'আরকে কমলজিৎ এচিভমেন্ট এৱার্ড ২০২৫' অহানবা ফংখ্রবা ঢাকাবাড়ীগী নির্মলনা লৈখিদবসি খুন্নাইগী মাঙজবনি
আগরতলা, জুন ৪ : সংস্কৃতিগী লমদা মাইকৈ কয়া পুরম্বা পুং-য়ৈবা, ঈশৈ শকপা (দোহার, পালা), ৱারী লিবা- লাইরিক থীবা(পাঠ) নচিংবা ঢাকাবাড়ীগী শক্নাইরবা সংস্কৃতি সেবী মায়থাম নির্মল সিংহনা মনুং মতম চাদনা ইখং খঙহৌদনা লৈখিদবদা মরূপ পাউচে, মণিপুরী লিটরেরী এ্যন্ড কলচরেল ফোরাম, পেত্রিওটিক রাইটার্স ফােরাম ত্রিপুরা ব্রাঞ্চ, লময়ানবা সোসিও কলচরেল ওর্গানাইজেশন নচিংবা অমসুং মণিপুরী সাহিত্য পরিষদ ত্রিপুরাগী প্রেসিডেন্টনা থম্মোয় শোক্না অৱাবা ফোঙদোকখ্রে। সংস্কৃতি সেবী মায়থাম নির্মল চৎখিবা মে ২৭ নুমিদাং অথেংবদা মশাগী লায়না অমনা আগরতলা জি.বি.পি হাসপাতালদা পুন্সিগী অরোইবা য়াহিপ তানখিবনি। মশাগী চহী ৫৯ তা শুখ্রবা মহাক্না লৈখিদবসি খুন্নাইগী অচৌবা মাঙজবা অমা ওইখ্রে। লৈখিদবা মতমদা লোইনবী ওইনাম চনু মায়থাম ওংবী বীনা, মচা নুপী নীলিমা, ময়া নিপা সনসম রজত য়াওনা মচিল মনাও, মরিমতা মরূপ মপীজা সংস্কৃতিপ্রেমী কয়া থম্লম্মী।
মায়থাম নির্মল, ইং ১৯৬৭ মার্চ ১৩, সিপাহীজলা ডিস্ট্রিক্টকী বিশালগড়গী ঢাকাবাড়ীদা তাইবঙ ফাওরকখি। অপোকপগী মিংনা মায়থাম নিংথী, অপোকপী থম্বাল দেবী কৌই। মচিল মনাও ৬ গী (সনাহনবী, পদ্মাবতী, সুশীলা, মলিনা অমসুং নির্মল, কান্তি) মনুংদা নুপাদা অহলনি। অপোকপা এম নিংথী সিংহ নট সংকীর্ত্তন্দা ময়াম্না শক খঙলবা শক্নাইরবা দোহার নি। সংস্কৃতি পামজবা ইমুংদগী হৌরকপা মায়থাম নির্মল লাইরিক ফরবসু হায়ার সেকেন্ডারী পাশ তৌরবা মতুং পুং ঈশৈ রোমদা থৱায় য়াওনা মায় ওনশিনখি। ঈশৈদা মহাক্কী অহানবা ওজা গুরুদি লালসিংমুড়াগী হৈরোংবম নিংথৌ সিংহনি। অদুগা পুংদা ঢাকাবাড়ীগী মায়থাম ক্ষিরমোহন সিংহদগী অহানবা পুংয়ৈবা তম্মগা লালসিংমুড়া গী ওজা লৈশাংথেম গোপাল সিংহদা গুরু বোরিদুনা পুংলোন শুনা তমখি। মসিতা নত্তনা ঢাকাবাড়ীগী থৌনাওজম রাজেন্দ্র সিংহ অমসুং থৌনাওজম গজেন্দ্র সিংহদগী লাইরিক হায়বা-থীবা পাঠ তৌবা নচিংবা তমখি। বিশালগড় পরগনা মনুং চনবা খুঙ্গংশিং ঢাকাবাড়ী, লালসিংমুড়া, মুড়াবাড়ীদা নত্তনা সনখোলা (সংলা), তেলেরবন, নারান খামার, বাজালঘাট, কমলপুর, আওলী নচিংবা মৈতৈ খুঙ্গং কয়াদা নট সংকীত্তন থৌরম কয়াদা শরুক য়াখি। ইং ২০১৯ দা মণিপুর লৈঙাক্কী আর্ট এ্যন্ড কালচার লোয়শঙ গী শেলগী মতেং লৌরগা মরূপ পাউচেনা শীল্লাংবা রাধানগর মান্ডপতা পাঙথোকখিবা ত্রিপুরাদা ইহান হানবা লাইরিক হায়বা-থীবা চাংদম্নবদা শরুক য়াখিবা মহাকপু ইকাইখুম্নখি। নারানদা লৈঙাকা শীন্দুনা চহীগী বসন্ত উৎসব থৌরম দা মহাকপু ইকাইখুম্নখি।
আগরতলা প্রেসক্লাবতা মায়থাম নির্মলবু 'আরকে কমলজিৎ এচিভমেন্ট এৱার্ড পীদুনা ইকাইখুম্নবা
চৎখিবা চহী ২০২৫ আগষ্ট ৮, মরূপ পাউচে অমসুং মণিপুরী সাহিত্য পরিষদ ত্রিপুরা অনীনা খুৎশম্নরগা আগরতলা প্রেস ক্লাবতা পাঙথোকখিবা স্নাখ্যা কমলজিৎকী বার্থ সেন্টিনারী থৌরমদা মায়থাম নির্মলবু সংস্কৃতিগী লমদা মহাক্কী থৌদাং কয়াবু শক খঙলদুনা মরূপ পাউচে মাইকৈদগী 'আরকে কমলজিৎ সিংহ লাইফটাইম এচিভমেন্ট এৱার্ড-২০২৫' পীদুনা ইকাইখুম্নখি। এৱার্ড অসিনা মহাক্কী পুন্সিগী অরোইবা অমদি খ্বাইদগী অচৌবা ইকাইখুম্নবা হায়বদু ওইখি। পনবা য়াবদি থৌরম অদুদা মণিপুরদগী ইসকন মণিপুর ডেভেলপমেন্ট কাউন্সিল গী জেনারেল সেক্রেটারী শক্নাইরবা আরকে দুসরী গোপাল, সাহিত্য একাডেমি এবার্ডি শরতচান্দ থিয়াম, মণিপুরী সাহিত্য পরিষদ ত্রিপুরাগী প্রেসিডেন্ট এল ডব্লিউ বীরমঙ্গল নচিংবা শরুক য়াখি।
জুন তাং ৯ দা ঢাকাবাড়ীদা লৈখিদ্রবা মহাক্কী শ্রাদ্ধ-কর্ম পাঙথোকদৌরী।
সোর্স - মরূপ
0 কমেন্ট:
কমেন্ট তৌবিয়ু