামগী হোজাইদগী লাকপা মৈতৈশিংনা ইম্ফাল অমদি গ্রেটার ইম্ফালগী মফমশিংদা লৈরিবা রিলিফ কেম্পশিং অমদি কোকোমিদা শেন অমসুং পোৎ চৈগী য়াম্লবা মতেং পীরম্বগা লোয়না মণিপুরগীদমক আসামদা লৈরিবা মৈতৈশিংনা লেপ্লি হায়না ফোঙদোক্লম্লে।

মেজরখুলদা লৈবা মণিপুর প্রেস ক্লাবতা পাঙথোকপা পাউগী মীফম অমদা হোজাই অপুনবা মৈরা পায়বী লুপ, ব্রহ্মপুত্র ভেল্লি অমসুং সেনিয়র সিটিজেন্স ওফ হোজাইগী মীহুৎশিংনা মখোয়না মণিপুরদা লাক্তুনা মতেং পাংবা ফংজবা অসি য়াম্না লাইবক ফবনি হায়খি।

হায়রিবা হোজাইদগী লাকপা মৈতৈ ইচিন ইনাওশিং অদুনা মখা তানা থা অসিগী ১৫দা মখোয় ৭ লাকখিবনি হায়না ফোঙদোক্লদুনা নুমিৎ অসিদগী হৌনা খুমন লম্পাক য়ুথ হোষ্টেল, ফৈয়েং অমদি নোংশুমদা লৈবা রিলিফ কেম্পশিং অমসুং কোকোমিদা শেন অমসুং পোৎ চৈগী অঙম্বা মতেং পাংখি।

অথুবা মতমদা মণিপুরদা ইং চীকপা হঞ্জিনহন্নবা মণিপুর লৈঙাক অমদি সেন্টার লৈঙাক্তা মখোয়না তকশিল্লদুনা ষ্টেট অসিদা তারিবা মৈতৈশিংনা থেংনরিবা অৱাবদা হোজাই অমদি আসামদা লৈরিবা মৈতৈশিংনা থম্মোয় শেংনা নুংঙাইতবা ফাওই হায়খি।

সোর্স: সঙাই এক্সপ্রেস